-+91-9937148622 |
prerana_bgr@rediffmail.com |
Tuesday 21st May 2024 |
R.N.I. Regd No. ODIODI/2010/46693
Breaking News
12-Feb-2022
ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀରରେ ଦିନକୁ ଦିନ ସହର ବଢିଚାଲିଥିବା ବେଳେ ଦୁର୍ଘଟଣା ମଧ୍ୟ ବଢିଚାଲିଛି । ସହର ଦେଇ ୨ଟି ଜାତୀୟ ରାଜପଥ ଯାଇଛି । ବହୁ ଦିନର ଦାବି ଓ ବହୁ ଆନ୍ଦୋଳନ ପରେ ବାଇପାସ ରାସ୍ତା ନିର୍ମାଣ ନେଇ ସରକାର ପଦକ୍ଷେପ ନେଇଛନ୍ତି । ଗତକାଲି ଫେବୃୟାରୀ ୧୧ରେ ଦିଲ୍ଲୀରେ ବସିଥିବା ଷ୍ଟାଣ୍ଡିଙ୍ଗ ଫାଇନାନ୍ସକମିଟି(ଏସଏଫସି)ରେ ଜାତୀୟରାଜପଥର ୧୧.୬୭କିମି ବାଇପାସ ରାସ୍ତାର୍ନିର୍ମାଣ କରିବାକୁ ଅନୁମୋଦନ କରି ୨୩୮.୭୮କୋଟି ଟଙ୍କାର ଅନୁଦାନକୁ ମଞ୍ଜୁର କରାଯାଇଛି । ଏଣିକି ବାଇପାସ ପାଇଁ ଏନଏଚଆଇ ପକ୍ଷରୁ ଗ୍ଲୋବାଲ ଟେଣ୍ଡର କରାଯିବ ଓ ଖୁବଶୀଘ୍ର କାମ ଆରମ୍ଭ କରାଯିବ ବୋଲି ବଲାଙ୍ଗୀର ଏନଏଚ ଡିଭିଜନର ନିର୍ବାହୀଯନ୍ତ୍ରୀ ଇଂ.ଜୟନ୍ତପ୍ରସାଦ ନାୟକ କହିଛନ୍ତି । ଗତକାଲିର ଏହି ଅନୁମୋଦନ ପରେ ବଲାଙ୍ଗୀରରେ ଖୁସିର ମାହୋଲ ସୃଷ୍ଟି ହୋଇଛି । ତେବେ ଏହି ବାଇପାସ ପ୍ରକଲ୍ପରେ ଯିବାକୁଥିବା ଜଙ୍ଗଲଜମି ପାଇଁ ଜଙ୍ଗଲ ଓ ପରିବେଶ ବିଭାଗର ଅନୁମତି ଏପର୍ଯ୍ୟନ୍ତ ମିଳିନାହିଁ । ସେହି ଅନୁମୋଦନ ପାଇଁ ବଲାଙ୍ଗୀର ବନଖଣ୍ଡ ପକ୍ଷରୁ ଭବାନୀପାଟଣା ଆରସିସିଏଫଙ୍କ ଜରିଆରେ ଭୁବନେଶ୍ୱର ରିଜିଓନାଲ ଅଫିସକୁ ପଠାଯାଉଛି ବୋଲି ସୂଚନା ମିଳିଛି । ସେପଟେ ଏହି ପ୍ରକଲ୍ପର ଅନୁମୋଦନ ପରେ ନେତାଙ୍କ ମଧ୍ୟରେ ଶ୍ରେୟର ଲଢାଇ ଆରମ୍ଭ ହୋଇଯାଇଛି । ସାଂସଦ ସଂଗୀତାକୁମାରୀ ସିଂଦେଓ ମନ୍ତ୍ରୀଙ୍କୁ ଭେଟି ଦାବିକରି ଅନୁମୋଦନ କରାଇଥିବା ବେଳେ ବଲାଙ୍ଗୀର ବିଧାୟକଙ୍କ ଗୋଷ୍ଠୀ ଏହାର ଶ୍ରେୟନେବାକୁ ସୋସିଆଲମିଡିଆରେ ଲାଗିପଡିଛନ୍ତି ।
