24-Jan-2026

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ)ସୋନପୁର ସହରରେ ଥିବା ପୁରୁଣା ବସଷ୍ଟାଣ୍ଡ କୁ ସମଲେଶ୍ଵରୀ ମନ୍ଦିର ପାଖରେ ଥିବା ମ୍ୟୁନିସିପାଲଟି କଲ୍ୟାଣ ମଣ୍ଡପ ପାର୍ଶ୍ଵକୁ ସ୍ଥାନାନ୍ତରିତ କରାଯାଇଛି। ପୁରୁଣା ବସଷ୍ଟାଣ୍ଡ ଥିବା ସ୍ଥାନରେ ରାଜ୍ୟ ସରକାରଙ୍କ ପକ୍ଷରୁ ନୂତନ୍ ଭାବରେ ବସଷ୍ଟାଣ୍ଡ ନିର୍ମାଣ ହେବା ନେଇ ଟେଣ୍ଡର ପ୍ରକ୍ରିୟା ସରିଥିବା ବେଳେ ଦୀର୍ଘ ଦିନ ହେଲା ନିର୍ମାଣକାରୀ ସଂସ୍ଥା ଅସ୍ଥାୟୀ କ୍ୟାମ୍ପ କରି ରହିଛି । ନୂତନ ବସଷ୍ଟାଣ୍ଡ ନିର୍ମାଣ ପାଇଁ ଗତବର୍ଷ ଅକ୍ଟୋବର ୨ ତାରିଖ ଦିନ ଉପ ମୁଖ୍ୟମନ୍ତ୍ରୀ ଏବଂ ବଲାଙ୍ଗୀର ସାଂସଦ ଭିତ୍ତପ୍ରସ୍ତର ସ୍ଥାପନ କରିଥିଲେ। ଅସ୍ଥାୟୀ ବସଷ୍ଟାଣ୍ଡ ପାଇଁ ଜିଲ୍ଲାପାଳଙ୍କ ବାରମ୍ବାର ଉଦ୍ୟମ, ପ୍ରଚେଷ୍ଟା ଏବଂ ମାରାଥନ ଗସ୍ତ ଲାଗି ରହିଥିବା ବେଳେ ଆଜି ବାସ୍ତବ ରୂପ ନେଇଛି ବସଷ୍ଟାଣ୍ଡ । ସେପଟେ କିଛି କୁଚକ୍ରୀ ଗୋଷ୍ଠୀ ବାଧା ସୃଷ୍ଟି କରୁଥିବା ଏବଂ ଏହାଯୋଗୁଁ ନୂତନ ବସଷ୍ଟାଣ୍ଡ ନିର୍ମାଣ ନେଇ ସହର ରେ ବେଶ୍ ଚର୍ଚ୍ଚା ହେଉଥିଲା। ଶେଷରେ ଆଜି ପବିତ୍ର ଶ୍ରୀପଞ୍ଚମୀ ଦିନ ଅସ୍ଥାୟୀ ବସଷ୍ଟାଣ୍ଡ କୁ କାର୍ଯ୍ୟକ୍ଷମ କରାଯାଇଥିବା ବେଳେ ନୂତନ ବସଷ୍ଟାଣ୍ଡ ନିର୍ମାଣର ପଥ ସୁଗମ୍ୟ ହୋଇଥିବାରୁ ସହର ରେ ଖୁସି ର ଲହରୀ ଖେଳି ଯାଇଛି । ନୂତନ ବସଷ୍ଟାଣ୍ଡ ର ଭିତ୍ତିପ୍ରସ୍ତର ସ୍ଥାପନ କରିଥିବା ଓଡ଼ିଶାର ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓ ଓ ସାଂସଦ ସଙ୍ଗୀତ କୁମାରୀ ସିଂଦେଓ ଙ୍କୁ ମଧ୍ୟ ସହର ର ବୁଦ୍ଧିଜୀବି, ବସ ମାଲିକ ସଂଘ ତଥା ଜନସାଧାରଣ ଧନ୍ୟବାଦ୍ ଜ୍ଞାପନ କରିଛନ୍ତି। ବର୍ତ୍ତମାନ ପାଇଁ ୫୮ କୋଟି ୩୬ ଲକ୍ଷ ଟଙ୍କା ମଞ୍ଜୁର ହୋଇଥିବା ଏହି ମେଗା ପ୍ରକଳ୍ପ କୁ ଓବିସିସି କମ୍ପାନୀ ହାତ କୁ ନେଇଥିବା ବେଳେ ପ୍ରକଳ୍ପ ପୁରା ହେବା ଯାଏ ସମୁଦାୟ ୮୦ କୋଟି ଟଙ୍କା ବଜେଟରେ ବ୍ୟୟ ମଞ୍ଜୁର ହେବ ବୋଲି ବିଶ୍ଵସ୍ଥ ସୂତ୍ରରୁ ସୂଚନା ମିଳିଛି l