24-Jan-2026

ବଲାଙ୍ଗୀର(ପ୍ରେରଣା ଖବର): ଗତକାଲି ସ୍ଥାନୀୟ ସାମ୍ବାଦିକ ଭବନ ଠାରେ ବୀର ସୁରେନ୍ଦ୍ର ସାଏ ପବ୍ଲକି ସ୍କୁଲର ୧୫ତମ ବାର୍ଷିକୋତ୍ସବ ଅନୁଷ୍ଠିତ ହୋଇଯାଇଛି । ସଭା ପ୍ରାରମ୍ଭରେ ବାଗ୍‌ଦେବୀ ସରସ୍ୱତୀ, ନେତାଜୀ ସୁବାଷ ଚନ୍ଦ୍ର ବୋଷ ଓ ବୀର ସୁରେନ୍ଦ୍ର ସାଏଙ୍କ ଫଟୋଚିତ୍ରରେ ମାଲ୍ୟାର୍ପଣ କରି ସଭାର ଶୁଭାରମ୍ଭ କରିଥିଲେ । ଏହି ସଭାରେ ମୁଖ୍ୟ ଅତିଥି ଭାବରେ ବଲାଙ୍ଗୀର ବ୍ଲକ ଶିକ୍ଷା ଅଧିକାରୀ ନୀଳମଣି ପଟେଲ ଯୋଗ ଦେଇ ଜଣେ ଛାତ୍ରର କ୍ୟାରିୟର ଗଠନରେ ଶିକ୍ଷକ, ଅଭିଭାବକ ଓ ସ୍କୁଲର ଗୁରୁତତ୍ୱପୂର୍ଣ୍ଣ ଭୂମିକା ରହିଛି ବୋଲି କହିଥିଲେ । ଥିଲେ । ସ୍କୁଲର ଅଧ୍ୟକ୍ଷ ଜିତୁ ପ୍ରଧାନଙ୍କ ପରିଚାଳନାରେ ଅନୁଷ୍ଠିତ ଏହି ସଭାରେ ସମ୍ମାନିତ ଅତିଥି ଭାବରେ ସ୍କୁଲର ପ୍ରତିଷ୍ଠାତା ସଂପାଦକ ସୁବାଷ କୁମାର ରାଉତ, ଅମୃତି ରାଉତ, ବଲାଙ୍ଗୀର ଓଏସ୍‌ଆର୍‌ଟିସି ର ମେନେଜର ଅମିତ କୁମାର ମିଶ୍ର, ସାପ୍ତାହିକ ‘ପ୍ରେରଣା’ର ସଂପାଦକ ରଘୁ ନନ୍ଦନ ସିଂହ, ସ୍କୁଲର ସଭାପତି ଦିଲୀପ ପଣ୍ଡା ଓ ମୁଖ୍ୟ ବକ୍ତା ଭାବରେ ଅଧ୍ୟାପକ ଡ. କବିରାଜ ଭୋଇ ଯୋଗ ଦେଇ ସେବା ମନୃବୃତ୍ତି ନେଇ ତଥା ସ୍ପଳ୍ପ ଖର୍ଚ୍ଚରେ ପିଲା ମାନଙ୍କୁ ଉନ୍ନତମାନର ଶିକ୍ଷା ସେବା ପ୍ରଦାନ କରୁଥିବା ବୀର ସୁରେନ୍ଦ୍ର ସାଏ ପବ୍ଲିକ ସ୍କୁଲ ଜିଲ୍ଲା ତଥା ରାଜ୍ୟରେ ନିଜର ପରିଚୟ ସୃଷ୍ଟି କରୁ ବୋଲି କାମନା କରିଥିଲେ । କାର୍ଯ୍ୟକ୍ରମକୁ ଜାଗୃତି ପ୍ରଧାନ ଓ ବବିତା ଦାସ ପରିଚାଳନା କରିଥଲେ । ପରେ ସ୍କୁଲର କୁନିକୁନି ଛାତ୍ରଛାତ୍ରୀ ମାନେ ବିଭିନ୍ନ ନାଚଗୀତ ପରିବେଷଣ କରିଥିଲେ । କୃତୀ ପ୍ରତିଯୋଗୀ ମାନଙ୍କୁ ଅତିଥିଗଣ ପୁରସ୍କୃତ କରିଥିଲେ । ଏଥିରେ ସ୍କୁଲର ସମସ୍ତ ଶିକ୍ଷକଶିକ୍ଷୟିତ୍ରୀ ସହଯୋଗ କରିଥିଲେ ।