-+91-9937148622 |
prerana_bgr@rediffmail.com |
Monday 13th May 2024 |
R.N.I. Regd No. ODIODI/2010/46693
Breaking News
28-Apr-2024
ବଲାଙ୍ଗିର / ଆଜି ଏପ୍ରିଲ ୨୮ ତାରିଖ ଉତ୍କଳ ଗୌରବ ମଧୁସୂଦନ ଦାସଙ୍କ ଜନ୍ମ ଦିବସକୁ ସାରା ରାଜ୍ୟରେ ଓକିଲ ଦିବସ(ଲୟରସ୍ ଡେ’) ଭାବରେ ପାଳନ କରାଯାଉଛି । ଏହି ପରିପ୍ରେକ୍ଷୀରେ ବଲାଙ୍ଗୀର ଜିଲ୍ଲା ଓକିଲ ସଂଘ ତରଫରୁ ସ୍ଥାନୀୟ ସିଭିଲ କୋର୍ଟ ଠାରେ ଲୟରସ ଡେ’ ପାଳନ କରାଯାଇଥିଲା । ପ୍ରଥମେ ମଧୁସୂଦନ ଦାସଙ୍କ ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ କରାଯାଇଥିଲା । ସଂଘର ସଭାପତି ଅମରେଶ ତ୍ରିପାଠଙ୍କ ଆବାହକତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସଂଘର ସଂପାଦକ ପ୍ରମୋଦ ବହିଦାର ଓ ଅନ୍ୟ ମାନେ
ଉପସ୍ଥିତ ରହି ଜଣେ ସଫଳ ଆଇନଜୀବୀ, ସ୍ଵାଧୀନଚେତା ସ୍ୱାଭିମାନୀ ମଣିଷ ତଥା ସ୍ୱତନ୍ତ୍ର ଉତ୍କଳ ପ୍ରଦେଶ ଗଠନରେ ମୁଖ୍ୟ ଭୂମିକା ରହିଥିବା ମଧୁସୂଦନ ଦାସଙ୍କ ଜୀବନର ବିଭିନ୍ନ୍ ଦିଗ ଉପରେ ଆଲୋକପାତ କରିଥିଲେ । ପରେ ସ୍ଥାନୀୟ ଭାଗବତୀ ମନ୍ଦିର ପରିସରରେ ଜିଲ୍ଲା ଓକିଲ ସଂଘ ତରଫରୁ ଅନୁଷ୍ଠିତ ଏକ ବନ୍ଧୁ ମିଳନ କାର୍ଯ୍ୟକ୍ରମରେ ଆମନ୍ତ୍ରିତ ଅତିଥି ଭାବରେ ବଲାଙ୍ଗୀରର ବିଜେଡି ବିଧାୟକ ପ୍ରାର୍ଥୀ କଳିକେଶ ନାରାୟଣ ସିଂଦେଓ ଯୋଗ ଦେଇ ଲୟରସ ଡେ’ ଅବସରରେ ସମସ୍ତ ଓକିଲ ଭାଇ ଭଉଣୀଙ୍କୁ ଅଭିନନ୍ଦନ ଜ୍ଞାପନ କରିବା ସହ ବଲାଙ୍ଗୀରକୁ ଏକ ବିକଶିତ ତଥା ଯୋଜନାବଦ୍ଧ ସହର କରି ଗଢ଼ି ତୋଳିବାରେ ସମସ୍ତଙ୍କ ସହଯୋଗ କାମନା କରିଥିଲେ । ଆଗକୁ ବଲାଙ୍ଗୀରରେ ଇଂଜିନିୟରିଂ, ମେଡିକାଲ, ଆଇଏଏସ୍ ପରୀକ୍ଷା ଓ ଜୁଡିସିଆଲ ପରୀକ୍ଷା ପାଇଁ ପ୍ରସ୍ତୁତ ହେଉଥିବା ଶିକ୍ଷାର୍ଥୀ ମାନଙ୍କ ପାଇଁ ଏକ ରାଜ୍ୟସ୍ତରୀୟ ଇନ୍ଷ୍ଟିଚ୍ୟୁଟ୍ ଖୋଲାଯିବାକୁ ପ୍ରତିଶୃତି ଦେଇଥିଲେ । ବିଗତ ୧୦ ବର୍ଷ ଭିତରେ ବଲାଙ୍ଗୀରରେ କୌଣସି ଆଖିଦୃଶିଆ ବିକାଶ ହୋଇପାରି ନାହିଁ । ବିରୋଧୀ ଦଳ ମାନେ କେବଳ ନିଜର ପରିବାରକୁ ଠିକା ବାଂଟିବା, ଚେକ୍ ଡେମ ନିର୍ମାଣ କରିବା ଆଦି କାମରେ ୧ଠ ବର୍ଷ ବିତାଇ ଦେଇଛନ୍ତି । ମେଡିକାଲ କଲେଜର କଥା ହେଉ କି ଲୋୟର ସୁକତେଲ ପ୍ରକଳ୍ପ କି ବଲାଙ୍ଗୀର ବସ ଟର୍ମିନାଲ, ଜିଲ୍ଲାର ବିବିଧ ବିକଶନ୍ନୋମୁଖୀ ପ୍ରକଳ୍ପ ବିଜେଡି ସରକାରର ଦୃଢ଼ ନେତୃତ୍ୱ ଯୋଗୁଁ ସଫଳ ହୋଇ ପାରିଛି ବୋଲି ଶ୍ରୀ ସିଂଦେଓ କହିଥିଲେ । ଆମେ କଥାରେ ନୁହେଁ କାମ କରି ଦେଖାଉଁ ବୋଲି ଶ୍ରୀ ସିଂଦେଓ କହିଥିଲେ । ବଲାଙ୍ଗୀରର ତୁଷୁରା ଠାରେ ଏକ ଅତ୍ୟାଧୁନିକ ଏୟାରପୋର୍ଟ ନିର୍ମାଣ କାର୍ଯ୍ୟକୁ ସଂପୂର୍ଣ୍ଣ କରାଯିବା ଉପରେ ଶ୍ରୀ ସିଂଦେଓ ଗୁରୁତ୍ୱ ଦେଇଥିଲେ । ଅନ୍ୟ ମାନଙ୍କ ମଧ୍ୟରେ ବରିଷ୍ଠ ଆଇନଜୀବୀ ଅଶୋକ ମହାନ୍ତି ଓ ଜିଲ୍ଲା ଓକିଲ ସଂଘର ସଭାପତି ଅମରେଶ ତ୍ରିପାଠୀ ନିଜ ଅଭିଭାଷଣରେ
ବଲାଙ୍ଗୀର ବାର୍ ଏସୋସିଏସନ୍ର ଭିତ୍ତିଭୂମିର ବିକାଶ ଦିଗରେ କଳିକେଶଙ୍କ ପିତା ତଥା ପୂର୍ବତନ ମନ୍ତ୍ରୀ ଅନଙ୍ଗ ଉଦୟ ସିଂଦେଓଙ୍କ ଅବଦାନ ଓ ବଳିଷ୍ଠ ପଦକ୍ଷେପକୁ ପ୍ରଶଂସା କରିଥିଲେ । ଏହି ସଭାରେ ଜିଲ୍ଲା ଓକିଲ ସଂଘର ବହୁ ସଭ୍ୟ ସଭ୍ୟା ଯୋଗ ଦେଇଥିଲେ ।
ସେହିପରି ବଲାଙ୍ଗୀର ଯୁଧିଷ୍ଟିର ଆଇନ ମହାବିଦ୍ୟାଳୟ ଠାରେ ମଧ୍ୟ ଆଇନ ଛାତ୍ରଛାତ୍ରୀ ମାନଙ୍କ ତରଫରୁ ଲୟରସ ଡେ’ ପାଳିତ ହୋଇଯାଇଛି । ମଧୁସୂଦନ ଦାସଙ୍କ ଚିନ୍ତା, ଚେତନା, ଓଡ଼ିଆ ଅସ୍ମିତା କୁ ଏକ ବୃହତ୍ତର ଦୃଷ୍ଟିକୋଣରେ ଦେଖିବାର ଆବଶ୍ୟକତା ରହିଛି । ମଧୁସୂଦନଙ୍କ ଏକ ସଫଳ ଦାୟାଦ ଭାବେ ଆମେ ତାଙ୍କର ଆଦର୍ଶ କୁ ଅନୁସରଣ କରିବାର ସମୟ ଆସିଛି ବୋଲି ମତପ୍ରକାଶ ପାଇଥିଲା l