07-Oct-2026

ଟିଟିଲାଗଡ(ପ୍ରେରଣା ଖବର)- ରାଜ୍ୟ ସରକାର କିଛି ମା ପୂର୍ବେ ନୂତନ ଵିଦେଶୀ ମଦ ଦୋକାନ ଖୋଲିବାକୁ ଟେଣ୍ଡର ଆହ୍ୱାନ କରିଥିଲେ। ସେଥିରେ ଟିଟିଲାଗଡ ୱାର୍ଡ଼ ନମ୍ବର ୯ ରେଲୱେ ଷ୍ଟେସନ ରୋଡରେ ଖୋଲିବା ପାଇଁ ବିଜ୍ଞପ୍ତି ପ୍ରକାଶ ପାଇଥିଲା। ତେବେ ଏବେ ଦେଖିବାକୁ ମିଳୁଛି ଏହାର ଅସଲ ଚିତ୍ର। ୱାର୍ଡ଼ ନମ୍ବର ୯ ରେ ନ ଖୋଲି ୮ ନମ୍ବର ୱାର୍ଡ଼ରେ କିପରି ଅନୁମତି ଦେଲା ଅବକାରୀ ବିଭାଗ ? ବାରମ୍ବାର ଅଞ୍ଚଳ ବାସି ନୂତନ ବିଦେଶୀ ମଦ ଦୋକାନ ଖୋଲିବାକୁ ବିରୋଧ ମଧ୍ୟ କରି ସାରିଛନ୍ତି। 

     ତେବେ ନୂତନ ଵିଦେଶୀ ମଦ ଦୋକାନ ଖୋଲିବାର ତିନି ମାସ ପରେ ଖୋଲିଲା ଅବକାରୀ ବିଭାଗର ଗୁମର, ଟିଟିଲାଗଡ଼ରେ ନିୟମକୁ ଜଳାଞ୍ଜଳି ଦେଇ ୯ ନମ୍ବର ୱାର୍ଡ ବଦଳରେ ୮ ନମ୍ବର ୱାର୍ଡରେ କିପରି ଖୋଲିଲା ବିଦେଶୀ ମଦ ଦୋକାନ ?  ପ୍ରଶାସନ ଓ ମଦ ବେପାରୀଙ୍କ ଭିତିରି ବୁଝାମଣାକୁ ନେଇ ଏବେ ସାରା ଅଞ୍ଚଳରେ ଚର୍ଚ୍ଚା ଜୋର୍ ଧରିଛି।
ଜିଲ୍ଲା ଅବକାରୀ ବିଭାଗର ଅଜବ ନୀତିକୁ ନେଇ ଏବେ ତେଜିଛି ବିବାଦ। ଟିଟିଲାଗଡ଼ରେ ନୂତନ ବିଦେଶୀ ମଦ ବ୍ୟବସାୟୀଙ୍କ ସହ ଅବକାରୀ ବିଭାଗର ଭିତିରି ବୁଝାମଣା ଘଟଣା ଏବେ ସାମ୍ନାକୁ ଆସିଛି। ଅଭିଯୋଗ ଅନୁଯାୟୀ, ଅବକାରୀ ଅଧୀକ୍ଷକ ଅର୍ଣ୍ଣପୂର୍ଣ୍ଣା ରଥ ଏବଂ ତତ୍କାଳୀନ ଟିଟିଲାଗଡ଼ ଅବକାରୀ ଇନ୍ସପେକ୍ଟର ଯତୀନ ବେହେରା ହାଇସ୍କୁଲ ପଡ଼ାରେ ନୂତନ ବିଦେଶୀ 'ଅଫ୍ ସପ୍' ମଦ ଦୋକାନ ପାଇଁ ସମସ୍ତ ସରକାରୀ ନିୟମକୁ ଖୋଲାଖୋଲି ଉଲ୍ଲଂଘନ କରିଛନ୍ତି।
ନିୟମ ଅନୁସାରେ, ମଦ ଦୋକାନ ଖୋଲିବା ପୂର୍ବରୁ ସମ୍ପୃକ୍ତ ସ୍ଥାନ ପୌରପରିଷଦ ଅଧୀନସ୍ଥ ନିର୍ଦ୍ଧାରିତ ୱାର୍ଡ ଅନ୍ତର୍ଭୁକ୍ତ କି ନାହିଁ, ଜମିର ଦସ୍ତାବିଜ୍, ମାଲିକାନା ସତ୍ତ୍ୱ ଏବଂ ଭଡ଼ା ଚୁକ୍ତିନାମା ଆଦି ଟେଣ୍ଡର ନିୟମ ଅନୁଯାୟୀ ଯାଞ୍ଚ ହେବା କଥା। ଏପରିକି ସ୍ଥାନୀୟ ପୌରପରିଷଦ କାର୍ଯ୍ୟାଳୟରୁ 'ଟ୍ରେଡ୍ ଲାଇସେନ୍ସ' କାଗଜପତ୍ର ଯାଞ୍ଚ ପରେ ହିଁ ଅନୁମତି ମିଳିବା ନିୟମ ରହିଛି। ମାତ୍ର ହାଇସ୍କୁଲ ପଡ଼ାରେ ନୂତନ ଦୋକାନ ପାଇଥିବା ଶୈଳେନ୍ଦ୍ର ସକ୍ସେନାଙ୍କ ପାଇଁ ଅବକାରୀ ବିଭାଗ ସମସ୍ତ ନୀତିନିୟମକୁ ପାଣି ଫୋଟକା ସଦୃଶ କରିଦେଇଛି। ଉକ୍ତ ଦୋକାନଟି ପୌରପରିଷଦ ଅଧୀନସ୍ଥ ୮ ନମ୍ବର ୱାର୍ଡରେ ଆସୁଥିବା ବେଳେ, ଅବକାରୀ ବିଭାଗ ଏହାକୁ ବାରମ୍ବାର ୯ ନମ୍ବର ୱାର୍ଡ ଦର୍ଶାଇ ତରବରିଆ ଭାବେ ଅନୁମତି ଦେବା ପଛର ରହସ୍ୟ କ’ଣ—ତାହା ଏବେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। 

