29-Oct-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ) ତଣ୍ଡାମୁଣ୍ଡା ଘାଟି ଜଙ୍ଗଲରୁ ପୁଲିସ୍ ଉଦ୍ଧାର କରିଥିବା ବାହାର ରାଜ୍ୟର ଯୁବକଯୁବତୀଙ୍କ ତଣ୍ଟିକଟା ହତ୍ୟାକାଣ୍ଡରେ ତଦନ୍ତକାରୀ ପୁଲିସ୍ ଏଯାଏଁ ହତ୍ୟାର କାରଣ ଓ ହତ୍ୟାକାରୀଙ୍କ ସମ୍ପର୍କରେ ଖୁଲାସା କରି ନଥିବା ବେଳେ ଗଣମାଧ୍ୟମରେ ବିଭିନ୍ନ ଚମକପ୍ରଦ ବିଷୟ ପ୍ରକାଶ ପାଇଛି ।

ତେବେ ଏଥିରେ ଆମର ପୂର୍ବାନୁମାନ ପ୍ରାୟତଃ ସତ ହେଉଛି।  ଏହି ହତ୍ୟାର କାରଣ ଗଞ୍ଜେଇ ଚୋରା ଚାଲାଣରେ  ଧୋକା ବୋଲି ଆମେ ପ୍ରକାଶ କରିଥିଲୁ। ଏହାସହ ମୃତ ଜାଭେଦ୍ ଝାଡଖଣ୍ଡର ନୁହେଁ, ହାଇଦ୍ରାବାଦର ବୋଲି ସେ କିଛିଦିନତଳେ ବଲାଙ୍ଗୀର ରେଳଷ୍ଟେସନରେ ଚୋରାଗଞ୍ଜେଇ ସହ ଧରାପଡିଥିବା ଦୁଇଜଣ ନାବାଳକ ମଧ୍ୟରୁ ଜଣେ ତା'ର ସମ୍ପର୍କୀୟ ଭଣଜା ହୋଇଥିବାରୁ ସେ ଏଠାରେ ରହି ତାର ଜାମିନ୍ ପାଇଁ  ଓକିଲ ସମ୍ପର୍କ କରିଥିବା ବିଷୟ ପ୍ରକାଶ କରିଥିଲୁ। ତେବେ ଏହାର ମୂଳକାରଣ ଆନ୍ତଃରାଜ୍ୟ ଗଞ୍ଜେଇ ଚୋରାଚାଲାଣ ବୋଲି ଆମେ ଦୃଢ ସନ୍ଦେହ କରିବା ସହ ଫୁଲବାଣୀ-ବୌଦ୍ଧ-ସୋନପୁର-ବଲାଙ୍ଗୀର କରିଡର ଦେଇ ଏହା ଝାଡଖଣ୍ଡ ବା ବାହାରରାଜ୍ୟକୁ ପୁଲିସ୍ ଓ ସ୍ଥାନୀୟ ବେପାରୀଙ୍କ ସହଯୋଗରେ ଏକ ରାକେଟରେ ପାର ହେଉଥିବା ବିଷୟ ଉଲ୍ଲେଖ କରିଥିଲୁ। ଏବେ ତାହା ସତ ହେବାରେ ଲାଗିଛି। ତେବେ ପୁଲିସର ତଦନ୍ତର ଖୁଲାସା ପରେ ସମ୍ପୂର୍ଣ୍ଣ ଘଟଣା ଜଣାପଡିବ ।

ଏହି ଅନୁଯାୟୀ, ମୃତା ଯୁବକଯୁବତୀ ଦୀର୍ଘଦିନ ଧରି ବଲାଙ୍ଗୀର ସମେତ ବିଭିନ୍ନ ଜିଲ୍ଲାରେ ଏଥିପାଇଁ ଜାଲ ବିଛାଇ ଗଞ୍ଜେଇ ଚୋରାଚାଲାଣରେ ସମ୍ପୃକ୍ତ ରହିଥିବା ଓ  ଏଥିରେ ସେମାନଙ୍କ ସହ ବାହାରରାଜ୍ୟର ଆନ୍ତଃରାଜ୍ୟ ଚୋରା ବେପାରୀ ମାନେ ସକ୍ରିୟ ରହିଥିବା ପ୍ରମାଣିତ ହୋଇଛି ।  ଏଥରୁ ସେମାନଙ୍କ ମଧ୍ୟରେ ଟଙ୍କା ଦେଣନେଣକୁ ନେଇ ଗୋଷ୍ଠୀବିବାଦ ସୃଷ୍ଟି ହୋଇଥିଲା ଓ ଆଜି ପ୍ରକାଶିତ ଏକ ନିର୍ଭରଯୋଗ୍ୟ ଖବର ଅନୁଯାୟୀ, ପ୍ରାୟ ୭ ଲକ୍ଷ ଟଙ୍କା ହଡପ ନିମନ୍ତେ ଝାଡଖଣ୍ଡର ଉକ୍ତ ଆନ୍ତଃରାଜ୍ୟ ଚୋରାବେପାରୀ ମାନେ ଟ୍ରେନ୍ ରେ  ଆସି ବିଶ୍ବାସଘାତକତା ପାଇଁ ସେମାନଙ୍କୁ ହତ୍ୟା କରିଥିବା କୁହାଯାଉଛି । ତେଣୁ ଯେଉଁଠାରେ ସେମାନଙ୍କ ମୃତଦେହକୁ ଫିଙ୍ଗାଯାଇଥିଲା , ସେଇ ରାସ୍ତା କୌଣସି ସ୍ଥାନୀୟ ସହଯୋଗୀ ଦେଖାଇଥିବା ସମ୍ଭବ l 

କିନ୍ତୁ ଗୁରୁତର ବିଷୟ ଯେ, ଏହି ପ୍ରକାଶିତ ତଥ୍ୟ ଅନୁସାରେ, ମୃତାଯୁବତୀ ପଲକ ଆଗରୁ କୌଣସି ବିଷୟ ପାଇଁ ପୁଲିସର ଦ୍ବାରସ୍ଥ ହୋଇଥିବା, ସେହି ସମୟରୁ ପୁଲିସ୍ ତା'ର ଫଟୋ ଓ ତଥ୍ୟ ରଖି ତାର ଓ ତା'ସାଙ୍ଗରେ ରହି ହତ୍ୟାର ଶିକାର ହୋଇଥିବା ତାର ପୁରୁଷବନ୍ଧୁ ବନାମ ଅନ୍ୟତମ ଆନ୍ତଃରାଜ୍ୟ ଗଞ୍ଜେଇ ମାଫିଆ ଜାଭେଦ୍ ର ଗତିବିଧି ଉପରେ ନଜର ରଖୁ ଥିବାରୁ ପୁଲିସ୍ ଏହି କାରବାର ସହିତ ପୂର୍ବରୁ ଭଲଭାବରେ ଅବଗତ ଥିଲା ? ଏବେ ତାହା ତଦନ୍ତର ପରିସରଭୁକ୍ତ ହେବ କି  ? ବୋଲି ଲୋକେ ଆଲୋଚନା କରୁଛନ୍ତି ।