05-Oct-2026

ବରପାଲି(ସୁଦାମ ଦୀପ)ବିଜେପୁର ନିର୍ବାଚନମଣ୍ଡଳୀର ଚାଷୀମାନଙ୍କ ପାଇଁ ଆସିଛି ଏକ ଖୁସିର ଖବର। ଚାଷଜମିକୁ ପର୍ଯ୍ୟାପ୍ତ ଓ ନିୟମିତ ଜଳସେଚନ ସୁବିଧା ଯୋଗାଇବା ସହ ଚାଷୀଙ୍କ ବର୍ଷା ନିର୍ଭରଶୀଳତା କମାଇବା ଲକ୍ଷ୍ୟରେ ଓଡ଼ିଶା ଉଠା ଜଳସେଚନ ନିଗମ (ଓଏଲଆଇସି) ପକ୍ଷରୁ ନିର୍ବାଚନମଣ୍ଡଳୀରେ ୩୨ଟି ଉଠା ଜଳସେଚନ ପ୍ରକଳ୍ପକୁ ଅନୁମୋଦନ ମିଳିଛି। ବରପାଲି, ବିଜେପୁର ଓ ଗାଇସିଲେଟ ବ୍ଲକର ବିଭିନ୍ନ ଅଞ୍ଚଳରେ ଏହି ପ୍ରକଳ୍ପଗୁଡ଼ିକ କାର୍ଯ୍ୟକାରୀ ହେବ। ସମସ୍ତ ପ୍ରକଳ୍ପ କାର୍ଯ୍ୟକାରୀ ହେଲେ ମୋଟ ପ୍ରାୟ ୨୨୩୦ ଏକର ଚାଷଜମିକୁ ଜଳସେଚନ ସୁବିଧା ମିଳିପାରିବ। ଏନେଇ ବିଜେପୁର ବିଧାୟକ ସନତ କୁମାର ଗଡ଼ତିଆ ସୂଚନା ଦେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଧନ୍ୟବାଦ ଜଣାଇଛନ୍ତି। ଜଳସମ୍ପଦ ବିଭାଗ ମୁଖ୍ୟମନ୍ତ୍ରୀଙ୍କ ଅଧୀନରେ ଥିବାରୁ ବିଜେପୁର ଅଞ୍ଚଳର ଚାଷୀମାନଙ୍କ ଦୀର୍ଘଦିନର ଜଳସେଚନ ସମସ୍ୟାକୁ ସରକାର ଗୁରୁତ୍ୱ ଦେଇ ଏହି ପ୍ରକଳ୍ପଗୁଡ଼ିକୁ ଅନୁମୋଦନ କରିଥିବା ବିଧାୟକ କହିଛନ୍ତି।ମିଳିଥିବା ସୂଚନା ଅନୁଯାୟୀ, ୩୨ଟି ପ୍ରକଳ୍ପ ମଧ୍ୟରୁ ବରପାଲି ବ୍ଲକରେ ୨ଟି, ବିଜେପୁର ବ୍ଲକରେ ୫ଟି ଏବଂ ଗାଇସିଲେଟ ବ୍ଲକରେ ସର୍ବାଧିକ ୨୫ଟି ପ୍ରକଳ୍ପ ରହିଛି। ଏହି ପ୍ରକଳ୍ପଗୁଡ଼ିକ ପାଇଁ ବିଭିନ୍ନ ବ୍ଲକରେ ମୋଟ ୧୬ କୋଟି ଟଙ୍କାରୁ ଅଧିକ ଅର୍ଥର ଅନୁମୋଦନ ହୋଇଥିବା ଜଣାପଡ଼ିଛି।ବରପାଲି ବ୍ଲକର ବାନ୍ଦୁମୁଣ୍ଡା ଓ ଟିଙ୍ଗିପାଲି ଅଞ୍ଚଳରେ ୨ଟି ଉଠା ଜଳସେଚନ ପ୍ରକଳ୍ପ କାର୍ଯ୍ୟକାରୀ ହେବ। ଏହି ଦୁଇ ପ୍ରକଳ୍ପ ମାଧ୍ୟମରେ ପ୍ରାୟ ୧୦୦ ଏକର ଚାଷଜମିକୁ ଜଳସେଚନ ସୁବିଧା ମିଳିବାର ଆଶା ରହିଛି। ବରପାଲି ବ୍ଲକ ପାଇଁ ପ୍ରାୟ ୬୮ ଲକ୍ଷ ଟଙ୍କା ଅନୁମୋଦନ ହୋଇଥିବା ଜଣାପଡ଼ିଛି। ଏହାଦ୍ୱାରା ଏହି ଅଞ୍ଚଳର ଚାଷୀମାନେ ଜଳାଭାବ ସମୟରେ ଉପକୃତ ହୋଇପାରିବେ।