14-May-2026

(ରଂଜିତ ମହାନ୍ତି )
 ବରୀ ତହସିଲ ଅଧୀନରେ ବେଧଡ଼କ ଭାବେ ଚାଲିଛି ମାଟି, ବାଲି ଲୁଟ୍। ଧର୍ମକୁ ଆଖିଠାର ସଦୃଶ କାଟାଯାଉଛି ରସିଦ୍। ସରକାରୀ ଖାତାକୁ ୫ହଜାର ଯାଉଥିଲା ବେଳେ ବେସରକାରୀ ଭାବେ ହଜାରହଜାର ଟଙ୍କା ଆଦାୟ କରାଯାଉଛି। ସେପଟେ ୫୨୪୦ ଟଙ୍କାର ଗୋଟିଏ ଜରିମାନା ରସିଦ୍ କାଟି ମାଫିଆ ଦିନକୁ ଶହଶହ ଟ୍ରିପ୍ ମାଟି ବିକ୍ରିକରି ମାଲାମାଲ ହେଉଛନ୍ତି। ଶହଶହ ଟ୍ରିପ୍ ମାଟିରେ ଡିହବନ୍ଧା ଯାଉଥିବା ଏକ ସ୍ଥାନରୁ ମାଟି ଆଣିବାକୁ ପ୍ରଶାସନ କିପରି ଭାବେ ଅନୁମତି ଦେଇଛି ତା'ର ଯାଞ୍ଚ କଲାବେଳେ ଏପରି ତଥ୍ୟ ପଦାକୁ ଆସିଛି । ତହସିଲ ପ୍ରଶାସନର ବ୍ୟବସ୍ଥା ଅନୁସାରେ ୫୨୪୦ ଟଙ୍କାର ଜରିମାନା ରସିଦ୍ କାଟି ମନଇଛା ମାଟି ଉଠାଅ ନୀତି ଚାଲିଛି। ଜରିମାନା ଆଦାୟ କରାଯାଇଥିବା ରସିଦ୍‌ରେ ଉକ୍ତଅର୍ଥ ବେଆଇନ ଭାବେ ମାଇନିଂ ଓ ମିନେରାଲ ପରିବହନ କରିଥିବାରୁ ୧୯୬୩ ନିୟମ ୩୧(ଆଇ) ଅନୁସାରେ ରୟାଲଟି ବାବଦ ଆଦାୟ କରାଗଲା ବୋଲି ଉଲ୍ଲେଖ କରାଯାଇଛି। ଯାହାକୁ ତହସିଲ ପ୍ରଶାସନର ମୌଖିକ ଭାବେ ମାଟି ଉଠାଣ ପାଇଁ ଅନୁମତି ଭାବେ ଧରି ନିଆଯାଇଛି। ଉକ୍ତ ରସିଦ୍ କୌଣସି ମାଟି ଉଠାଣ ପାଇଁ ପ୍ରଶାସନର ଅନୁମତି ପତ୍ର ନୁହେଁ । ରସିଦ୍ କାଟି କିଛି ଅର୍ଥ ସରକାରୀ ଖାତାକୁ ଦେଇ ଅଲିଖିତ ଅନୁମତି ପାଇଁ ବେସରକାରୀ ଭାବେ ହଜାରହଜାର ଟଙ୍କା
ଆଦାୟ ହେଉଥିବା ଜଣାପଡ଼ିଛି। ସେପଟେ ଥରେ ଜରିମାନା ଅର୍ଥ ରସିଦ୍ ହାତରେ ପଡ଼ିଲେ ଶହଶହ ଟ୍ରିପ୍ ମାଟି ଉଠାଇ ବିକ୍ରି ଚାଲିଛି  ସରକାରୀ କଟକଣା ଦିଗହରା
