12-Oct-2026

ଲୋଇସିଂହା ବ୍ଲକ ଅନ୍ତର୍ଗତ ଅଏଲାଁସାରୀସ୍ଥିତ ମାଁ ସାଉଁତେଶ୍ୱରୀ ମୂଳପୀଠଠାରେ ଗତକାଲି ମହାଳୟା ଅମାବାସ୍ୟା ତିଥିରେ ମାଁଙ୍କ ଛତର ଯାତ୍ରା ଅନୁଷ୍ଠିତ ହୋଇଥିଲା। ନୀତି ପରମ୍ପରା ଅନୁସାରେ ମାଁ ସାଉଁତେଶ୍ୱରୀ ଦେବୀ ବୁଢ଼ାରଜା ମନ୍ଦିରକୁ ଯାଇଥିଲେ। ମାଁ ବାଉତୀଙ୍କ ଛତ୍ର ଓ ବରୁଆ ଦେହରେ ବେଲ ଆସି ପହଞ୍ଚିଥିଲେ। ପୀଠାସୀନ ଭୈରବ ବୁଢ଼ାରଜା ନରିହା ବୁଢ଼ା, ଡଙ୍ଗରବୁଢ଼ା ତଥା ଅନ୍ୟାନ୍ୟ ଦେବାଦେବୀ ପୀଠରେ ପୂଜାର୍ଚ୍ଚନା ହେବା ପରେ ପରେ ଚେରେଙ୍ଗାବାହାଲି, କଦଳୀପାଲି, କୁମେରବାହାଲି, ନୂଆଁଡୁଙ୍ଗୁରିପାଲି ଓ ଅଏଲାଁସାରୀ ଗ୍ରାମକୁ ଯାଇ ମାଁ ସାଉଁତେଶ୍ୱରୀ ଦେବୀଙ୍କ ଛତର ପରିକ୍ରମା କରିଥିଲେ। ଘଣ୍ଟଘଣ୍ଟା, ହରିବୋଲ, ହୁଳହୁଳି ଓ ଦୁଲଦୁଲି ବାଦ୍ୟର ପ୍ରତିଧ୍ୱନିରେ ଗଗନପବନ ପ୍ରକମ୍ପିତ ହୋଇଉଠିଥିଲା। ଏହି ଦିନ ପ୍ରଥମ କରି ସାଉଁତେଶ୍ୱରୀ ମହୋତ୍ସବ ଉଦ୍‌ଘାଟିତ ହୋଇଥିଲା। ହଜାର ହଜାର ଭକ୍ତଙ୍କର ସମାଗମ ହୋଇଥିଲା। ଉକ୍ତ ମହୋତ୍ସବକୁ ମୁଖ୍ୟ ଅତିଥି ମାନ୍ୟବର ସ୍ୱାସ୍ଥ୍ୟମନ୍ତ୍ରୀ ଡଃ ମୁକେଶ ମହାଲିଙ୍ଗ ଉଦ୍‌ଘାଟନ କରି ନିଜ ବକ୍ତବ୍ୟରେ ମାଁଙ୍କ ମଣ୍ଡପ ଓ ଭବ୍ୟ ମନ୍ଦିରର ପୁନରୁଦ୍ଧାର ସକାଶେ ୧୦ ଲକ୍ଷ ଟଙ୍କା ଆର୍ଥିକ ସହାୟତା ଦେବା ପାଇଁ ପ୍ରତିଶ୍ରୁତି ଦେଇଥିଲେ। ଏଥିସହ ଗ୍ରାମର ତିନି ଜଣ ଭୂମିହୀନଙ୍କୁ ଡି.୦.୦୪ ଡିସିମିଲ ଲେଖାଏଁ ପଟ୍ଟା ବଣ୍ଟନ କରିଥିଲେ। ସମ୍ମାନିତ ଅତିଥି ଭାବରେ ବଲାଙ୍ଗୀର ଜିଲ୍ଲା ଦେବାଳୟ ଓ ଐତିହ୍ୟ ସୁରକ୍ଷା କମିଟିର ସଭାପତି ଜୟକୃଷ୍ଣ ମିଶ୍ର ଯୋଗ ଦେଇଥିଲେ। ଶ୍ରୀ ମିଶ୍ର ଗ୍ରାମାଞ୍ଚଳରେ ଥିବା ଗ୍ରାମଦେବାଦେବୀଙ୍କ ପୀଠର ପୁନରୁଦ୍ଧାର ସକାଶେ ଗ୍ରାମବାସୀଙ୍କ ଉଦ୍ୟମକୁ ଭୂୟସୀ ପ୍ରଶଂସା କରିଥିଲେ ଏବଂ ପ୍ରତିବର୍ଷ ସରକାରୀ ସହାୟତାରେ କିପରି ମହୋତ୍ସବ ଆୟୋଜନ କରାଯାଇପାରିବ, ସେଥିପାଇଁ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ। ବରେଣ୍ୟ ଅତିଥି ତହସିଲଦାର ଅଶୋକ କୁମାର ମିଶ୍ର, ବିଶ୍ୱଜିତ କୁମାର ନାଥ, ସରପଞ୍ଚ ଶ୍ରୀମତୀ ମଦନା ବେହେରା, ସମିତି ସଭ୍ୟା ଶ୍ରୀମତୀ ସସ୍ମିତା ସାହୁ, ସଭାପତି ଲାଲମନ ବେହେରା, ସମ୍ପାଦକ ସୁବାସ ଚନ୍ଦ୍ର ବିଶ୍ୱାଳ, କୋଷାଧ୍ୟକ୍ଷ ଉମେଶ ପଧାନ ମଞ୍ଚାସୀନ ଥିଲେ। ସଂସ୍କୃତି ଗବେଷକ ଶ୍ରୀ ଉକାଳୁ ସା ମଞ୍ଚ ପରିଚାଳନା କରିଥିଲେ। ସାଂସ୍କୃତିକ

କାର୍ଯ୍ୟକ୍ରମରେ କୁମେରବାହାଲି, ବଲାଙ୍ଗୀର ଆଦର୍ଶପଡ଼ା, ଅଏଲାଁସାରୀ ଗ୍ରାମର ୫ଟି କୀର୍ତ୍ତନ୍ୟ ଦଳ ଓ ଲେଥିପାଲି ଏବଂ ଐଁଲାସାରୀ ସରକାରୀ ଉନ୍ନୀତ ବିଦ୍ୟାଳୟର ଛାତ୍ରଛାତ୍ରୀମାନେ ନିଜ ନିଜର ପାରମ୍ପରିକ କଳା ପ୍ରଦର୍ଶନ କରିଥିଲେ। ଜୟମନ ବେହେରା, ରାଜେନ୍ଦ୍ର ସା, ପୂଜାକାର୍ଯ୍ୟ ତୁଲାଇଥିଲେ। ଗୁଣନିଧି ଚନ୍ଦନ, ଅନାଦି କାଲସାଏ, ପବିତ୍ର ସା, ବାବୁଲାଲ ବାଗ, ଶଙ୍କର ଚନ୍ଦନ, ପ୍ରମୋଦ ବେହେରା, ଢେକାଲୁ ସା, ସଦାନନ୍ଦ ଦୀପ, ଇନ୍ଦ୍ର ସା ପ୍ରମୁଖ ଆୟୋଜନରେ ସହଯୋଗ କରିଥିଲେ। ଆସନ୍ତା ୧୯ ତାରିଖରେ ଏହି ମହୋତ୍ସବ ଉଦ୍‌ଯାପିତ ହେବ।