25-Jul-2026

କଟକ, ତା ୨୫.୭.୨୬-(ତପନ ମହାନ୍ତି ସାମ୍ବାଦିକ) ଦେଶବ୍ୟାପୀ ଶକ୍ତିଶାଳୀ ଆନ୍ଦୋଳନ ଚାପରେ  ସରକାର ମୁଣ୍ଡ ନୁଆଁଇବା ସହ ଶିକ୍ଷାମନ୍ତ୍ରୀଙ୍କୁ ଇସ୍ତଫା ଦେବାକୁ ବାଧ୍ୟ ହୋଇଛନ୍ତି। ଗଣତାନ୍ତ୍ରିକ ଆନ୍ଦୋଳନର ଏହି ବିଜୟରେ ଏଆଇଡିଏସଓ ପକ୍ଷରୁ ଛାତ୍ର ଓ ଯୁବପିଢ଼ି ଏବଂ ବୃହତ୍ତର ଜନସାଧାରଣଙ୍କୁ ହୃଦୟଭରା ଅଭିନନ୍ଦନ ଜ୍ଞାପନ କରାଯାଇଛି। ଏହି ଅବସରରେ ସଂଗଠନର କଟକ ଜିଲ୍ଲା କମିଟି ପକ୍ଷରୁ ରେଭେନ୍ସା ବିଶ୍ୱବିଦ୍ୟାଳୟ ସମ୍ମୁଖରେ ଏକ ବିଜୟ ସଭା ଅନୁଷ୍ଠିତ  ହୋଇଯାଇଛି। ଏହି ସଭାରେ ଏଆଇଡିଏସଓ ରାଜ୍ୟ ପରିଷଦର ଉପସଭାପତି ଭଗ୍ୟରବି ଦାସ,  ସମ୍ପାଦକମଣ୍ଡଳୀ ସଦସ୍ୟ ବିନୋଦ ସେଠୀ, ସଂଗଠନର କଟକ ଜିଲ୍ଲା କମିଟି ସଭାପତି ଇଶା ଧର, ଉପ-ସଭାପତି ଶିବାନୀ ସାହୁ, ସମ୍ପାଦକ ତରୁଣସେନ ନାୟକ, ସମ୍ପାଦକ ମଣ୍ଡଳୀ ସଦସ୍ୟ ଜ୍ୟୋସ୍ନାରାଣୀ ଦାସ, ସରୋଜ ମାନସିଂହ, ଜିଲ୍ଲା କମିଟି ସଭ୍ୟ ସତ୍ୟବ୍ରତ ମୁଦୁଲି, ଗାୟତ୍ରୀ ସାହୁ, ସରୋଜ ବେହେରା, ରାଜେଶ ନାୟକ ପ୍ରମୁଖ  ପ୍ରମୁଖ ଉପସ୍ଥିତ ଥିଲେ।ଏହି ସଭାରେ ଛାତ୍ରନେତାମାନେ କହିଥିଲେ ଯେ, ଏହି ବିଜୟ ପୁଣି ଥରେ ପ୍ରମାଣିତ କରିଛି ଯେ ଯେତେବେଳେ ଛାତ୍ର ଏବଂ ଯୁବପିଢ଼ି ନିଜ ନିଷ୍ପତ୍ତିରେ ଅଚଳ ଅଟଳ ରହି ମଥା ଉନ୍ନତ କରି ଲଢ଼ି ଥାଆନ୍ତି, ସେତେବେଳେ କୌଣସି ସ୍ୱେଚ୍ଛାଚାରୀ ଶକ୍ତି ଅଟଳ ତିଷ୍ଠି ରହିପାରିବ ନାହିଁ। 