କେଉଁଠାରେ ବିଭିନ୍ନ ଯୋଜନାରେ ମାଟି ଗଚ୍ଛିତ କରାଯାଉଛି। ଏସଂପର୍କରେ ବରୀ ତହସିଲଦାର ଦୀପ୍ତିମୟୀ ବେହେରାଙ୍କୁ ପଚାରିବାରୁ କେହିକେହି ନିଜ ଜମିରୁ ମାଟି, ବାଲି ଉଠାଇବାକୁ ଦରଖାସ୍ତ କରିବାରୁ ସେମାନଙ୍କଠାରୁ ରସିଦ୍ କାଟି ଅନୁମତି ଦିଆଯାଉଛି ବୋଲି କହିଛନ୍ତି। ସେମାନେ ନିଜ ଜମିରୁ ୬ଇଞ୍ଚରୁ ୧ ଫୁଟ ମଧ୍ୟରେ ମାଟି ବାଲିଉଠାଇ ପାରିବେବୋଲି ମତ ଦେଇଛନ୍ତି। ତେବେ ଏଠାରେ ପ୍ରଶ୍ନ ଉଠେ ଯଦି ଏହା ପ୍ରଶାସନିକ ବ୍ୟବସ୍ଥା ତେବେ କଟାଯାଉଥିବା ରସିଦ୍‌ରେ ତାହା ଉଲ୍ଲେଖ ରହିବା କଥା। କେଉଁ ଜମିରୁ ମାଟି ଉଠିବ କେଉଁଠାରେ ପଡ଼ିବ, କେତେ ଫୁଟ୍ ଗଭୀର ପର୍ଯ୍ୟନ୍ତ ଖୋଳାଯାଇ ପାରିବ, କେଉଁକେଉଁ ଟ୍ରାକ୍ଟରରେ ପରିବହନ କରା‌ଯିବ ତାହାର ସ୍ପଷ୍ଟ ଚିତ୍ର ରହିବାର ଆବଶ୍ୟକତା ରହିଛି। ସେହିପରି ଲୋକମାନେ ପ୍ରଦାନ କରୁଥିବା ଜମି ପଟାର ଯାଞ୍ଚ ହେବାର ଆବଶ୍ୟକତା ରହିଛି। ଜମି ଖାଲୁଆ କିମ୍ବା ନଦୀ ଗର୍ଭରେ ଥିଲେ ଏଥିରୁ କେମିତି ମାଟି ଉଠାଇବାକୁ ଅନୁମତି ଦିଆଯାଉଛି। ସବୁଠାରୁ ଗୁରୁତର କଥାହେଲା ଥରେ କଟାଇଥିବା ରସିଦ୍‌ର ତାରିଖକୁ ଟାମ୍ପରିଂ କରି ବହୁଦିନ ଧରି ମାଟି ଉଠାଯାଉଥିବା ପରି ଘଟଣା ମଧ୍ୟ ନଜରକୁ ଆସିଛି । ତହସିଲ ପ୍ରଶାସନ ଜରିମାନା ରସିଦ୍‌ଟିଏ କାଟିଦେଇ ମାଲାମାଲ ହେଉଥିବାବେଳେ ମାଟି ବ୍ୟବସାୟୀମାନେ ଗୋଟିଏ ରସିଦ୍ କାଟି ଦେଇ ଶହଶହ ଟ୍ରିପ୍ ମାଟି ବିକ୍ରି କରୁଛନ୍ତି। ସେହି ସମାନ ଅବସ୍ଥା ବେଆଇନ ବାଲି ଘାଟର | ବେଆଇନ ବାଲି ଘାଟରୁ ବାଲି ଉଠାଅ, ହୋର୍ଡିଂ କର, ସବୁ ସମ୍ଭବ ହୋଇପାରୁଛି। ମାଫିଆଙ୍କ ବାଲିଲୁଟ୍ ପୂର୍ବ ପରି ଅତୁଟ ରହିଛି | ତେବେ ରାଜ୍ୟ ସରକାରଙ୍କ ଲଘୁ ଖଣିଜ ଆଇନର କଟକଣା ବରୀରେ ଦିଗହରା ହୋଇ ପଡ଼ିଛି।