15-Jul-2024

ସିନ୍ଧେକେଲା (ଅନିଲ ତ୍ରିପାଠୀ) - ଅସହାୟ ବୃଦ୍ଧାଙ୍କୁ କାନ୍ଧ ଦେଇ ମାନବିକତାର ପରିଚୟ ସୃଷ୍ଟି କରିଛି ସିନ୍ଧେକେଲା ସତ୍ୟସାଇଁ ସଂଗଠନ । ମିଳିଥିବା ସୂଚନା ଅନୁସାରେ ସିନ୍ଧେକେଲା ରଣା ପଡ଼ାର କୈକେୟୀ ରଣା (୬୫) ଙ୍କ ଗତ ମଙ୍ଗଳବାର ଦିନ ବାର୍ଦ୍ଧକ୍ୟ ଜନିତ ମୃତ୍ୟୁ ଘଟିଥିଲା । ତାଙ୍କ ସ୍ୱାମୀ କମଳା ରଣା ଙ୍କ ହାରାହାରି ଦଶ ବର୍ଷ ପୂର୍ବରୁ ମୃତ୍ୟୁ ହୋଇସାଇଥିବା ବେଳେ ସେ ବେସାହାରା ହୋଇ ରହିଥିଲେ । ତାଙ୍କର ପରିବାରରେ ବର୍ତ୍ତମାନ ୨ ଝିଅ ସନ୍ତୋଶିନୀ ରଣା  (୨୧) , ପୁଷ୍ପା ରଣା(୧୮) ଓ ଗୋଟିଏ ପୁଅ ଦୀପକ (୧୬) ଥିବାବେଳେ ଦୈନିକ ମଜୁରୀ କାମ କରି ସେ ତାଙ୍କ ପରିବାରର ଗୁଜୁରାଣ ମେଣ୍ଟ କରୁଥିଲେ । ପୁଅ ଛୋଟ ଥିବାରୁ ତାଙ୍କ କନ୍ଧା ଦେବା ପାଇଁ କେହି ବାହାରି ନଥିବାରୁ ସ୍ଥାନୀୟ ସତ୍ୟସାଇଁ ସଂଗଠନ ପୂର୍ବତନ ଆବାହକ ବଳରାମ ସାହୁଙ୍କ ନେତୃତ୍ବରେ ସଂଗଠନ ର କର୍ମକର୍ତ୍ତା ମନୋରଞ୍ଜନ ସାହୁ, ସଞ୍ଜୟ ସାହୁ, ବିଦ୍ୟା ସାହୁ , ବାବୁଲାଲ ସାହୁ, ଆଲୋକ ସାହୁ ସମେତ ପଡାର ଅନ୍ୟ କେତେ ଜଣ ମିଶି ଗାଁ ଶ୍ମଶାନ ଘାଟରେ ତାଙ୍କ ଶେଷକୃତ୍ୟ କରିଥିଲେ । ସୂଚନାଯୋଗ୍ୟ ଯେ କୈକେୟୀ ରଣାଙ୍କ ପରିବାର କୁଡ଼ିଆରେ ଜୀବନ କାଟୁଥିବା ବେଳେ ତାଙ୍କୁ କୌଣସି ପ୍ରକାର ସରକାରୀ ସହାୟତା ମଧ୍ୟ କେବେ ମିଳି ନଥିଲା । ତେବେ ମୃତକ ପରିବାର କୁ ହରିଶ୍ଚନ୍ଦ୍ର ଯୋଜନା, ପ୍ରଧାନମନ୍ତ୍ରୀ ଆବାସ ଯୋଜନା ସହ ବିଭିନ୍ନ ଯୋଜନାରେ ତୁରନ୍ତ ସାମିଲ କରି ସହାୟତା ଯୋଗାଇଦେବାକୁ ପଡ଼ାବାସୀ ପକ୍ଷରୁ ଦାବି ହେଉଛି । ସତ୍ୟସାଇଁ ସେବା ସଂଗଠନ ର ଏଭଳି ମହତ କାର୍ଯ୍ୟକୁ ବିଭିନ୍ନ ମହଲରେ ପ୍ରଶଂସା କରାଯାଇଛି ।