09-Oct-2026

ବରପାଲି (ସୁଦାମ ଦୀପ )
 ବିଜେପୁର ବ୍ଲକ ସରପଞ୍ଚ ସଂଘର ସଭାପତି ତଥା ଯୋଖିପାଲି ଗ୍ରାମ ପଞ୍ଚାୟତର ସରପଞ୍ଚ ସବିତା ସାହୁଙ୍କ ବିରୋଧରେ ବିଜେପୁର ଥାନାରେ ମାମଲା ରୁଜୁ ହୋଇଛି। ବିଜେପୁର ବିଡିଓ ସରୋଜ କୁମାର ବିଶ୍ୱାଳଙ୍କ ଲିଖିତ ଅଭିଯୋଗ ଆଧାରରେ ପୁଲିସ ବିଏନଏସ୍‌ର ୨୨୧, ୨୯୬ ଓ ୩୫୧(୨) ଧାରାରେ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଜଣାପଡ଼ିଛି।ଅଭିଯୋଗ ଅନୁସାରେ, ଗତ ୫ ତାରିଖରେ ବିଜେପୁର ବ୍ଲକ କାର୍ଯ୍ୟାଳୟରେ ଯୋଖିପାଲି ଗ୍ରାମ ପଞ୍ଚାୟତ ସମ୍ପର୍କିତ ଏକ ଆଲୋଚନା ଚାଲିଥିଲା। ଏହି ସମୟରେ ସରପଞ୍ଚ ସବିତା ସାହୁ ଉତ୍ତେଜିତ ହୋଇ ପାଟି କରିବା ସହ କାର୍ଯ୍ୟାଳୟରେ ଥିବା କାଗଜପତ୍ର ଫିଙ୍ଗି ଦେଇଥିବା ବିଡିଓ ତାଙ୍କ ଅଭିଯୋଗରେ ଦର୍ଶାଇଥିବା ଜଣାପଡ଼ିଛି। ଆଲୋଚନା ସମୟରେ ସହକାରୀ ନିର୍ବାହୀ ଯନ୍ତ୍ରୀ, ନିର୍ବାହୀ ଯନ୍ତ୍ରୀଙ୍କ ସମେତ ଅନ୍ୟାନ୍ୟ ଯନ୍ତ୍ରୀ ଉପସ୍ଥିତ ଥିବା ଜଣାପଡ଼ିଛି।ଘଟଣା ପରେ ବିଡିଓ ବିଜେପୁର ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୁଲିସ ମାମଲା ରୁଜୁ କରି ଘଟଣାର ବିଭିନ୍ନ ପାର୍ଶ୍ୱ ନେଇ ତଦନ୍ତ କରୁଥିବା ସୂଚନା ମିଳିଛି।
ଅନ୍ୟପଟେ, ସରପଞ୍ଚ ସବିତା ସାହୁଙ୍କ ନାମରେ ପୂର୍ବରୁ ମଧ୍ୟ କିଛି ମାମଲା ଥିବା ନେଇ ଅଞ୍ଚଳରେ ଚର୍ଚ୍ଚା ହେଉଛି। ତେବେ ପୂର୍ବରୁ ଥିବା ମାମଲାଗୁଡ଼ିକର ପ୍ରକୃତ ସ୍ଥିତି କ’ଣ ଏବଂ ସେଗୁଡ଼ିକରେ କୋର୍ଟରେ କୌଣସି ରାୟ ହୋଇଛି କି ନାହିଁ, ତାହା ଅଲଗା ବିଷୟ। ଏହି କାରଣରୁ ମାତ୍ର ତାଙ୍କୁ ଦୋଷୀ ବୋଲି କହିବା ଆଇନସମ୍ମତ ନୁହେଁ।ତଥାପି ଜଣେ ଜନପ୍ରତିନିଧିଙ୍କ ନାମ ବାରମ୍ବାର ବିବାଦ ଓ ମାମଲାରେ ଆସିବାକୁ ନେଇ ପ୍ରଶ୍ନ ଉଠିବା ସ୍ୱାଭାବିକ। ବ୍ଲକ ପ୍ରଶାସନ ସହ କୌଣସି ମତଭେଦ, ପଞ୍ଚାୟତ କାର୍ଯ୍ୟକୁ ନେଇ ବିବାଦ, ନା ପଦବୀକୁ ନେଇ କୌଣସି ଚାପ ବା ସ୍ୱାର୍ଥ କେଉଁ କାରଣରୁ ଏଭଳି ପରିସ୍ଥିତି ସୃଷ୍ଟି ହେଉଛି, ତାହା ତଦନ୍ତ ପରେ ସ୍ପଷ୍ଟ ହେବ।ବର୍ତ୍ତମାନ ମାମଲାରେ ପୁଲିସର ତଦନ୍ତ ଓ ପରବର୍ତ୍ତୀ ଆଇନଗତ ପଦକ୍ଷେପ ଉପରେ ସମସ୍ତଙ୍କ ନଜର ରହିଛି। ଏହି ଘଟଣାକୁ ନେଇ ସରପଞ୍ଚ ସବିତା ସାହୁଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ l