01-Sep-2026

ସମ୍ବଲପୁର: (ସଂଜୀବ ପାଣିଗ୍ରାହୀ )- ସମ୍ବଲପୁରରେ ସାଂସ୍କୃତିକ ବିକାଶ" ଶୀର୍ଷକ ଏକ ଦିନିକିଆ ଜାତୀୟ ସେମିନାର ଆୟୋଜନ କରାଯାଇଥିଲା। ଶିକ୍ଷାଗତ କାର୍ଯ୍ୟକ୍ରମ, ଗବେଷଣା, ପ୍ରତ୍ନତାତ୍ତ୍ୱିକ ଅନୁସନ୍ଧାନ, ସେମିନାର ଏବଂ ବିଦ୍ୱତ୍‌ପୂର୍ଣ୍ଣ କାର୍ଯ୍ୟକଳାପ ମାଧ୍ୟମରେ ପଶ୍ଚିମ ଓଡ଼ିଶାର ଐତିହାସିକ, ସାଂସ୍କୃତିକ, ଭାଷାଗତ ଓ ବୌଦ୍ଧିକ ଐତିହ୍ୟର ପ୍ରଚାର, ସଂରକ୍ଷଣ ଏବଂ ଲିପିବଦ୍ଧକରଣ ଦିଗରେ ଗଙ୍ଗାଧର ମେହେର ବିଶ୍ୱବିଦ୍ୟାଳୟର ନିରନ୍ତର ପ୍ରତିବଦ୍ଧତାକୁ ଏପରି କାର୍ଯ୍ୟକ୍ରମ କରିଆସୁଛି l ଉଦ୍‌ଘାଟନୀ ଅଧିବେଶନରେ ଉତ୍ତରଞ୍ଚଳ ରାଜସ୍ୱ କମିଶନର ସଂଗ୍ରାମ କେଶରୀ ମହାପାତ୍ର ମୁଖ୍ୟ ଅତିଥି ଭାବେ ଯୋଗ ଦେଇ, ଗଙ୍ଗାଧର ମେହେର ବିଶ୍ୱବିଦ୍ୟାଳୟର ଏହି ପଦକ୍ଷେପକୁ ପ୍ରଶଂସା କରିବା ସହ ସେ ଏହି ଅଞ୍ଚଳର ଲୁକ୍କାୟିତ ଓ ଅଳ୍ପ ଲୁକ୍କାୟିତ ଇତିହାସକୁ ଖୋଜି ବାହାର କରିବା ଏବଂ ଲୋକଲୋଚନକୁ ଆଣିବା ଦିଗରେ ଅନୁଷ୍ଠାନର ପ୍ରୟାସକୁ ପ୍ରଶଂସା କରିଥିଲେ l

 ସେ ବିଶ୍ୱବିଦ୍ୟାଳୟର ଶିକ୍ଷାଗତ ଓ କ୍ଷେତ୍ର-ଭିତ୍ତିକ କାର୍ଯ୍ୟକଳାପ ମାଧ୍ୟମରେ ସମାଜ ପ୍ରତି ରହିଥିବା ଅନନ୍ୟ ଅବଦାନ ଉପରେ ଆଲୋକପାତ କରିଥିଲେ ଏବଂ ଉଚ୍ଚଶିକ୍ଷାକୁ ଆଞ୍ଚଳିକ ଐତିହ୍ୟର ସଂରକ୍ଷଣ ଓ ପ୍ରଚାର ସହ ଯୋଡ଼ିବା ଦିଗରେ ଏହାର ପ୍ରୟାସକୁ ପ୍ରଶଂସା କରିଥିଲେ l

ଗଙ୍ଗାଧର ମେହେର ବିଶ୍ୱବିଦ୍ୟାଳୟର କୁଳପତି ପ୍ରଫେସର ବ୍ୟୋମକେଶ ତ୍ରିପାଠୀ ଏହି କାର୍ଯ୍ୟକ୍ରମର ଲକ୍ଷ୍ୟ ଓ ଉଦ୍ଦେଶ୍ୟ ସମ୍ପର୍କରେ ସୂଚନା ଦେବା ସହ ପଶ୍ଚିମ ଓଡ଼ିଶାର ଲୁକ୍କାୟିତ ଐତିର୍ଯ୍ୟ, ଇତିହାସ, ସଂସ୍କୃତି ଓ ପରମ୍ପରାର ପୁନରୁଦ୍ଧାର, ତଥ୍ୟ ସଂରକ୍ଷଣ ଓ ସୁରକ୍ଷା ଦିଗରେ ବିଶ୍ୱବିଦ୍ୟାଳୟର ପ୍ରତିଶ୍ରୁତିବଦ୍ଧତାକୁ ପ୍ରକାଶ କରିଥିଲେ ଏବଂ କହିଥିଲେ ଆଗାମୀ ଦିନରେ ଏଭଳି କାର୍ଯ୍ୟକ୍ରମ କରାଯିବ ଉପରେ ପ୍ରକାଶ ପକାଇଥିଲେ l 

