05-Oct-2026

ବରପାଲି : (ସୁଦାମ ଦୀପ)ବରଗଡ଼ ଜିଲ୍ଲା ବରପାଲି ବ୍ଲକ ଅନ୍ତର୍ଗତ ଲୋକକଳା, ସଂସ୍କୃତି ଓ ପରମ୍ପରାରେ ସମୃଦ୍ଧ ତଥା ମନ୍ଦିରମାଳିନୀ ଓ ପ୍ରଜାବହୁଳ ଗ୍ରାମ କୁମ୍ଭାରୀରେ ମା’ କରମସାନି ପୂଜା ମହୋତ୍ସବ ଧୂମଧାମରେ ପାଳିତ ହୋଇଯାଇଛି। ପାରମ୍ପରିକ ରୀତିନୀତି ଓ ଭକ୍ତିଭାବର ସହିତ ଅନୁଷ୍ଠିତ ଏହି ପୂଜା ମହୋତ୍ସବକୁ ନେଇ ଗ୍ରାମରେ ଦିନତମାମ ଉତ୍ସବମୁଖର ପରିବେଶ ସୃଷ୍ଟି ହୋଇଥିଲା।ପୂଜା ଅବସରରେ ଶ୍ରଦ୍ଧାଳୁମାନେ ମା’ କରମସାନିଙ୍କ ନିକଟରେ ପୂଜାର୍ଚ୍ଚନା କରିବା ସହ ଗ୍ରାମର ସୁଖ, ଶାନ୍ତି ଓ ସମୃଦ୍ଧି କାମନା କରିଥିଲେ। ପୂଜାରେ କର୍ତ୍ତା ଭାବେ ଉତ୍ତମ ବେହେରା ଦାୟିତ୍ୱ ତୁଲାଇଥିଲେ। ଏହି ଅବସରରେ କରୁଣା ବେହେରା ମା’ କରମସାନିଙ୍କ ମହିମା ଓ ପୂଜା ସହ ଜଡ଼ିତ ପାରମ୍ପରିକ କାହାଣୀ ବର୍ଣ୍ଣନା କରି ଉପସ୍ଥିତ ଭକ୍ତମାନଙ୍କୁ ଭକ୍ତିରସରେ ଆପ୍ଲୁତ କରିଥିଲେ।ମହୋତ୍ସବର ମୁଖ୍ୟ ଆକର୍ଷଣ ଥିଲା ରାତ୍ରିକାଳୀନ ପାରମ୍ପରିକ ଗୀତ ଓ ସଙ୍ଗୀତ କାର୍ଯ୍ୟକ୍ରମ। ସଲେପାଲି ଓ ଖଳିଆପାଲି ଅଞ୍ଚଳର ମହିଳା ଗାୟିକାମାନେ ଯୋଗଦେଇ ମା’ କରମସାନିଙ୍କ ମହିମା ଓ ଲୋକପରମ୍ପରା ଉପରେ ଆଧାରିତ ଗୀତ ପରିବେଷଣ କରିଥିଲେ। ସେହିପରି ଇଂସାର ଅଞ୍ଚଳର ପୁରୁଷ ଗାୟକ ଓ ବାହକମାନେ ମଧ୍ୟ ଯୋଗଦେଇ ପାରମ୍ପରିକ ଗୀତ ଓ ବାଦ୍ୟ ପରିବେଷଣ କରିଥିଲେ।
‘ଜୁହାର ମାଗୋ କରମସାନି, ଅପୁତ୍ରିକକେ ପୁତ୍ର ଦାନି’ ଭଳି ଭକ୍ତିପୂର୍ଣ୍ଣ ଗୀତରେ ସମଗ୍ର ପରିବେଶ ମୁଖରିତ ହୋଇଉଠିଥିଲା। ଗୀତ ଓ ବାଦ୍ୟର ତାଳେ ତାଳେ ଭକ୍ତମାନେ ମା’ଙ୍କ ଆଶୀର୍ବାଦ କାମନା କରିଥିଲେ। ପାରମ୍ପରିକ ଲୋକକଳା ଓ ଧାର୍ମିକ ଆସ୍ଥାର ଏହି ସମନ୍ୱୟ ମହୋତ୍ସବକୁ ଆହୁରି ଆକର୍ଷଣୀୟ କରିଥିଲା।ଏହି ପୂଜା ମହୋତ୍ସବରେ କୁମ୍ଭାରୀ ସମେତ ଆଖପାଖ ଅଞ୍ଚଳର ବହୁ ଶ୍ରଦ୍ଧାଳୁ, ମହିଳା, ଯୁବକ ଓ ଗ୍ରାମବାସୀ ଯୋଗଦେଇଥିଲେ। ଗ୍ରାମବାସୀଙ୍କ ସହଯୋଗ ଓ ଉତ୍ସାହରେ ପୂଜା ମହୋତ୍ସବ ସଫଳତାର ସହ ସମ୍ପନ୍ନ ହୋଇଥିବା ଜଣାପଡ଼ିଛି। ଏଭଳି ପାରମ୍ପରିକ ପୂଜା ଓ ଲୋକକଳାର ସୁରକ୍ଷା ଆଗାମୀ ପିଢ଼ିକୁ ନିଜ ସଂସ୍କୃତି ଓ ପରମ୍ପରା ସହ ଯୋଡ଼ି ରଖିବାରେ ସହାୟକ ହେବ ବୋଲି ଗ୍ରାମବାସୀ ମତ ପ୍ରକାଶ କରିଛନ୍ତି।