11-Nov-2025

ବଲାଙ୍ଗିର(ପ୍ରେରଣା ଖବର) : ବଲାଙ୍ଗିର ମାଟିର ସମ୍ବାଦପତ୍ର ‘କୋଶଳ ପ୍ରବାହ’ର ରୌପ୍ୟ ଜୟନ୍ତୀ ସମାରୋହ ଅନୁଷ୍ଠିତ ହୋଇଯାଇଛି। ସ୍ଥାନୀୟ ଟାଉନ ବାଳିକା ଉଚ୍ଚ ବିଦ୍ୟାଳୟ ପରିସରରେ ‘କୋଶଳ ପ୍ରବାହ’ର ସଂପାଦକ ଆନଂଦ ଚଂଦ୍ର ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ପୂର୍ବତନ ମନ୍ତ୍ରୀ ନରସିଂହ ମିଶ୍ର ଯୋଗ ଦେଇ ସମ୍ବାଦପତ୍ର ଅନୁସଂଧାନମୂଳକ ସମ୍ବାଦ ପରିବେଷଣ ପ୍ରତି ଆଗ୍ରହ ପ୍ରକାଶ କଲେ ଅନେକ ସମସ୍ୟାରୁ ମୁକ୍ତି ମିଳିପାରିବ ବୋଲି ମତବ୍ୟକ୍ତ କରିଥିଲେ। ଖଡ଼ିଆଳ ମାଟିର ସୁଯୋଗ୍ୟ ସନ୍ତାନ ସମ୍ଭ ଲେଖକ ତଥା ଅବସରପ୍ରାପ୍ତ ଇନ୍‌କମ୍ ଟେକ୍ସ କମିଶନର ଶ୍ରୀକାନ୍ତ ଚାଟାର୍ଜୀ ମୁଖ୍ୟବକ୍ତା ଭାବରେ ଯୋଗଦାନ କରି ‘ଅଂଧ ପ୍ରଥା ପରମ୍ପରା ଓ ଆମ ସମାଜ’ ଶୀର୍ଷକରେ ସାରଗର୍ଭକ ଅଭିଭାଷଣ ପ୍ରଦାନ କରିଥିଲେ। ବଲାଙ୍ଗିର ସଦର ବ୍ଲକ୍‌ର ଅଧ୍ୟକ୍ଷା ଶ୍ରୀମତୀ ସରିତା ବାଗ, ବିଜେପିର ବରିଷ୍ଠ ନେତା ଗୋପାଳଜୀ ପାଣିଗ୍ରାହୀ ଏବଂ ଟିଜିଏଚ୍‌ଏସ୍‌ର ପ୍ରଧାନ ଶିକ୍ଷକ ନରେନ୍ଦ୍ରନାଥ ମିଶ୍ର ବରେଣ୍ୟ ଅତିଥି ଭାବେ ମଂଚ ମଣ୍ଡନ କରିଥିଲେ। ସଭା ସଂଚାଳନା ଦାୟିତ୍ୱରେ ରହିଥିଲେ ସାରସ୍ୱତ ସାଧିକା ସବିତା ମହରା। ସାମ୍ବାଦିକ ରାଜେଶ ଦଣ୍ଡସେନା ଅତିଥିମାନଙ୍କୁ ମଂଚକୁ ଆମନ୍ତ୍ରଣ କରିଥିବା ବେଳେ ସାମ୍ବାଦିକ ଦେବାଶିଷ ମିଶ୍ର ଅତିଥିମାନଙ୍କ ପରିଚୟ ପ୍ରଦାନ କରିଥିଲେ। ଧନ୍ୟବାଦ ଅର୍ପଣ କରିଥିଲେ ‘କୋଶଳ ପ୍ରବାହ’ର ପରିଚାଳନା ସଂପାଦକ ଶମ୍ଭୁନାଥ ସାହୁ। ରୌପ୍ୟ ଜୟନ୍ତୀ ସମାରୋହ ଆୟୋଜନ ଅବସରରେ ‘କୋଶଳ ପ୍ରବାହ ସମ୍ମାନ-୨୦୨୫’ ଗ୍ରହଣ କରିଥିଲେ ମୁଖ୍ୟବକ୍ତା ଶ୍ରୀକାନ୍ତ ଚାଟାର୍ଜୀ। ଖଡ଼ିଆଳ ମାଟିର କବି ସୁଶାନ୍ତ କୁମାର ବିଶି ‘କବି ଛନ୍ଦାଚରଣ ସମ୍ମାନ’ ପାଇଥିବା