13-Aug-2026

ସିନ୍ଧେକେଲା(ଅନୀଲ କୁମାର ତ୍ରିପାଠୀ):  ବଲାଙ୍ଗୀର ଜିଲ୍ଲା ସିନ୍ଧେକେଲା ଗଡ଼ଜାତ ଅଞ୍ଚଳର ଅଧିଷ୍ଠାତ୍ରୀ ଦେବୀ ମାଁ ଦ୍ୱାରସେହ୍ନୀ ମନ୍ଦିରରୁ ଚୋରୀ। ଚୋରୀ କୁ ନେଇ ଜନ ଅସନ୍ତୋଷ ବଢ଼ିବାରେ ଲାଗିଥିବା ବେଳେ ମାଁ କଣ କହିବେ ତାଙ୍କ ଉପରେ ସମସ୍ତଙ୍କ ନଜର ରହିଥିଲା। ସେଥିପାଇଁ ସିନ୍ଧେକେଲା ଗଡତିଆ ପରିବାରର ମୁଖ୍ୟ ତଥା ଦେବୀଙ୍କ ମୁଖ୍ୟ ସେବକ ଅରୁଣ ସିଂହଦେଓ ଙ୍କ ପ୍ରତ୍ୟକ୍ଷ ତତ୍ୱାବଧାନରେ 
ବୁଢ଼ାରଜା ଙ୍କ ଝାପିତଳ ମନ୍ଦିର (ଦେବୀ ଙ୍କ ବିଶେଷ ମନ୍ଦିର ଯୋଉ ଠାରେ ଦେବୀ ଙ୍କୁ କୌଣସି ଜରୁରୀ ସମୟରେ ଆବିର୍ଭାବ କରାଯାଏ ) ରେ ମନ୍ଦିରର ସମସ୍ତ ପ୍ରକାର ସେବାୟତ ମାନଙ୍କ ଉପସ୍ଥିତିରେ 
କାଳିସୀ ଦେହରେ ଦେବୀ ଙ୍କୁ ପାରମ୍ପରିକ ରୀତିନୀତିରେ ଆବାହନ କରି ଚୋରୀ ବିଷୟରେ ପଚାରି ବୁଝିଥିଲେ। ତେବେ ଦେବୀ ଘଟଣା ବିଷୟରେ ପୁଙ୍ଖାନୁପୁଙ୍ଖ କହିବାପରେ ଚୋରି ଯୋଗୁଁ ମନ୍ଦିର ଅଶୁଦ୍ଧି ହେବାପରେ ମୁଁ ନିଜେ ମୋ ଦେହରେ ନିଆଁ ଲଗାଇ ଦେବା ଫଳରେ ଦୁର୍ବୃତ୍ତମାନେ ଭୟରେ କିଛି ଅଳଙ୍କାର ଛାଡ଼ି ପଳାଇବା ସହ ସେମାନେ ଆଣିଥିବା କିଛି ସାମଗ୍ରୀ ମଧ୍ୟ ଛାଡି ପଳାଇଥିଲେ। ତେଣୁ ମୁଁ ଠିକ୍ ସମୟରେ ଏମାନଙ୍କୁ ଠିକ୍ ଜାଗାରେ ପହଞ୍ଚାଇ ଦେବୀ ବୋଲି କହିଥିଲେ। ଏହି ସମୟରେ ଜଣେ ଭକ୍ତ ରୁପା ମୁକୁଟ ଦାନ କରିବା ପାଇଁ ଦେବୀ ଙ୍କୁ ପଚାରିବାରୁ ମୋ ଚୋରୀ ହୋଇଥିବା ଅଳଙ୍କାର ପୁଣି ଫେରି ଆସିବ ବୋଲି କହିଥିଲେ। ଏବଂ ମୁଖ୍ୟ ସେବାୟତ ଶ୍ରୀ ସିଂହଦେଓ ଙ୍କୁ ତୁରନ୍ତ ମନ୍ଦିର ସଫାକରି ଭଲଭାବେ ଶୁଦ୍ଧି କରି ଚଣ୍ଡୀ ପାଠ ସହ ମନ୍ଦିର ପ୍ରତିଷ୍ଠା କରିବାପାଇଁ ଆଦେଶ ଦେଇଥିଲେ। ତାଙ୍କ ଆଦେଶ ଅନୁଯାୟୀ ମଙ୍ଗଳବାର ପଣ୍ଡିତ ଉମାଶଙ୍କର ତ୍ରିପାଠୀ, ଭବାନୀ ଶଙ୍କର ତ୍ରିପାଠୀ 
ଙ୍କ ସହ ଅନ୍ୟ ପଣ୍ଡିତମାନେ ପୂଜା କାର୍ଯ୍ୟ ତୁଲାଇ ମନ୍ଦିର ପ୍ରତିଷ୍ଠା କରିଥିଲେ। ଏଥିରେ ଅରୁଣ ସିଂହଦେଓ ମୁଖ୍ୟ କର୍ତ୍ତା ଏବଂ ଉଦିତ ନାରାୟଣ ସିଂହ ଦେଓ, ସଞ୍ଜୟ ସିଂହ ଦେଓ, ଗୋପାଳ ସିଂହ ଦେଓ ଟୁଲୁ ସିଂ ଭୋଇ ସାହାଯ୍ୟ କରିଥିଲେ। 
ବୁଧବାର ସକାଳୁ ମାଁ ଙ୍କ ଦର୍ଶନ ପୁଣି ସୁଚାରୁରୂପେ ଆରମ୍ଭ ହୋଇଯାଇଛି। ଏହି ସମୟରେ ଅନ୍ୟ ମାନଙ୍କ ମଧ୍ୟରେ ପୂର୍ବତନ ମନ୍ତ୍ରୀ ଯୋଗେନ୍ଦ୍ର ବେହେରା ସକାଳୁ ଆସି ସଂନ୍ଧ୍ୟା ପର୍ଯ୍ୟନ୍ତ ରହି ପ୍ରତିଷ୍ଠା ପରେ ଦେବୀ ଙ୍କ ଦର୍ଶନ କରି ଫେରିଥିଲେ 
କଣ୍ଟାବାଞ୍ଜି ବିଧାୟକ ଲକ୍ଷ୍ମଣ ବାଗ ଙ୍କ ବଡ଼ଭାଇ ପୁରନ୍ଦର ବାଗ ମଧ୍ୟ ପହଞ୍ଚି ଉପସ୍ଥିତ ସେବାୟତମାନଙ୍କ ସହ ଆଲୋଚନା କରିଥିଲେ। ବଲାଙ୍ଗୀର ସାଂସଦଙ୍କ ବଙ୍ଗୋମୁଣ୍ଡା ବ୍ଲକ ପ୍ରତିନିଧି ଅନିଲ ନାଏକ, ରାଣୀପୁର ଝରିଆଲ ଟ୍ରଷ୍ଟ କମିଟିର ଆବାହକ ଅନିଲ କୁମାର ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ। 
ଏପଟେ ପୋଲିସ ପକ୍ଷରୁ ମଧ୍ୟ ତଦନ୍ତ କୁ ବ୍ୟାପକ କରାଯାଇ ସିସିଟିଭି ଫୁଟେଜ, କଲ୍ ଡମ୍ପିଂ, ଫିଙ୍ଗର ପ୍ରିଣ୍ଟ ଭଲି ବିଭିନ୍ନ ଦିଗକୁ ନେଇ ତନାଘନା ଚଳାଇଛି।