10-Oct-2026

ବରପାଲି, (ସୁଦାମ ଦୀପ): ବରପାଲି ସ୍ଥିତ ମା' ସମଲେଶ୍ୱରୀଙ୍କ ପୀଠରେ ଗତ ରାତିରେ ମା'ଙ୍କ ପବିତ୍ର ଧବଳମୁଖୀ ବେଶ ସମ୍ପନ୍ନ ହୋଇଛି। ରାତ୍ରି ପୂଜା ପରେ ଆଜି ଭୋର ୪ଟା ସମୟରେ ମନ୍ଦିର ଦ୍ୱାର ଫିଟିବା ପରେ ହଜାର ହଜାର ଭକ୍ତ ମା'ଙ୍କ ଦୁର୍ଲଭ ବେଶ ଦର୍ଶନ କରି ଆଶିଷ ଲାଭ କରିଛନ୍ତି।
ଏହି ଧବଳମୁଖୀ ବେଶକୁ ସାକ୍ଷାତ ଗଙ୍ଗା ମା'ଙ୍କ ରୂପ ଭାବେ ତୁଳନା କରାଯାଏ। ମା'ଙ୍କ ଶୁଭ୍ର ରୂପ ଦର୍ଶନ କଲେ ସମସ୍ତ ପାପ ଧୋଇ ହୋଇଯାଏ ବୋଲି ବିଶ୍ୱାସ ରହିଛି। ଏହି ବେଶ ଦେଖିବା ପାଇଁ ବରଗଡ, ସମ୍ବଲପୁର, ବଲାଙ୍ଗୀର ସମେତ ବହୁ ଦୂର ଦୂରାନ୍ତରୁ ଭକ୍ତମାନେ ଆସି ରାତିରୁ ଧାଡିରେ ଠିଆ ହୋଇଥିଲେ। ପ୍ରକାଶ ଥାଉକି, ଏହି ପବିତ୍ର ବେଶ ପାଇଁ ଆବଶ୍ୟକ ହେଉଥିବା ଧଳା ଚୂନ ଓ ଧଳା ରଙ୍ଗ ପ୍ରତିବର୍ଷ ପରମ୍ପରା ଅନୁଯାୟୀ ବରପାଲି ମଧ୍ୟପଡା ନିବାସୀ କମଳ କୁମାର ଥଇତଙ୍କ ଘରୁ ପୂଜା ଅର୍ଚ୍ଚନା ସହ ଅଣାଯାଇଥାଏ। ପରମ୍ପରାକୁ ଆଜି ବି ଶ୍ରଦ୍ଧାର ସହ ପାଳନ କରାଯାଉଛି।