ବିଜେପୁର ବ୍ଲକର ଜାଲପାଲି, ସର୍ଗିପାଲି, ଭେଟିଆପଦର ଓ ଅଇଲପୁର ଅଞ୍ଚଳରେ ୫ଟି ଉଠା ଜଳସେଚନ ପ୍ରକଳ୍ପ କାର୍ଯ୍ୟକାରୀ ହେବ। ଏହି ପ୍ରକଳ୍ପଗୁଡ଼ିକ ମାଧ୍ୟମରେ ପ୍ରାୟ ୭୨୦ ଏକର ଚାଷଜମିକୁ ଜଳସେଚନ ସୁବିଧା ଯୋଗାଇ ଦିଆଯାଇପାରିବ। ଏଥିପାଇଁ ପ୍ରାୟ ୬ କୋଟି ଟଙ୍କା ଅନୁମୋଦନ ହୋଇଥିବା ବିଧାୟକ ସୂଚନା ଦେଇଛନ୍ତିl ଜଳସେଚନ ସୁବିଧାର ଅଭାବ ଯୋଗୁଁ ଅନେକ ସମୟରେ ଚାଷୀମାନେ ଚାଷ ପାଇଁ ବର୍ଷା ଉପରେ ନିର୍ଭର କରିଥାନ୍ତି। ନୂଆ ପ୍ରକଳ୍ପଗୁଡ଼ିକ କାର୍ଯ୍ୟକ୍ଷମ ହେଲେ ଏହି ଅଞ୍ଚଳରେ ଚାଷକାର୍ଯ୍ୟ ଅଧିକ ସୁବ୍ୟବସ୍ଥିତ ହେବା ସହ ରବି ଓ ଖରିଫ ଋତୁରେ ଚାଷୀମାନେ ଜଳସେଚନ ସୁବିଧା ପାଇପାରିବେ ବୋଲି ଆଶା କରାଯାଉଛି l ତିନିଟି ବ୍ଲକ ମଧ୍ୟରୁ ଗାଇସିଲେଟ ବ୍ଲକରେ ସର୍ବାଧିକ ୨୫ଟି ଉଠା ଜଳସେଚନ ପ୍ରକଳ୍ପକୁ ଅନୁମୋଦନ ମିଳିଛି। ଏହି ପ୍ରକଳ୍ପଗୁଡ଼ିକ ମାଧ୍ୟମରେ ପ୍ରାୟ ୧୪୧୦ ଏକର ଚାଷଜମିକୁ ଜଳସେଚନ ସୁବିଧା ମିଳିବାର ଲକ୍ଷ୍ୟ ରହିଛି। ଏଥିପାଇଁ ପ୍ରାୟ ୧୦ କୋଟି ଟଙ୍କା ଅନୁମୋଦନ ହୋଇଥିବା କୁହାଯାଇଛି।ଗାଇସିଲେଟ ବ୍ଲକର ଅଧିକ ସଂଖ୍ୟକ ଚାଷୀ ଏହି ପ୍ରକଳ୍ପ ଦ୍ୱାରା ଲାଭାନ୍ୱିତ ହେବାର ସମ୍ଭାବନା ରହିଛି। ଜଳସେଚନ ସୁବିଧା ବୃଦ୍ଧି ପାଇଲେ ଚାଷୀମାନେ ଚାଷରେ ଅଧିକ ନିବେଶ କରିବା ସହ ଫସଲର ବିବିଧତା ଆଣିପାରିବେ ବୋଲି ଅଞ୍ଚଳରେ ଆଶା ପ୍ରକାଶ ପାଇଛି।