06-Jan-2026

(ପ୍ରିୟଦର୍ଶିନୀ ପାତ୍ର)
ଶେଷରେ ରୋକ ଲଗାଇଛି ପ୍ରଶାସନ । 
କରଫ୍ୟୁ ଲଗାଇ ଭିଡ ନ ଜମାଇବା ସହ ବିବାଦୀୟ ପୌଷ ମଣ୍ଡେଇକୁ ରୋକ ଲଗାଇ ୧୬୩ ବିଏନଏସ ଜାରି କରାଯାଇଛି । ଏନେଇ  ନିର୍ଦ୍ଧେଶ ଜାରିହେବା ପରେ ପ୍ରଶାସନ ଡାକବାଜି ସହ ପ୍ରଚାର କରିବା ସହ ଚାଉଁରିଆ ମନ୍ଦିର ପରିସର ଓ ଅଞ୍ଚଳକୁ ସିଲ କରି ଲୋକ ଓ ବିଭିନ୍ନ ଅଞ୍ଚଳରୁ ଆସିଥିବା ବ୍ୟବସାୟୀଙ୍କୁ ବାରଣ କରାଯାଇଛି । ପ୍ରାୟ ୨୦୦ବର୍ଷ ପୂର୍ବର ପାରମ୍ପରିକ କୋଷାଗୁମୁଡା ବ୍ଲକ ତାରାଗାଁ ପଞ୍ଚାୟତର କୋଟାଗାଁ ପ୍ରସିଦ୍ଧ ପୌଷ ମଣ୍ଡେଇ ଯାତ୍ରା । ଜାନୁଆରୀ ମାସ ୬ତାରିଖରେ  ହେବାକୁ ଥିବା ପୌଷ ମଣ୍ଡେଇ ଯାତ୍ରାକୁ ହେବାକୁ ଧାର୍ଯ୍ୟ ହୋଇଥିବା ବେଳେ ଗତ ମଙ୍ଗଳବାର ମଣ୍ଡେଇ ଯାତ୍ରାକୁ ଡାକବାଜି ସହାୟତାରେ ଆନଉନ୍ସ କରିବାକୁ ନେଇ କୋଟାଗାଁ ଓ ତାରାଗାଁ ଗୋଷ୍ଠୀ ମଧ୍ୟରେ ଉତ୍ତେଜନା ପ୍ରକାଶ ପାଇବା ସହ ଗଣ୍ଡଗଳ ହୋଇଥିବା ବେଳେ ବୁଧବାର ଠାରୁ ତାରାଗାଁ ଗ୍ରାମର ସମସ୍ତ ଦୋକାନ ବଜାର ୬ଦିନ ହେବ ବନ୍ଦ କରାଯାଇଛି । ଏଇଭଳି କି ତାରାଗାଁ ଗ୍ରାମବାସୀ ଛକର ଚାରିଦିଗରେ ରବିବାର ରାତିରେ ଗଛ କାଟି ରାସ୍ତା ଅବରୋଧ କରି ରଖିଥିଲେ । କୋଡିଙ୍ଗା ଥାନାରେ ଉଭୟ ଗୋଷ୍ଠୀ ଏତଲା ଦେଇଥିବା ବେଳେ ଏନେଇ କୋଡିଙ୍ଗା ପୋଲିସ ମାମଲା ରୁଜୁ କରି ୫ଜଣଙ୍କୁ କୋର୍ଟ ଚାଲାଣ କରିଥିବା ସୂଚନା ମିଳିଛି ।

