09-Aug-2025

କାଲିମେଳା(ସନ୍ତୋଷ କୁମାର ପଣ୍ଡା): ମାଲକାନଗିରି ଜିଲ୍ଲା କାଲିମେଳା ବ୍ଲକ ଅନ୍ତର୍ଗତ ଏମଭି ୭୯ ଗ୍ରାମର ଅଶାନ୍ତ ମଣ୍ଡଲ, ଶେଜରୁ ଉଠି ପାରୁନାହାନ୍ତି, ହେଲେ ପରିବାର ଲୋକଙ୍କ ସୁରକ୍ଷା ଲାଗି ବଞ୍ଚିବାର ଇଛା କରି ପକାଉଛି ଅସ୍ତବ୍ୟସ୍ତ। ଏଥିପାଇଁ ନିଜର ଜୀବନ ରକ୍ଷା ପାଇଁ କରୁଛନ୍ତି ଆକୁଳ ନିବେଦନ। ଅନ୍ୟପଟେ ଗୁରୁତର ଭାବେ କିଡନୀ ଜନିତ ରୋଗରେ ପୀଡ଼ିତ ହୋଇଥିବାରୁ ଶାରୀରିକ ଅକ୍ଷମତା କରିପକାଇଛି ଅସହାୟ। ଏଭଳି କରୁଣ ସ୍ଥିତି ମଧ୍ୟରେ ଅଶାନ୍ତଙ୍କ ବଞ୍ଚିବାର ଇଚ୍ଛାରେ ବାଧକ ସାଜିଛି ଅର୍ଥ। ତୁରନ୍ତ ଅପରେସନର ଆବଶ୍ୟକ ଥିବା ବେଳେ ଅର୍ଥ ଅଭାବରୁ ଶଯ୍ୟାଶାୟୀ ହୋଇ ଛଳଛଳ ଆଖିରେ ଯେପରି ବଞ୍ଚିବା ପାଇଁ କରୁଛନ୍ତି ଆକୁଳ ନିବେଦନ। ସୂଚନା ଅନୁଯାୟୀ ଅଶାନ୍ତ ମଣ୍ଡଲ ଗତ କିଛି ମାସ ଧରି ଅସୁସ୍ଥତା ଅନୁଭବ କରିବାରୁ ନିଜର

ସ୍ୱାସ୍ଥ୍ୟ ପରୀକ୍ଷା କରାଇଥିଲେ lଯାହାଫଳରେ ଗତ ପ୍ରାୟ ଚାରି ମାସ ପୂର୍ବେ ସେ ଗୁରୁତର କିଡ଼ନୀ ସମସ୍ୟା ଜନିତ ରୋଗରେ ପୀଡ଼ିତ ଥିବା ଜଣା ପଡିଥିଲା । ଏହି ରୋଗ ଚିହ୍ନଟ ପରେ ପ୍ରଥମେ ଆନ୍ଧ୍ରର ଭଦ୍ରାଚଲମ ଓ ପରେ ଗୁଣ୍ଟୁର ଠାରେ ଚିକିତ୍ସା କରାଇଥିଲେ। ତେବେ ଦିନକୁ ଦିନ ଅବସ୍ଥା ଗୁରୁତର ହେବା ସହ ଚିକିତ୍ସା ପାଇଁ ଆବଶ୍ୟକ ଅର୍ଥ ଯୋଗାଡ଼ କରିବାରେ ବିଫଳ ହୋଇ ନିରାଶ ଅବସ୍ଥାରେ ଘର କୁ ଫେରିଥିଲେ। ଦିନକୁ ଦିନ ଅବସ୍ଥା ଗୁରୁତର ହେବା ସହ ଅଶାନ୍ତ ଶଯ୍ୟାଶାୟୀ ହୋଇପଡିଥିଲେ। ଯାହାଫଳରେ ପୁରା ପରିବାର ଲୋକ ଦୁଃଖରେ ଭାଙ୍ଗି ପଡିବା ସହ ଅସହାୟ ଭାବେ ଆଜି ଗଣମାଧ୍ୟମ ଜରିଆରେ ଅଶାନ୍ତ ମଣ୍ଡଳ ଙ୍କ ଜୀବନ ରକ୍ଷା ଲାଗି କାନ୍ଦି କାନ୍ଦି ଆକୁଳ ନିବେଦନ କରିଛନ୍ତି lଅଶାନ୍ତଙ୍କ ୨ ଝିଅ ମଧ୍ୟରୁ ଗୋଟିଏ ଝିଅ ବିବାହ ହୋଇଯାଇଥିବା ବେଳେ ଅନ୍ୟଜଣେ ଝିଅ ଓ ଗୋଟିଏ ପୁଅ ସହ ବୃଦ୍ଧ ବାପା ଘରେ ରହିଥିବା ଜଣାପଡ଼ିଛି। ଅଶାନ୍ତଙ୍କ ଏଭଳି ଅବସ୍ଥା ପୁରା ପରିବାର ଉପରେ ଏକ ବଜ୍ର ପଡିବା ଭଳି ପରିସ୍ଥିତି ସ୍ରୁଷ୍ଟି କରିଛି। ଏ ବାବଦରେ ପଡିଆ ଗୋଷ୍ଠୀ ସ୍ବାସ୍ଥ୍ୟ ଅଧିକାରୀଙ୍କୁ ଯୋଗାଯୋଗ କରିବାରୁ ସେ ଘଟଣା ଏମଭି ୭୯ ସ୍ୱାସ୍ଥ୍ୟ ଅଧିକାରୀଙ୍କ ଜରିଆରେ ଏକ ସ୍ୱାସ୍ଥ୍ୟ ଟିମ୍ ପଠାଇ ଅଶାନ୍ତଙ୍କ ସ୍ୱାସ୍ଥ୍ୟ ଅବସ୍ଥା ପରଖିବେ ବୋଲି କହିଛନ୍ତି। ଅନ୍ୟପଟେ ଜିଲ୍ଲା ପ୍ରଶାସନ ପକ୍ଷରୁ ଅଶାନ୍ତ ଙ୍କ ଏଭଳି ଅବସ୍ଥାକୁ ଗୁରୁତର ଭାବେ ନେଇ ତୁରନ୍ତ ସହାୟତା ଯୋଗାଇ ଦେବା ସହ ମୃତ୍ୟୁ ମୁଖରୁ ଉଦ୍ଧାର କରିବା ଲାଗି ଅଞ୍ଚଳବାସୀ ଦାବୀ କରିଛନ୍ତି ।