ବେଳେ ‘କବି ଚତୁର୍ଭୁଜ ସାଆନ୍ତ ସମ୍ମାନ’ ପାଇଥିଲେ କବି ନବୀନ ବିଶ୍ୱବନ୍ଧୁ। ବଲାଙ୍ଗିର ଗୌରବ ସମ୍ମାନ ଗ୍ରହଣ କରିଥିଲେ ଡା. ବେଣୁଧର ପାଣ୍ଡେ। ‘ସଫଳ ଚାଷୀ ସମ୍ମାନ’ ସଂଜୟ କୁମାର ପଧାନ, ‘ସଫଳ ମହିଳା ସମ୍ମାନ’ ଅଖିଳ ଭାରତୀୟ ମାରୱାଡ଼ି ମହିଳା ସମ୍ମେଳନର ପ୍ରାନ୍ତୀୟ ଅଧ୍ୟକ୍ଷା ଶ୍ରୀମତୀ ବବିତା ଅଗ୍ରୱାଲ, ‘ସଫଳ ଉଦ୍ୟୋଗୀ ସମ୍ମାନ’ ଶାମୁକା ଷ୍ଟିଲ୍ ସେଣ୍ଟରର ସତ୍ୱାଧିକାରୀ କିଶୋର କୁମାର ରଥ, ‘ସଫଳ ନାରୀନେତ୍ର ସମ୍ମାନ’ ଶ୍ରୀମତୀ ସୁନୀତା ସାହୁ, ‘ସଫଳ ସାମାଜିକ କର୍ମୀ ସମ୍ମାନ’ ଦିନେଶ ନାଗ, ‘ସମାଜସେବୀ ସମ୍ମାନ’ ଶମ୍ଭୁ ନାଗ ଓ ବନମାଳୀ ନାଏକ ଏବଂ ‘ଯୁବନେତା ସମ୍ମାନ’ ଗୁଣସୁଗର ମାଝୀ ଗ୍ରହଣ କରିଥିଲେ। ରୌପ୍ୟ ଜୟନ୍ତୀ ସମାରୋହ ଉପଲକ୍ଷେ ଆୟୋଜିତ ବିଭିନ୍ନ ପ୍ରତିଯୋଗିତାର ବିଚାରକମାନେ ବରିଷ୍ଠ ଚିତ୍ରଶିଳ୍ପୀ ବାସୁଦେବ ମେହେର, କବି ଭାଗୀରଥି ମିଶ୍ର, ସାହିତ୍ୟିକ ସନାତନ ଠାକୁର, ଅଧ୍ୟାପକ ଜୟକୁମାର ଆଚାର୍ଯ୍ୟ, ଶିକ୍ଷକ ନୀଳାଂଚଳ ଚିର୍‌ଗୁନ୍‌, ଆଦିକନ୍ଦ ସାହୁ, ନାରାୟଣ ମିଶ୍ର ଓ ରଂଜିତ ମିଶ୍ରଙ୍କୁ ସମ୍ବର୍ଦ୍ଧିତ କରାଯାଇଥିବା ବେଳେ ବିଭିନ୍ନ ପ୍ରତିଯୋଗିତାରେ କୃତକାର୍ଯ୍ୟ ହୋଇଥିବା ଛାତ୍ରଛାତ୍ରୀମାନେ ଅତିଥିମାନଙ୍କ ଦ୍ୱାରା ପୁରସ୍କାର ଗ୍ରହଣ କରିଥିଲେ। ଓଡ଼ିଶାର ବିଭିନ୍ନ ସ୍ଥାନରୁ ଆସିଥିବା ‘କୋଶଳ ପ୍ରବାହ’ର ସାମ୍ବାଦିକମାନଙ୍କୁ ମଧ୍ୟ ରୌପ୍ୟ ଜୟନ୍ତୀ ସ୍ମାରକୀ ପ୍ରଦାନ କରାଯାଇଥିଲା। କାର୍ଯ୍ୟକ୍ରମ ପରିଚାଳନାରେ ପ୍ରଶାସନିକ ଅଧିକାରୀ ଶ୍ୟାମପ୍ରସାଦ ଗୁରୁ, ସିନିଅର କ୍ୟାମେରା ମେନ୍ ଧନମତ ପାଣିଗ୍ରାହୀ, ଜୁନିଅର କ୍ୟାମେରା ମେନ୍ ଦେବେନ୍ଦ୍ର ଲେଙ୍କା, ସାମ୍ବାଦିକ ବିମଳେନ୍ଦୁ ସାହୁ, ପ୍ରଦୀପ ସାହୁ, ଅକ୍ଷୟ ପିଡ଼ିସିକା ପ୍ରମୁଖ ସହଯୋଗ କରିଥିଲେ।