ସରକାରଙ୍କ ଅପରାଧୀମୂଳକ ଉଦାସୀନତା ପାଇଁ ନିଜକୁ ଦାୟୀ କରିବା ପରିବର୍ତ୍ତେ, ମନ୍ତ୍ରୀ ତାଙ୍କ ଇସ୍ତଫା ବିବୃତ୍ତିରେ ପ୍ରତିବାଦକାରୀମାନଙ୍କୁ ଦେଶ ବିରୋଧୀଙ୍କ ଦ୍ୱାରା ପରିଚାଳିତ ବୋଲି ଆଖ୍ୟା ଦେବାକୁ ଏଆଇଡିଏସଓ ପକ୍ଷରୁ ଦୃଢ଼ ନିନ୍ଦା କରାଯାଇଛି। ଏଆଇଡିଏସଓ ଗଭୀର ଭାବରେ ଉପଲବ୍ଧି କରେ ଯେ,  ଛାତ୍ର ଓ ଯୁବ ସମାଜ ତଥା ସମଗ୍ର ଜନସାଧାରଣଙ୍କ ମଧ୍ୟରେ  ବର୍ଷ ବର୍ଷ ଧରି  ଥିବା ପୁଞ୍ଜିଭୂତ ଅସନ୍ତୋଷ ଓ ଅସହ୍ୟ ଯନ୍ତ୍ରଣାରୁ ମଧ୍ୟରୁ ଏହି ଆନ୍ଦୋଳନ ଜନ୍ମ ନେଇଛି। ସ୍ୱେଚ୍ଛାଚାରୀ ସରକାର କର୍ପୋରେଟ ହାଉସର ସ୍ୱାର୍ଥରେ ବିଭିନ୍ନ ନୀତି କାର୍ଯ୍ୟକାରୀ କରିବା ଫଳରେ ସରକାରୀ ଶିକ୍ଷା ଆଜି  ସମ୍ପୂର୍ଣ ଧ୍ଵଂସ୍ବମୁଖରେ ଓ ବେକାରୀ ସମସ୍ୟା ମଧ୍ୟ ଉତ୍କଟ ରୂପ ଧାରଣ କରିଛି। ଜୀବନର ସମସ୍ତ କ୍ଷେତ୍ରରେ ଚରମ ସାଂସ୍କୃତିକ ସଙ୍କଟ ସୃଷ୍ଟି ହୋଇଥିବା ବେଳେ ମାନବିକତା ଆଜି କ୍ଷତ ବିକ୍ଷତ ହୋଇଛି। ଏହି ସବୁ କାରଣ ପାଇଁ  ଜନସାଧାରଣ ଅସହ୍ୟ ଯନ୍ତ୍ରଣା ମଧ୍ୟରେ କାଳାତିପାତ କରୁଛନ୍ତି।ଏନଟିଏ(NTA)କୁ ସମ୍ପୂର୍ଣ୍ଣ ଉଚ୍ଛେଦ କରିବା, ଜାତୀୟ ଶିକ୍ଷାନୀତି ୨୦୨୦କୁ ବାତିଲ କରିବା ଦାବିରେ ଦେଶବ୍ୟାପୀ ଆନ୍ଦୋଳନ ଜାରି ରଖିବାକୁ ଏଆଇଡିଏସଓ ଦେଶର ଛାତ୍ର ଓ ଯୁବସମାଜକୁ ଆହ୍ୱାନ କରିଛି। ସମସ୍ତ ବାମ ଓ ଗଣତାନ୍ତ୍ରିକ ଶକ୍ତି  ବିଶେଷକରି ଆମ ଦେଶର ଛାତ୍ର ସଂଗଠନମାନେ ଐକ୍ୟବଦ୍ଧ ହୋଇ ଆନ୍ଦୋଳନକୁ ଆଗେଇ ନେବା ଏବଂ ସରକାରୀ ଶିକ୍ଷାକୁ ରକ୍ଷା କରିବା ପାଇଁ ଲଢ଼େଇକୁ ଶକ୍ତିଶାଳୀ କରିବାକୁ ଏଆଇଡିଏସଓ ପକ୍ଷରୁ ନିବେଦନ କରାଯାଇଛି।