03-Oct-2026

ବିନିକା(ହିମାଂଶୁ ଶେଖର ପୁଟେଲ)ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଜଟେସିଂହା ପଞ୍ଚାୟତ ଅନ୍ତର୍ଗତ କୁଡ଼ାପଡ଼ାଠାରେ ଆଜି କ୍ଲଷ୍ଟର ସ୍ତରୀୟ ମାସିକ ବୈଠକ(୪ର୍ଥ) ଅନୁଷ୍ଠିତ ହୋଇଯାଇଛି।ସଭାରମ୍ଭ ହେବା ପୂର୍ବରୁ ବରିଷ୍ଠ ଶିକ୍ଷକ ପ୍ରବୀର କୁମାର ଦାସ ପୂଜାର୍ଚ୍ଚନା କରିଥିବା ବେଳେ ଉପସ୍ଥିତ ଅନ୍ୟ ଶିକ୍ଷକ ଓ ଶିକ୍ଷୟିତ୍ରୀ ଗଣେଶ ବନ୍ଦନା ଗାନ କରିଥିଲେ।ସି.ଆର.ସି.ସି ଅନନ୍ତ ତାଣ୍ଡିଆଙ୍କ ଉପସ୍ଥିତିରେ ସି.ଆର.ଜି କାର୍ତ୍ତିକ ମଲ୍ଲିକ ଆଜିର ସଭାରେ  "ମୌଳିକ ସାକ୍ଷରତା ଓ ସଂଖ୍ୟାଜ୍ଞାନ" ବିଷୟରେ ଶିଶୁମାନଙ୍କୁ କିପରି ଅଗ୍ରାଧିକାର ଭିତ୍ତିରେ ମଜାଳିଆ ଢଙ୍ଗରେ ଶିକ୍ଷାଦାନ କରାଯାଇପାରିବ ସେ ବିଷୟରେ ବିଶଦ ଆଲୋଚନା କରିଥିଲେ।ସଭା ଶେଷରେ ସି.ଆର.ସି.ସି ଅନନ୍ତ ତାଣ୍ଡିଆ ଧନ୍ୟବାଦ ଅର୍ପଣ କରିବା ସହ କୁଡ଼ାପଡ଼ା ବିଦ୍ୟାଳୟ ତରଫରୁ ନିର୍ମିତ ଗ୍ୟାଲେରୀ ୱାକକୁ ଭୂୟସୀ ପ୍ରଶଂସା କରିବା ସହ ଉଭୟ ଶିକ୍ଷକ ସୌଦାମିନୀ ମେହେର ଓ ଆର୍ତ୍ତତ୍ରାଣ ଖୁର୍ଡିଆଙ୍କୁ ଧନ୍ୟବାଦ ଦେବା ସହ ଏହା କେବଳ ଏକ କାର୍ଯ୍ୟକଳାପ ନୁହେଁ, ବରଂ ଶିକ୍ଷାର ଏକ ସୁନ୍ଦର ଓ ଅଭିନବ ପ୍ରଣାଳୀ,ଯାହା ନୂତନ ଚିନ୍ତାଧାରାକୁ ଜାଗ୍ରତ କରେ,ସୃଜନଶୀଳତାକୁ ପ୍ରେରଣା ଦିଏ ଏବଂ ଛାତ୍ରଛାତ୍ରୀମାନଙ୍କୁ ଉତ୍ସାହିତ ଓ ପ୍ରେରିତ କରିବା ସହ ଶିକ୍ଷାଦାନ ପ୍ରଣାଳୀକୁ ଅଧିକ ଅର୍ଥପୂର୍ଣ୍ଣ, ରୋଚକ ଓ ଆନନ୍ଦଦାୟକ କରିବାରେ ସହାୟକ ହେବା ସହ ଶିକ୍ଷକ ଓ ଛାତ୍ରଛାତ୍ରୀ ଉଭୟଙ୍କ ପାଇଁ ଏହା ନିଶ୍ଚିତ ଭାବେ ଅତ୍ୟନ୍ତ ସମୃଦ୍ଧ ଓ ସ୍ମରଣୀୟ ଅନୁଭୂତି ବୋଲି ମତବ୍ୟକ୍ତ କରିଥିଲେ।ଆଜିର ବୈଠକରେ କ୍ଲଷ୍ଟରର ବିଭିନ୍ନ ବିଦ୍ୟାଳୟରୁ  ଶିକ୍ଷକ ଓ ଶିକ୍ଷୟିତ୍ରୀ ମାନେ ଯୋଗ ଦେଇଥିଲେ।