25-May-2025

ଅମ୍ବାଭୋନା: (ପ୍ରକାଶ ଚନ୍ଦ୍ର ରଥ) ବରଗଡ ଜିଲ୍ଲା ଅମ୍ବାଭୋନା ବ୍ଲକ ଅଧୀନରେ ଥିବା ପଥ ପ୍ରାନ୍ତ ସୁବିଧା କେନ୍ଦ୍ର ରୁ ଶନିବାର ରାତ୍ରିରେ କିଛି ଦୁର୍ବୁତ୍ତ ମାନେ ବାଡ଼ ଡେଇଁ ମୂଲ୍ୟବାନ ସାମଗ୍ରୀ ଚୋରି କରି ଚମ୍ପଟ ମାରିଛନ୍ତି।ସୂଚନାଯୋଗ୍ୟ ଯେ ଏହି ସୁବିଧା କେନ୍ଦ୍ର ଟି ଓଡିଶା ସରକାରଙ୍କ ପୂର୍ତ୍ତ ବିଭାଗ ପକ୍ଷରୁ ୩୧.୦୭.୨୦୧୮ ମସିହାରେ ପୂର୍ବତନ ମନ୍ତ୍ରୀ ତଥା ପୂର୍ବତନ ଭଟଲି ବିଧାୟକ ସୁଶାନ୍ତ ସିଂ ,ପୂର୍ବତନ ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟ ଏବଂ ପୂର୍ବତନ  ବରଗଡ଼ ଲୋକସଭା ସାଂସଦ ପ୍ରଭାସ ସିଂ ଙ୍କ କରକମଳରେ ଲୋକାର୍ପିତ ହୋଇଥିଲା ।ଏହି ସଂସ୍ଥାର ରକ୍ଷଣାବେକ୍ଷଣ ପାଇଁ ଏକ ଘରୋଇ ସଂସ୍ଥା କୁ ଦାୟିତ୍ୱ ଦିଆଯାଇଥିଲା କିନ୍ତୁ ସରକାର ପରିବର୍ତ୍ତନ ପରେ ଏହାର ରକ୍ଷଣାବେକ୍ଷଣ ପାଇଁ ଅମ୍ବାଭୋନା ମହିଳା ସଶକ୍ତିକରଣ ଗୋଷ୍ଠୀ ସଦସ୍ୟା ମାନଙ୍କୁ ଦାୟିତ୍ୱ ଦିଆଯାଇଥିଲା ।କିଛିଦିନ ସେମାନେ ମଧ୍ୟ ଭଲବାବରେ ସଂସ୍ଥା କୁ ରକ୍ଷଣାବେକ୍ଷଣ କରିଥିଲେ କିନ୍ତୁ କିଛି ଆର୍ଥିକ ରୋଜଗାର ଲାଭ ନହେବାରୁ ସେମାନେ ଏହାକୁ ଅସ୍ଥାୟୀ ଭାବେ ବନ୍ଦ କରିଦେଇଛନ୍ତି ।ତେବେ ରକ୍ଷଣା ବେକ୍ଷଣ ଅଭାବ ରୁ
ବିଗତ କିଛି ମାସ ହେବ ଏହା ଜରାଜୀର୍ଣ ଅବସ୍ଥାରେ ପଡ଼ିରହିଛି। ଏଠାରେ ଥିବା ପାର୍କ ଏବଂ ଅନ୍ୟ ମୂଲ୍ୟବାନ ସାମଗ୍ରୀ ଗୁଡିକ ମଧ୍ୟ ନଷ୍ଟ ହେବାରେ ଲାଗିଛି ଏବଂ ଏହାର ପ୍ରଭାବରେ କିଛି ଦୁର୍ବୁତ୍ତ ଗତକାଲି ରାତିରେ ପଶି ଅନେକ ସାମଗ୍ରୀ ଚୋରି କରି ଚମ୍ପଟ ମାରିଛନ୍ତି ।ରାଜ୍ୟ ସରକାରଙ୍କ ପକ୍ଷରୁ ଏହି ସଂସ୍ଥାକୁ ଠିକ ଭାବରେ ପରିଚାଳନା ପାଇଁ ଆର୍ଥିକ ସହାୟତା ନ ଯୋଗେଇଦେଲେ ଆଉ କିଛି ଦିନ ମଧ୍ୟରେ ଏହା ସମ୍ପୂର୍ଣ୍ଣ ଭାବେ ନଷ୍ଟ ହେବା ସହ କୋଟି କୋଟି ଟଙ୍କାରେ ନିର୍ମାଣ ହୋଇଥିବା ଏହି ସଂସ୍ଥା ସଂପୂର୍ଣ୍ଣ ଭାବରେ ବିପର୍ଯ୍ୟୟ ହୋଇଯିବ ଏବଂ ଅସାମାଜିକ ଲୋକଙ୍କ ଆଡ୍ଡା ସ୍ଥଳି ପାଲଟିଯିବ ବୋଲି ବୁଦ୍ଧିଜୀବୀ ମହଳ ରେ ଚର୍ଚ୍ଚା ମଧ୍ୟ ଜୋର ଧରିଛି।