ଯାହାକୁ ନେଇ ସ୍ଥାନୀୟ ବୀର ଚାଉଁରୀଆ ମନ୍ଦିର ଓ ଯାତ୍ରାକୁ ନେଇ ବିବାଦ ଘନେଇବାରେ ଲାଗିଛି । କୋଡିଙ୍ଗା ଥାନା ଅଧିନ ତାରାଗାଁ ପଞ୍ଚାୟତରେ ପ୍ରତିବର୍ଷ ପାରମ୍ପରିକ ପୁଷ ମଣ୍ଡେଇ ପାଳିତ ହୋଇଥାଏ । ଏହି ଅଞ୍ଚଳର ସବୁଠାରୁ ବଡ ଯାତ୍ରା ୩ଦିନ ଧରି ଚାଲୁଥିବା ଏହି ଐତିହାସିକ ପୌଷ ମଣ୍ଡେଇ ଯାତ୍ରା ହୋଇଥିବା ହେତୁ ହଜାର ହଜାର ସଂଖ୍ୟାରେ ଶ୍ରଦ୍ଧାଳୁଙ୍କ ସମାଗମ ହେବା ସହିତ ଅଞ୍ଚଳର ପ୍ରାୟ ୯୦୦ ଲାଠି, କୁର୍ଚି ଗ୍ରାମର ଅଧିଷ୍ଠାତା ଦେବତା ବୀର ଚାଉଁରୀଆ ନିକଟରେ ରୁଣ୍ଡ ହୋଇ ଯଥା ବିଧିରେ ପୂଜା କରାଯାଉଥିଲା । ଆଜକୁ ପ୍ରାୟ ୩ବର୍ଷ ହେବ ଚାଉଁରିଆ ମନ୍ଦିରର ଜାଗା ତାରାଗାଁ ମୌଜାରେ ଥିବା ବେଳେ କୋଟାଗାଁ ମଣ୍ଡେଇ ଆୟୋଜନ କରିବା ନେଇ ବିବାଦ ହୋଇଥିଲା । ବିବାଦ ସତ୍ଵେ ବିଗତ ୨ବର୍ଷ  ମଣ୍ଡେଇ ଆୟୋଜନ କରାଯାଇଥିଲା । କୋଟାଗାଁ ଓ ତାରାଗାଁ ଗ୍ରାମ ମଧ୍ୟରେ ଆୟୋଜନକୁ ନେଇ ବିବାଦ ହେବାପରେ ପୌଷ ମଣ୍ଡେଇ ହେବାକୁ ନେଇ କଲ୍ପନାଜଳ୍ପନା ଦେଖାଦେଇଥିଲା । ଉଭୟ ପକ୍ଷ କୋଡିଙ୍ଗା ଥାନା, କୋଡିଙ୍ଗା ତହସିଲର ଦ୍ଵାରସ୍ଥ ହୋଇଥିବା ବେଳେ ମଣ୍ଡେଇ ଆୟୋଜନକୁ ସ୍ଥଗିତ ରଖି ନିଷ୍କର୍ଷ ନ ବାହାରିବା ସହ ସ୍ଥାନୀୟ ଅଞ୍ଚଳରେ ୬୦ଦିନ ପର୍ଯ୍ୟନ୍ତ କରଫ୍ୟୁ ବଳବତ୍ତର ରହିବ ବୋଲି ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।  ମନ୍ଦିର ପରିସର ଓ ତାରାଗାଁ ଠାରେ ୩ ପ୍ଲାଟୁନ ପୋଲିସ ମୁତୟନ ହେବା ସହ ଏକଜୁକ୍ୟୁଟିଭ ମାଜିଷ୍ଟ୍ରେଟ କୋଡିଙ୍ଗା ତହସିଲଦାର ତୁଳା ମୁଦୁଲି, ଆଡିସନାଲ ଏସପି ଆଦିତ୍ୟ ସେନ, ପାପଡାହାଣ୍ଡି ଏସଡିପିଓ ସତ୍ୟଜିତ କାଣ୍ଡେଲକେଲ ଉପସ୍ଥିତ ରହି ଅଞ୍ଚଳ ଉପରେ ନଜର ରଖିଥିବା କୋଡିଙ୍ଗା ଥାନା ଅଧିକାରୀ ଯୁଗଳ ଶବର ସୂଚନା ଦେଇଛନ୍ତି ।