ସେ କହିଥିଲେ ଯେ, ବିଶ୍ୱବିଦ୍ୟାଳୟ ସମାଜ ସହିତ ନିଜର ସମ୍ପର୍କକୁ ଆହୁରି ବ୍ୟାପକ କରିବା ସହ ଏଭଳି ଅଧିକ ପଦକ୍ଷେପ ଗ୍ରହଣ କରିବ ଯାହା ଶିକ୍ଷାଗତ ଗବେଷଣାକୁ ଏହି ଅଞ୍ଚଳର ସାଂସ୍କୃତିକ ଓ ଐତିହାସିକ ଆବଶ୍ୟକତା ସହିତ ଯୋଡ଼ିପାରିବ। ମୁଖ୍ୟବକ୍ତା ଦୀପକ ପଣ୍ଡା ସ୍ୱର୍ଗତ ଐତିହାସିକ ଶିବ ପ୍ରସାଦ ଦାସଙ୍କ ଜୀବନୀ, କାର୍ଯ୍ୟ ଏବଂ ବିଦ୍ୱାନ ଅବଦାନ ଉପରେ ଆଲୋକପାତ କରିଥିଲେ l ସେ ପଶ୍ଚିମ ଓଡ଼ିଶାର ଇତିହାସ ଏବଂ ସାଂସ୍କୃତିକ ପରମ୍ପରାକୁ ଡକ୍ୟୁମେଣ୍ଟେସନ୍ କରିବାରେ ଐତିହାସିକଙ୍କ ଅଗ୍ରଣୀ ଭୂମିକା ଏବଂ ଏହି ଅଞ୍ଚଳର ଐତିହାସିକ ଗବେଷଣା ଉପରେ ତାଙ୍କର ସ୍ଥାୟୀ ପ୍ରଭାବକୁ ଗୁରୁତ୍ୱାରୋପ କରିଥିଲେ l ଆଲୋଚନାଚକ୍ର ର ସଂଯୋଜକ ଡ. ଅତୁଲ କୁମାର ପ୍ରଧାନ କାର୍ଯ୍ୟକ୍ରମର ଉଦ୍ଦେଶ୍ୟ ବିଷୟରେ ବିସ୍ତୃତ ଭାବରେ ବର୍ଣ୍ଣନା କରିଥିଲେ ଏବଂ ବିଭିନ୍ନ ସ୍ଥାନରେ ବିଶ୍ୱବିଦ୍ୟାଳୟର ସାମ୍ପ୍ରତିକ ପ୍ରତ୍ନତାତ୍ତ୍ୱିକ ଖନନ ଏବଂ ଅନୁସନ୍ଧାନ ଉପରେ ଆଲୋକପାତ କରିଥିଲେ l ସେ କହିଥିଲେ ଯେ ବିଶ୍ୱବିଦ୍ୟାଳୟର କ୍ଷେତ୍ର-ଭିତ୍ତିକ ପଦକ୍ଷେପଗୁଡ଼ିକ ଏହି ଅଞ୍ଚଳର ଅତୀତକୁ ବୁଝିବା ପାଇଁ ନୂତନ ପଥ ଖୋଲିଛି ଏବଂ ପଶ୍ଚିମ ଓଡ଼ିଶାର ଐତିହାସିକ ଏବଂ ସାଂସ୍କୃତିକ ବର୍ଣ୍ଣନାକୁ ନୂତନ ଦୃଷ୍ଟିକୋଣ ଏବଂ ଏକ ନୂତନ ଦିଗ ପ୍ରଦାନ କରିବାରେ ସାହାଯ୍ୟ କରୁଛି l