    ଗଣମାଧ୍ୟମକୁ ଭୁଲ୍ ତଥ୍ୟ ଦେଇ ନିୟମ ଉଲ୍ଲଂଘନ କରିଥିବା ଏହି ଅଧିକାରୀମାନଙ୍କ ବିରୋଧରେ ଏବେ କ’ଣ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ? ତାହା ଉପରେ ସମସ୍ତଙ୍କ ନଜର।ବିନା ନିୟମ ପାଳନରେ ଚାଲିଥିବା ଏହି ବେଆଇନ କାରବାର ପଛରେ ପ୍ରକୃତରେ କାହାର ହାତ ରହିଛି ଏବଂ ସରକାର ଏହି ଦୁର୍ନୀତି ବିରୋଧରେ କି ପଦକ୍ଷେପ ନେବେ, ତାହା ଦେଖିବାକୁ ବାକି ରହିଲା। ସେମିତିବି ଲୋକଙ୍କ ସରକାର ବୋଲାଉଥିବା ମୋହନ ମାଝୀଙ୍କ ସରକାରରେ ସବୁ ସମ୍ଭବ ହୋଇପାରୁଛି। ନୀତି ନିୟମକୁ ଫୁ କରି ଖୋଲା ଯାଇଛି ବିଦେଶି ମଦ ଦୋକାନ। ଏହା ବ୍ୟତୀତ ଅବକାରୀ ମନ୍ତ୍ରୀ ଏ ବିଷୟରେ ଯିଏ ଭୁଲ କରିଛି ତାଙ୍କ ବିରୁଦ୍ଧରେ କଣ ପଦକ୍ଷେପ ଗ୍ରହଣ କରିବେ ଦେଖିବାକୁ ରହିଲା। ସୁଚନା ଅଧିକାର ଆଇନ ବଳରେ ତଥା ଜିଲ୍ଲା ଅବକାରୀ ବିଭାଗ ପକ୍ଷରୁ ଏହି ବିଦେଶୀ ମଦ ଦୋକାନ ବିଷୟରେ ତଥ୍ୟ ମାଗିବା ପରେ ସବୁ ଗୁମର ଖୋଲିଛି। ଦୋକାନ ପାଇଁ ଟେଣ୍ଡର ବାହାରିଲା ଗୋଟିଏ ୱାର୍ଡରେ ଆଉ ଖୋଲିଲା ଅନ୍ୟ ୱାର୍ଡ଼ରେ। ତା ମାନେ ଅବକାରୀ ବିଭାଗ ଅଧିକାରୀ ମାନେ ନିଜେ ପ୍ରସ୍ତୁତ କରୁଛନ୍ତି ନିୟମ ? ନୂତନ ଦୋକାନ ମାଲିକ ଓ ଅବକାରୀ ବିଭାଗ ଅଧିକାରୀଙ୍କ ଭିତିରିଆ କାରବାର କି ବୁଝାମଣା ହୋଇଛି ନିଶ୍ଚୟ ଏ ଦିଗରେ ତଦନ୍ତ ନିହାତି ଆବଶ୍ୟକ ବୋଲି ସାଧାରଣରେ ଚର୍ଚ୍ଚା ଜୋର ଧରିଛି।