ପ୍ରକାଶ୍ୟ ଯେ,ଗତ କିଛିଦିନ ତଳେ ଦିଲ୍ଲୀରେ ବଲାଙ୍ଗୀର ସାଂସଦ ସଂଗୀତାକୁମାରୀ ସିଂଦେଓ କେନ୍ଦ୍ରମନ୍ତ୍ରୀ ନୀତିନ ଗଡକରୀଙ୍କୁ ଭେଟି ଏହି ପ୍ରକଲ୍ପର ଆର୍ôଥକ ଅନୁଦାନକୁ ମଞ୍ଜୁରି ଦେଇ ଖୁବଶୀଘ୍ର କାମ ଆରମ୍ଭ କରାଇବାକୁ ଦାବିପତ୍ରଦେଇ ଆଲୋଚନା କରିଥିଲେ । ସେହି ଆଲୋଚନାରେ କେନ୍ଦ୍ରମନ୍ତ୍ରୀ ଗଡକରୀ ଏହାକୁ ଖୁବଶୀଘ୍ର ଅନୁମୋଦନ କରାଯିବାକୁ ପ୍ରତିଶୃତି ଦେଇଥିଲେ । ମନ୍ତ୍ରୀ ତାଙ୍କ ପ୍ରତିଶୃତି ରକ୍ଷାକରି ବଲାଙ୍ଗୀର ବାଇପାସର ଅର୍ଥରô୍କ ଅନୁଦାନକୁ ମଞ୍ଜୁର କରାଇଛନ୍ତି । କେନ୍ଦ୍ରମନ୍ତ୍ରୀ ଓ ସାଂସଦଙ୍କୁ ବିଭିନ୍ନ ମହଲରୁ ସ୍ୱାଗତ କରାଯାଇଛି । ଜାତୀୟରାଜପଥ ବିଭାଗ ପକ୍ଷରୁ ଏନଏଚ ୨୬ର ସମ୍ବଲପୁର ରୋଡର ମାଧିଆପାଲିଠାରୁ ଏକ ବାଇପାସ ବାହାରି ପୁଇଁତଲା ବ୍ଲକ ଦେଇ ଟିଟିଲାଗଡ ରୋଡର ବିଜାଖମନଠାରେ ମିଶିବ । ଉଭୟ ଜାତୀୟ ରାଜପଥ ୨୬ ଓ ୫୭କୁ ଏହା ସଂଯୋଗ କରିବ । ମୋଟ ୧୧.୭୬କିମି ବାଇପାସ ରାସ୍ତା ନିର୍ମାଣ କରାଯିବ । ଏହି ରାସ୍ତାକୁ ଏନଏଚ ବିଭାଗ ବଲାଙ୍ଗୀର ଡିଭିଜନ ନିର୍ମାଣ କରିବାକୁ ପ୍ରସ୍ତାବ ରହିଛି । କେନ୍ଦ୍ର ସରକାର ୨.୪.୨୦୦୯ରେ ଏହି ପ୍ରକଲ୍ପକୁ ପ୍ରଶାସନିକ ଅନୁମୋଦନ କରିଥିଲେ । ଜମି ଅଧିଗ୍ରହଣ ପାଇଁ ୨୦୧୩-୧୪ ଆର୍ଥିକ ବର୍ଷରେ ଅର୍ଥ ମଂଜୁର ହୋଇ ବଲାଙ୍ଗୀର ତହସିଲକୁ ୩୬ କୋଟି ଟଙ୍କା ଆସିଥିଲା । ଏହା ସହିତ ୬କୋଟି ୪୬ଲକ୍ଷ ଟଙ୍କା କଣ୍ଟିଜେନ୍ସିଂ ଓ ପ୍ରଶାସନିକ ଖର୍ଚ୍ଚ ପାଇଁ ଆସିଥିଲା । କିନ୍ତୁ ଜମିଅଧିଗ୍ରହଣରେ ବିଳମ୍ବ ହେବା କାରଣରୁ ଜମିମାଫିଆଙ୍କ କଳାକାରନାମାରେ ଜମିସବୁ କିଣାବିକା ହୋଇ ଏହାର ଅଟକଳ ବଢଚାଲିଲା । ଶେଷରେ ୨୪୧କୋଟି ଟଙ୍କାର ଅଟକଳ ପଠାଯାଇଥିଲା । ତାହା ଅନୁମୋଦନ ନହୋଇ ଫେରିଆସିଥିଲା । ପରେ ଅଟକଳକୁ ୧୯୦କୋଟିରେ ସିମିତ ରଖି ପଠାଗଲା । ସେହି ଅର୍ଥ ଆସିଲା ପରେ ବଲାଙ୍ଗୀର ତହସିଲଦାରଙ୍କ ଜରିଆରେ ଜମିଅଧିଗ୍ରହଣ କରାଗଲା । ପ୍ରାୟ ୯୦% ଜମି ଅଧିଗ୍ରହଣ ହୋଇସାରିଛି । ୩୪ଏକର ଜଙ୍ଗଲଜମିର ଜଙ୍ଗଲଜମିର ଅନୁମତି ପାଇଁ ସର୍ଭେ କରାଯାଇ ଚିଠି କରାଯାଇଛି । ଏବେ ଟେଣ୍ଡର କଲାପରେ ଏନଏଚ ଡିଭିଜନ କାମ ଆରମ୍ଭ କରିବାକୁ ଯାଉଛି ବୋଲି ଏନଏଚ ଡିଭିଜନର ନିର୍ବାହୀଅଧିକାରୀ ଇଂ,ଜୟନ୍ତପ୍ରସାଦ ନାୟକ କହିଛନ୍ତି ।