ଏହି ଅବସରରେ ଡ଼. ଅତୁଲ କୁମାର ପ୍ରଧାନ ଏବଂ ଡ଼. ଚୂଡ଼ାମଣି ରଣାଙ୍କ ଦ୍ୱାରା ଲିଖିତ " ପ୍ରସ୍ତର ରୁ ବାସସ୍ଥାନ " ପୁସ୍ତକର ଉନ୍ମୋଚନ ହୋଇଥିଲା l ଏହି କାର୍ଯ୍ୟକ୍ରମର ଅଂଶବିଶେଷ ଭାବରେ, ଗଙ୍ଗାଧର ମେହେର ବିଶ୍ୱବିଦ୍ୟାଳୟ ପକ୍ଷରୁ ବରଗଡ଼ର ପୂର୍ବତନ ସାଂସଦ ତଥା ବିଶିଷ୍ଟ ଇତିହାସକାର ଓ ପ୍ରତ୍ନତତ୍ତ୍ୱବିତ୍ ଡ. ପ୍ରଭାସ କୁମାର ସିଂହ ଏବଂ ଶ୍ରୀ ରମେଶ ପ୍ରସାଦ ସ୍ୱାଇଁଙ୍କୁ ଏହି ଅଞ୍ଚଳର ଇତିହାସ, ସଂସ୍କୃତି ଓ ପ୍ରତ୍ନତତ୍ତ୍ୱ କ୍ଷେତ୍ରରେ ସେମାନଙ୍କର ମୂଲ୍ୟବାନ ଅବଦାନ ପାଇଁ ସମ୍ବର୍ଦ୍ଧିତ କରାଯାଇଥିଲା l ଏହା ସହିତ, ବିଶ୍ୱବିଦ୍ୟାଳୟର ପ୍ରତ୍ନତାତ୍ତ୍ୱିକ ଗବେଷଣା ଓ ଐତିହ୍ୟ ଅନ୍ୱେଷଣ ପ୍ରୟାସରେ ଅବଦାନ ପାଇଁ ପୁରୁଣଗଡ଼- ରେଢ଼ାଖୋଲର ଖନନ ଓ ଅନ୍ୱେଷଣ କାର୍ଯ୍ୟରେ ଅଂଶଗ୍ରହଣ କରିଥିବା ଛାତ୍ର ଛାତ୍ରୀ ମାନଙ୍କୁ ମଧ୍ୟ ପ୍ରମାଣପତ୍ର ପ୍ରଦାନ କରାଯାଇଥିଲା l 

ଏହି ଆଲୋଚନାଚକ୍ରରେ ସୁପ୍ରିମକୋର୍ଟର ବିଚାରପତି ଅଶୋକ ପଣ୍ଡାଙ୍କ ସମେତ ଭାରତୀୟ ପ୍ରତ୍ନତତ୍ୱ ସର୍ବେକ୍ଷଣ ସଂସ୍ଥା , କୋଲକାତା ସର୍କଲର ଡ. ଡି. ବି. ଗଡ଼ନାୟକ , ଡ. ସାକିର ହୁସେନ୍, ଡ. କ୍ଷୀରସିନ୍ଧୁ ବାରିକ, ଡ. ଦିବ୍ୟରଞ୍ଜନ ତ୍ରିପାଠୀ, ଡ. ସପନ ମିଶ୍ର, ଡ. ବିଭୁଦତ୍ତ ମିଶ୍ର, ଡ. ସୁଦାମ ଝଙ୍କାର, ଡକ୍ଟର ଜଗଦୀଶ ମିଶ୍ର ଏବଂ ଡ. ଚୂଡ଼ାମଣି ରଣା ପ୍ରମୁଖ ଅଂଶଗ୍ରହଣ କରିଥିଲେ l ଏଠାରେ ଉପସ୍ଥାପିତ ପ୍ରବନ୍ଧ ଓ ଆଲୋଚନା ମାଧ୍ୟମରେ ସମ୍ବଲପୁରର ଐତିହାସିକ ଓ ସାଂସ୍କୃତିକ ବିକାଶର ବିଭିନ୍ନ ଦିଗ ଯେପରିକି ପ୍ରତ୍ନତତ୍ତ୍ୱ, ଆଦିବାସୀ ଐତିହ୍ୟ, ସାହିତ୍ୟ, ଲୋକସଂସ୍କୃତି, ଭାଷା, ଧାର୍ମିକ ପରମ୍ପରା, ସାଂସ୍କୃତିକ ରୀତିନୀତି ଓ ଆଞ୍ଚଳିକ ପରିଚୟ ଉପରେ ଆଲୋକପାତ କରାଯାଇଥିଲା l ଡକ୍ଟର ସନ୍ତୋଷ କୁମାର ମଲ୍ଲିକଙ୍କ ଧନ୍ୟବାଦ ଅର୍ପଣ କରିଥିଲେ l