25-Jul-2026

କଣ୍ଟାବାଞ୍ଜି(ମୋହନ ସୁନା): ବଲାଙ୍ଗୀର ଜିଲ୍ଲା ର କଣ୍ଟାବାଞ୍ଜି ସରକାରୀ ଡାକ୍ତରଖାନାରୁ ଜଣେ ବ୍ୟକ୍ତି ନିଜ ମୃତ ପୁଅଙ୍କ ଶବକୁ କାନ୍ଧରେ ବୋହି ନେଉଥିବା ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଭିଡିଓକୁ ଆଧାର କରି ଡାକ୍ତରଖାନାରେ ଶବବାହକ ଗାଡ଼ି ଉପଲବ୍ଧ ନଥିବାରୁ ପରିବାର ଏଭଳି କରିବାକୁ ବାଧ୍ୟ ହୋଇଥିବା ଦାବି କରାଯାଉଛି। ତେବେ ଏହି ଦାବିକୁ ଡାକ୍ତରଖାନା କର୍ତ୍ତୃପକ୍ଷ ସମ୍ପୂର୍ଣ୍ଣ ଭାବେ ଖଣ୍ଡନ କରିଛନ୍ତି। ସୂଚନା ଅନୁଯାୟୀ, ବାହାର ରାଜ୍ୟରୁ ଆସି ବଙ୍ଗୋମୁଣ୍ଡା ଅଞ୍ଚଳରେ ପଲିଥିନ ସଂଗ୍ରହ କରି ଜୀବିକା ନିର୍ବାହ କରୁଥିବା ଜଣେ ଶ୍ରମିକଙ୍କ ପୁଅ ଗୁରୁତର ଅସୁସ୍ଥ ହୋଇପଡ଼ିବାରୁ ତାଙ୍କୁ କଣ୍ଟାବାଞ୍ଜି ସରକାରୀ ଡାକ୍ତରଖାନାକୁ ଅଣାଯାଇଥିଲା। ଚିକିତ୍ସା ପରେ ଡାକ୍ତର ଶିଶୁଟିକୁ ମୃତ ଘୋଷଣା କରିଥିଲେ। ଆଇନଗତ ପ୍ରକ୍ରିୟା ଅନୁଯାୟୀ ଶବ ବ୍ୟବଚ୍ଛେଦ କରାଯିବ ବୋଲି ପରିବାରକୁ ସୂଚନା ଦିଆଯାଇଥିଲା। ହସ୍ପିଟାଲ ପକ୍ଷର କହିବା ଅନୁସାରେ, ଶବ ବ୍ୟବଚ୍ଛେଦ କଥା ଜାଣିବା ପରେ ମୃତ ଶିଶୁର ବାପା ଏହାକୁ ବିରୋଧ କରି ମୃତଦେହକୁ କାନ୍ଧରେ ବୋହି ହସ୍ପିଟାଲରୁ ବାହାରକୁ ନେବାକୁ ଚେଷ୍ଟା କରିଥିଲେ। ସେହି ସମୟର ଦୃଶ୍ୟ ହିଁ ଭିଡିଓରେ ରେକର୍ଡ ହୋଇ ସୋସିଆଲ ମିଡିଆରେ ପ୍ରଚାରିତ ହୋଇଛି।
ପରେ ହସ୍ପିଟାଲ କର୍ମଚାରୀ ଓ ପୋଲିସ ତାଙ୍କୁ ଅଟକାଇ ବୁଝାସୁଝା କରିଥିଲେ। ଆବଶ୍ୟକ କାଗଜପତ୍ର ଓ ଆଇନଗତ ପ୍ରକ୍ରିୟା ସମ୍ପୂର୍ଣ୍ଣ ହେବା ପରେ ହସ୍ପିଟାଲର ଶବବାହକ ଗାଡ଼ିରେ ମୃତଦେହକୁ ବଙ୍ଗୋମୁଣ୍ଡା ପଠାଯାଇଥିବା କର୍ତ୍ତୃପକ୍ଷ କହିଛନ୍ତି। ଶବବାହକ ଗାଡ଼ିର ଚାଳକ କହିଛନ୍ତି ଯେ, ଘଟଣା ସମୟରେ ଡାକ୍ତରଖାନାରେ ଶବବାହକ ଗାଡ଼ି ଉପଲବ୍ଧ ଥିଲା ଏବଂ ପରେ ସେ ନିଜେ ମୃତଦେହକୁ ବଙ୍ଗୋମୁଣ୍ଡାରେ ପହଞ୍ଚାଇଥିଲେ। ନେଇ ମେଡିକାଲ ଅଫିସର ଡା. ରାକେଶ ପଣ୍ଡିତ କହିଛନ୍ତି ଯେ, ସୋସିଆଲ ମିଡିଆରେ ପ୍ରଚାରିତ ତଥ୍ୟ ଏକପାଖିଆ। ତାଙ୍କ କହିବା ଅନୁସାରେ, ମୃତ ଶିଶୁର ବାପା ଶବ ବ୍ୟବଚ୍ଛେଦ ଏଡ଼ାଇବା ପାଇଁ ମୃତଦେହକୁ ନେଇ ଚାଲିଯିବାକୁ ଚେଷ୍ଟା କରୁଥିଲେ। ପରେ ପୋଲିସ ଉପସ୍ଥିତିରେ ସମସ୍ତ ପ୍ରକ୍ରିୟା ସରିବା ପରେ ହସ୍ପିଟାଲର ଶବବାହକ ଗାଡ଼ିରେ ମୃତଦେହକୁ ପଠାଯାଇଥିଲା।