ବିଜେପୁର ନିର୍ବାଚନମଣ୍ଡଳୀର ଅନେକ ଅଞ୍ଚଳରେ ଜଳସେଚନ ସୁବିଧା ଅଭାବରୁ ଚାଷୀମାନେ ଅନେକ ସମୟରେ ବର୍ଷା ଉପରେ ନିର୍ଭର କରି ଚାଷ କରିଥାନ୍ତି। ବର୍ଷାର ଅନିୟମିତତା ଯୋଗୁଁ ଫସଲ ଉତ୍ପାଦନ ମଧ୍ୟ ପ୍ରଭାବିତ ହୋଇଥାଏ। ଏଭଳି ସ୍ଥିତିରେ ନୂଆ ଉଠା ଜଳସେଚନ ପ୍ରକଳ୍ପଗୁଡ଼ିକ ଚାଷୀଙ୍କ ପାଇଁ ଏକ ବଡ଼ ସହାୟତା ହୋଇପାରେ।ପ୍ରକଳ୍ପଗୁଡ଼ିକ କାର୍ଯ୍ୟକ୍ଷମ ହେଲେ ଚାଷଜମିକୁ ଆବଶ୍ୟକ ସମୟରେ ପାଣି ଯୋଗାଣ ସୁବିଧା ବଢ଼ିବ। ଏହା ଫଳରେ ଚାଷୀମାନଙ୍କ ବର୍ଷା ଉପରେ ନିର୍ଭରଶୀଳତା କିଛି ପରିମାଣରେ କମିବା ସହ ଫସଲ ଉତ୍ପାଦନରେ ସ୍ଥିରତା ଆସିବାର ଆଶା ରହିଛି।ବିଧାୟକ ଗଡ଼ତିଆ କହିଛନ୍ତି ଯେ, ଦୀର୍ଘଦିନ ଧରି ଜଳସେଚନ ସୁବିଧାର ଅଭାବ ଭୋଗୁଥିବା ଅଞ୍ଚଳଗୁଡ଼ିକର ଚାଷୀଙ୍କ ଦାବିକୁ ଗୁରୁତ୍ୱ ଦିଆଯାଇଛି। ଅନୁମୋଦିତ ପ୍ରକଳ୍ପଗୁଡ଼ିକର କାମ ଶୀଘ୍ର ଆରମ୍ଭ କରାଯାଇ ନିର୍ଦ୍ଧାରିତ ସମୟରେ ସମ୍ପନ୍ନ କରାଯିବା ଆବଶ୍ୟକ ବୋଲି ସେ ଆଶା ପ୍ରକାଶ କରିଛନ୍ତି। ଏହି ୩୨ଟି ଉଠା ଜଳସେଚନ ପ୍ରକଳ୍ପ ଆଗାମୀ ଦିନରେ ବିଜେପୁର ନିର୍ବାଚନମଣ୍ଡଳୀର କୃଷି କ୍ଷେତ୍ରକୁ ଅଧିକ ସୁଦୃଢ଼ କରିବାରେ ସହାୟକ ହୋଇପାରେ। ଜଳସେଚନ ବ୍ୟବସ୍ଥାର ବିକାଶ ଦ୍ୱାରା ଚାଷୀମାନେ ଅଧିକ ଜମିରେ ଚାଷ କରିବା ସହ ଫସଲ ଉତ୍ପାଦନ ବଢ଼ାଇପାରିବେ। ଫଳରେ ଚାଷୀଙ୍କ ଆୟ ବୃଦ୍ଧି ଓ କୃଷି ଅର୍ଥନୀତିକୁ ଗତି ମିଳିବାର ସମ୍ଭାବନା ରହିଛି।ଚାଷୀଙ୍କ ଦୀର୍ଘଦିନର ଜଳସେଚନ ସମସ୍ୟାର ସମାଧାନ ଦିଗରେ ୩୨ଟି ପ୍ରକଳ୍ପର ଅନୁମୋଦନକୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି। ଏବେ ପ୍ରକଳ୍ପଗୁଡ଼ିକର ଟେଣ୍ଡର, କାର୍ଯ୍ୟାଦେଶ ଓ ନିର୍ମାଣ କାର୍ଯ୍ୟ ଶୀଘ୍ର ଆରମ୍ଭ ହୋଇ ନିର୍ଦ୍ଧାରିତ ସମୟରେ ଶେଷ ହେବା ଉପରେ ଚାଷୀମାନଙ୍କ ନଜର ରହିଛି।