06-Oct-2026

ବରଗଡ(ତୁଳସୀ ଚରଣ ଦାଶ): ମାନବିକତା ଓ ସେବା ମନୋଭାବର ଏକ ଉଜ୍ଜ୍ୱଳ ଉଦାହରଣ ସୃଷ୍ଟି କରିଛନ୍ତି ଟିଟିଲାଗଡ଼ର ସୁଦୀପ ତ୍ରିପାଠୀ। ଟିଟିଲାଗଡ଼ ବଏଜ୍ ହାଇସ୍କୁଲରେ କିରାଣୀ ଭାବେ କାର୍ଯ୍ୟରତ ସୁଦୀପ ସୋସିଆଲ ମିଡିଆ ମାଧ୍ୟମରେ ଜାଣିବାକୁ ପାଇଥିଲେ ଯେ ବରଗଡ଼ ବିକାଶ ହସ୍ପିଟାଲରେ ଚିକିତ୍ସାଧୀନ ମାତ୍ର ୩୨ ଦିନର ଏକ ଶିଶୁ ପାଇଁ A2B+ ରକ୍ତ ଆବଶ୍ୟକତା ଅଛି,
ଏହି ଖବର ଜାଣିବା ପରେ ସୁଦୀପ ନିଜ କାର୍ଯ୍ୟସ୍ଥଳରୁ ଛୁଟି ନେଇ, ନିଜ ଖର୍ଚ୍ଚରେ କାର୍ ଯୋଗେ ଟିଟିଲାଗଡ଼ରୁ ବରଗଡ଼ ଆସି ବରଗଡ଼ ରକ୍ତ ଭଣ୍ଡାରରେ ରକ୍ତଦାନ କରିଥିଲେ। ରକ୍ତଦାନ ପାଇଁ ଆସିବା ସମୟରେ ଯାତାୟାତ ଖର୍ଚ୍ଚ ମଧ୍ୟ ସେ ନିଜେ ବହନ କରିଥିଲେ।
ଶିଶୁର ପରିବାର ପକ୍ଷରୁ ତାଙ୍କୁ ଯାତାୟାତ ଖର୍ଚ୍ଚ ସମେତ କିଛି ଟଙ୍କା ଦେବା ପାଇଁ ବାରମ୍ବାର ଅନୁରୋଧ କରାଯାଇଥିଲେ ମଧ୍ୟ ସୁଦୀପ ତ୍ରିପାଠୀ ତାହା ନେବାକୁ ସମ୍ପୂର୍ଣ୍ଣ ଭାବେ ମନା କରିଦେଇଥିଲେ। ତାଙ୍କ ପାଇଁ ଜଣେ ଅସହାୟ ଶିଶୁର ଜୀବନ ବଞ୍ଚାଇବା ହିଁ ସବୁଠାରୁ ବଡ଼ କଥା ଥିଲା।
ଏହି ମାନବିକ ପ୍ରୟାସରେ ସଂଘମିତ୍ରା ପଟେଲଙ୍କ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ରହିଛି। ସୋସିଆଲ ମିଡିଆରେ ରକ୍ତର ଆବଶ୍ୟକତା ସମ୍ପର୍କରେ ସୂଚନା ପ୍ରଚାର ହେବା ପରେ ସୁଦୀପ ଏହି ମହତ୍ କାର୍ଯ୍ୟ ପାଇଁ ଆଗେଇ ଆସିଥିଲେ।
“A2B+ ରକ୍ତ ସହଜରେ ମିଳୁନଥିବା ସମୟରେ ସୁଦୀପ ତ୍ରିପାଠୀଙ୍କ ଏଭଳି ମାନବିକ ପଦକ୍ଷେପ ନିଶ୍ଚିତ ଭାବେ ପ୍ରଶଂସନୀୟ”, ବୋଲି ସଂଘମିତ୍ରା ପଟେଲ କହିଛନ୍ତି। ବରଗଡ ରେ ମାତ୍ର 2 ଟି ରକ୍ତ ଦାତା A2B+ ଅଛନ୍ତି, ତାଙ୍କୁ contact କରା ହୋଇଥିଲା ସେମାନେ ଅଗରୁ ଦେଇସାରିଥିଲେ, ଜାଣିବା ପାରେ ସଂଘମିତ୍ରାଙ୍କ ପାଇଁ ଚାଲେଞ ମନୋଭାବ ଆସିଥିଲା ଠିକ ସେ ସମୟ ରେ  ସୂଦୀପ ତ୍ରିପାଠୀ ଫୋନ ଯୋଗେ ମୋର A2B+ ବୋଲି ସଂଘମିତ୍ରାଙ୍କୁ ଜଣାଇଥିଲେ 
ରକ୍ତଦାନ ପରେ ଶିଶୁର ପରିବାର ସଦସ୍ୟମାନେ ଭାବବିହ୍ୱଳ ହୋଇ ସୁଦୀପଙ୍କୁ ଧନ୍ୟବାଦ ଜଣାଇଥିଲେ। ପରିବାରର ଆଖିରେ ଲୁହ ଥିବା ବେଳେ ସେମାନେ କହିଥିଲେ, “ଆପଣ ଆମ ପାଇଁ ଭଗବାନଙ୍କ ଭଳି ଆସିଛନ୍ତି।”
ସୁଦୀପ ତ୍ରିପାଠୀଙ୍କ ଏହି ନିଃସ୍ୱାର୍ଥ ରକ୍ତଦାନ ମାନବିକତାର ଏକ ଅନନ୍ୟ ଉଦାହରଣ ହୋଇ ରହିବ। ରକ୍ତଦାନ କେବଳ ରକ୍ତ ଦେବା ନୁହେଁ, ବରଂ କାହାର ଜୀବନ ବଞ୍ଚାଇବାର ଏକ ମହାନ ପ୍ରୟାସ—ସୁଦୀପଙ୍କ ଏହି କାର୍ଯ୍ୟ ସେହି ବାର୍ତ୍ତାକୁ ପୁଣିଥରେ ସମାଜ ସମ୍ମୁଖରେ ରଖିଛି।
         ---------×××---------