13-Oct-2026

(ମିହିର ଶଙ୍କର ପାତ୍ର)
 ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ ଅନ୍ତର୍ଗତ ପାଡାଗଡ଼ ଅଞ୍ଚଳରେ ରାତି ଅଧରେ ବେଆଇନ ଭାବେ କ୍ରସର ଚାଲିଥିବା ଅଭିଯୋଗ ହେଉଛି ।ସ୍ଥାନୀୟ ଲୋକଙ୍କ କହିବା ଅନୁଯାୟୀ, ପ୍ରତିଦିନ ରାତି ୧୦ଟା ପରେ ଶହ ଶହ ଟ୍ରିପ ଟ୍ରାକ୍ଟର ଓ ହାଇୱା ଯୋଗେ ବେଆଇନ ଭାବେ ପଥର ଚାଲାଣ ହେଉଛି। ଦିନରେ ସବୁ ବନ୍ଦ ଦେଖାଯାଉ ଥିବା ବେଳେ ରାତିରେ ବିନା ଅନୁମତିରେ କ୍ରସର ମେସିନ୍ ଚାଲି ପାହାଡ଼କୁ ସଫା କରାଯାଉଛି। ଏଥିରେ ଖଣି ମାଫିଆ ମାଲାମାଲ ହେଉଥିବା ବେଳେ ସରକାର ଲକ୍ଷ ଲକ୍ଷ ଟଙ୍କାର ରାଜସ୍ୱ ହରାଉଛନ୍ତି।କିଛି ମାସ ପୂର୍ବେ ବେଆଇନ ବ୍ଲାଷ୍ଟିଂ ଯୋଗୁଁ ଆଖପାଖ ୧୦ ଖଣ୍ଡ ଗାଁର ଘର ଗୁଡିକରେ ଫାଟ ସୃଷ୍ଟି ହୋଇଥିବା ଅଭିଯୋଗ ହେଇଥିଲା , ଆଖ ପାଖ ଗ୍ରାମ ଧୂଳି ପ୍ରଦୂଷଣ ଓ ଶବ୍ଦ ପ୍ରଦୂଷଣରେ ଲୋକେ ଅତିଷ୍ଠ ହେଲେଣି। ଅନେକ ଥର ଛୋଟାଗୁଡା ଗ୍ରାମବାସୀ ତହସିଲଦାର ଓ ଖଣି ବିଭାଗକୁ ଅଭିଯୋଗ କଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। କିଛିଦିନ ପୂର୍ବେ ଜିଲ୍ଲାପ୍ରଶାସ ଆସି ପଥର ଖଣି ବନ୍ଦ କରିଥିଲେ ତଥାପି କ୍ରସର ରାତିରେ ଚାଲୁଚି ଏହା ସତରେ ଆଶ୍ଚର୍ଯ୍ୟର କଥା। ଖଣି ମାଫିଆ ମାନେ ଯେତିକି ଲିଜ ନେଇଥିଲେ ତାଠୁ ଅଧିକ ପରିମାଣରେ ପଥର ଉଠଇ ଥିବା ସ୍ଥାନୀୟ ଅଂଚଳରେ ଆଲୋଚନା ହେଉଛି ଖାଲି ଏତିକି ନୁହଁ ପଥର କାଡ଼ିବା ପରେ ସେଟ୍ଲାଇଟ୍ ସର୍ବେ ଭୟରେ ସେହି ସ୍ତାନ ମାନଂକୁ ମାଟି ମରୁମ ଓ ବାଲି ଭର୍ତ୍ତିକରି ସରକାରଙ୍କୁ ଫାଙ୍କିବା ପାଇଁ ମଧ୍ୟ ଉଦ୍ୟମ ଚଳାଇଥିବା ଗ୍ରାମବାସୀ ମାନଙ୍କ ମଧ୍ୟରେ ଚର୍ଚ୍ଚା  ହେଉଛି। ବର୍ତ୍ତମାନ ସେହି ସ୍ଥାନରେ ସେଟଲାଇଟ୍ ସର୍ବେ ହେଲେ ସବୁ ସତ ଜଣାପଡିବ ଏବଂ  ଜିଲ୍ଲା ପ୍ରଶାସନ ତୁରନ୍ତ ରାତିରେ ଚଢାଉ କରି ବେଆଇନ କ୍ରସର ଓ ଖଣି ମାଫିଆଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ସାଧାରଣରେ ଦାବି ହେଉଛି।