19-Jun-2024

(ମନୋରଞ୍ଜନ ତ୍ରିପାଠୀ )
 ସ୍ଥାନୀୟ ସୋନପୁର ଟାଉନ ହଲ ପ୍ରକୋଷ୍ଠ ରେ ବିଶ୍ୱ ରକ୍ତ ଶିକୁଳି ଦିବସ ପାଳିତ ହୋଇଯାଇଛି I ଉକ୍ତ ସଭାରେ ଜିଲ୍ଲା ମୁଖ୍ୟ ଚିକିତ୍ସା ଓ ଜନସ୍ୱାସ୍ଥ୍ୟ ଅଧିକାରୀ ଡ଼ା: ଦୁର୍ଗାଦତ୍ତ ଦାସ ଙ୍କ ଅଧ୍ୟକ୍ଷତା ରେ ଅନୁଷ୍ଠିତ ଏହି ସଭାରେ ମ୍ୟୁନିସିପାଲିଟି ଚେୟାରମ୍ୟାନ ଶ୍ରୀମତୀ ତାପସୀ ତାମସ୍ମିତା ନାଏକ ମୁଖ୍ୟ ଅତିଥି, ସିଡିଓ କମ ଇଠ ଜିଲ୍ଲା ପରିଷଦ ଶ୍ରୀ ଅଶ୍ୱିନୀ କୁମାର ମେହେର, ଡ଼ିଏସଡବ୍ଲୁଓ ଅନୁପମା ପଣ୍ଡା, ଡିବ୍ଲୁଓ ଅଚ୍ୟୁତାନନ୍ଦ ସିଂ, ଜିଲ୍ଲା ଜନସ୍ୱାସ୍ଥ୍ୟ ଅଧିକାରୀ ଡା ମନୋଜ କୁମାର ଅଦାବାର, ଅତିରିକ୍ତ ଜିଲ୍ଲା ଜନସ୍ୱାସ୍ଥ୍ୟ ଅଧିକାରୀ ପରିବାର କଲ୍ୟାଣ ଡ଼ା. ଦୈତ୍ୟ ନାରାୟଣ ପାଢ଼ୀ, ଅତିରିକ୍ତ ଜିଲ୍ଲା ଜନସ୍ୱାସ୍ଥ୍ୟ ଅଧିକାରୀ ରୋଗ ନିୟନ୍ତ୍ରଣ ଡ଼ା. ରମେଶ ଚନ୍ଦ୍ର ସ୍ୱାଇଁ, ବ୍ଲଡ଼ ବ୍ୟାଙ୍କ ଅଧିକାରୀ ଡ଼ା. ମାନସ ଦାସ, ADWO ସଂଯୁକ୍ତା ମାଝି ଓ ଜିଲ୍ଲା ପ୍ରୋଗ୍ରାମ ମ୍ୟାନେଜର ବିଶ୍ୱମ୍ବର ବେହେରା ପ୍ରମୁଖ ମଞ୍ଚାସିନ ଥିଲେ I ଜିଲ୍ଲା ଅତିରିକ୍ତ ଜନସ୍ୱାସ୍ଥ୍ୟ ଯୋଗାଯୋଗ ଅଧିକାରୀ ବୃନ୍ଦାବନ ସାହୁ ଙ୍କ ସଂଯୋଜନା ରେ  ଅନୁଷ୍ଠିତ ଏହି ସଭାରେ ସଚେତନତା ସୃଷ୍ଟି କରି କେନ୍ଦ୍ରୀୟ ବଜେଟ ୨୦୨୩ ରେ ୨୦୪୭ ସୁଦ୍ଧା ଭାରତକୁ ସିକିଲ ସେଲ ଏନିମିଆ ରୁ ମୁକ୍ତ କରିବା ପାଇଁ ଲକ୍ଷ ରଖାଯାଇଛି ବୋଲି ଅତିଥି ମାନେ ମତ ପ୍ରକାଶ କରିଥିଲେ I  ସିକିଲ ସେଲ ରୋଗ ଏକ ବଂଶଗତ ରୋଗ ଯାହାଦ୍ୱାରା ରକ୍ତରେ ହିମୋଗ୍ଲୋବିନ ତିଆରି କରୁଥିବା ଜିନ ତ୍ରୁଟିପୂର୍ଣ୍ଣ ହୋଇଥାଏ I ସାଧାରଣ ରକ୍ତ କଣିକା ତୁଳନାରେ ସିକିଲ ସେଲ କଣିକା ଗୁଡିକର ଆୟୁ କମ ରହୁଥିବାରୁ ଶରୀରରେ ରକ୍ତହୀନତା ସ୍ଥିତି ଉତ୍ପନ୍ନ ହୋଇଥାଏ I ଉଭୟ ମାତାପିତାଙ୍କ ମଧ୍ୟରୁ ଯଦି ଜଣଙ୍କ ପାଖରେ ତ୍ରୁଟିଯୁକ୍ତ ଜିନ ରହିଥାଏ, ତେବେ ସନ୍ତାନ ସନ୍ତତି ମଧ୍ୟ ସିକିଲ ସେଲ ରୋଗ ଦ୍ୱାରା ସଂକ୍ରମିତ ହୋଇଥାନ୍ତି I ତେଣୁ ସମସ୍ତେ ପରୀକ୍ଷଣ କରି ନିଜର ସିକିଲ ସେଲ ସ୍ଥିତି ଜାଣିପାରି ସଂକ୍ରମଣ ର ବ୍ୟବଧାନ କୁ ଦୂର କରି ଏକ ସୁସ୍ଥ ସୁନ୍ଦର ସମାଜ ଗଠନରେ ସହାୟକ ହୋଇ ପାରିବ I 
   ଉକ୍ତ ସଭାରେ ଅଙ୍ଗନବାଡି କର୍ମୀ, ଆଶା, ANMTC ଛାତ୍ରୀ, ସ୍କୁଲ ଶିକ୍ଷକ, ଏସ ଏଚ ଜି ମେମ୍ବର, ସ୍ୱାସ୍ଥ୍ୟ ଅଧିକାରୀ ଓ ସାମ୍ବାଦିକ ପ୍ରମୁଖ ଉପସ୍ଥିତ ଥିଲେ I ଅତିଥି ମାନଙ୍କ ଦ୍ୱାରା ସିକିଲ ସେଲ କାର୍ଡ ବଣ୍ଟନ କାର୍ଯ୍ୟକ୍ରମ କରାଯାଇଥିଲା I ଶେଷରେ ଜିଲ୍ଲା ଆଶା ସାଂଯୋଜକ ତରଣୀସେନ ପ୍ରଧାନ ଧନ୍ୟବାଦ ଅର୍ପଣ କରିଥିଲେ  I