09-Oct-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ବନଖଣ୍ଡ ପକ୍ଷରୁ ଚାଲିଥିବା ୭୨ତମ ବନ୍ୟପ୍ରାଣୀ ସପ୍ତାହ-୨୦୨୬ ଶୁକ୍ରବାର ସ୍ଥାନୀୟ ବନଖଣ୍ଡ କାର୍ଯ୍ୟାଳୟର ସମ୍ମେଳନ କକ୍ଷରେ ଉଦ୍‌ଯାପିତ ହୋଇଯାଇଛି। ଏହି ଅବସରରେ ବଲାଙ୍ଗୀର ଜିଲ୍ଲାପାଳ ଗୌରବ ଶିବାଜୀ ଈଶଲୱାର ମୁଖ୍ୟ ଅତିଥି ଭାବେ ଯୋଗଦେଇ ବନ୍ୟପ୍ରାଣୀଙ୍କ ସୁରକ୍ଷା ଓ ସଂରକ୍ଷଣ ସହ ଜୈବ ବିବିଧତାର ଗୁରୁତ୍ୱ ଉପରେ

ଆଲୋକପାତ କରିଥିଲେ । କାର୍ଯ୍ୟକ୍ରମରେ ବଲାଙ୍ଗୀର ବନଖଣ୍ଡ ଅଧିକାରୀ ଅଜିତ ବିଶି ଉପସ୍ଥିତ ଜନସାଧାରଣଙ୍କୁ ବନ୍ୟପ୍ରାଣୀ ସୁରକ୍ଷା ଓ ସଂରକ୍ଷଣ ଦିଗରେ ସକ୍ରିୟ ଭାବେ ସହଭାଗୀ ହେବାକୁ ଆହ୍ୱାନ ଦେଇଥିଲେ ।

ଏହି ଉତ୍ସବରେ ଅନ୍ୟତମ ଅତିଥି ଭାବେ ବଲାଙ୍ଗୀର ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ବବିତା ସିଂହ, ବଲାଙ୍ଗୀର କେନ୍ଦୁପତ୍ର ବନଖଣ୍ଡ ଅଧିକାରୀ ସୁଭେନ୍ଦୁ ପ୍ରସାଦ ବେହେରା ଏବଂ ଜେଆଇଟିଏମ୍‌, ବଲାଙ୍ଗୀରର ପ୍ରାଣୀବିଜ୍ଞାନ ଅଧ୍ୟାପକ ଅରିନ୍ଦମ ପରିଚ୍ଛା ଯୋଗଦେଇ ବନ୍ୟପ୍ରାଣୀ ସଂରକ୍ଷଣର ଆବଶ୍ୟକତା ଓ ଏଥିରେ ଜନସାଧାରଣଙ୍କ ଭୂମିକା ସମ୍ପର୍କରେ ନିଜ ନିଜର ମତ ରଖିଥିଲେ। ଏଥିସହ ବନ୍ୟପ୍ରାଣୀ ସଂରକ୍ଷଣ କର୍ମୀମାନେ ମଧ୍ୟ ଉପସ୍ଥିତ ଥିଲେ।

ବନ୍ୟପ୍ରାଣୀ ସପ୍ତାହ ଅବସରରେ ଆୟୋଜିତ ଚିତ୍ରାଙ୍କନ, ପୁସ୍ତକ ପଠନ, ସାଧାରଣ ଜ୍ଞାନ ପରୀକ୍ଷା ଓ ମାରାଥନ୍‌ ଦୌଡ଼ ଆଦି ପ୍ରତିଯୋଗିତାରେ କୃତିତ୍ୱ ହାସଲ କରିଥିବା ପ୍ରତିଯୋଗୀମାନଙ୍କୁ ଉତ୍ସବରେ ପୁରସ୍କୃତ କରାଯାଇଥିଲା । ସେହିପରି ବନ୍ୟପ୍ରାଣୀ ସଂରକ୍ଷଣ ଦିଗରେ ଉଲ୍ଲେଖନୀୟ ଦାୟିତ୍ୱ ତୁଲାଇଥିବା ବନ କର୍ମଚାରୀ ଓ ସ୍କ୍ୱାଡ୍‌ ସଦସ୍ୟମାନଙ୍କୁ ମାନପତ୍ର ଓ ପୁରସ୍କାର ପ୍ରଦାନ କରି ଉତ୍ସାହିତ କରାଯାଇଥିଲା ।

କାର୍ଯ୍ୟକ୍ରମକୁ ବଲାଙ୍ଗୀର ବନାଞ୍ଚଳ ଅଧିକାରୀ ନବୀନ କୁମାର ପଣ୍ଡା, ଚିନ୍ମୟ ପ୍ରଧାନ ଓ ଅର୍ଜୁନ ସାହୁ ପରିଚାଳନା କରିଥିଲେ ।