12-Oct-2025

ବଲାଙ୍ଗୀର (ପ୍ରେରଣା ଖବର): ଆସନ୍ତା  ମାସ ମଧ୍ୟରେ ବଲାଙ୍ଗୀର ଟାଉନ୍ ବାଳିକା ଉଚ୍ଚବିଦ୍ୟାଳୟ ତାର ଡାଇମଣ୍ଡ୍ ଜୁବଲି ପାଳନ କରିବାକୁ ଯାଉଛି l ବଲାଙ୍ଗୀର ଜିଲ୍ଲାରେ ବାଳିକା ଶିକ୍ଷାର ମୂଳଦୂଆ ପକାଇବା ଓ ମହିଳା ମାନଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରିବାର ଲକ୍ଷ୍ୟ ନେଇ ଏହି ସ୍କୁଲକୁ ପ୍ରତିଷ୍ଠା କରିଥିଲେ ବଲାଙ୍ଗୀରର  ଜଣାଶୁଣା ଚିନ୍ତାନାୟକ ପ୍ରଣମ୍ୟ  ସ୍ଵର୍ଗତ ଶରତ ଚନ୍ଦ୍ର ପାଣିଗ୍ରାହୀ l ସ୍ଵର୍ଗତ ପାଣିଗ୍ରାହୀ ଙ୍କ ସୁପୁତ୍ର ଡ.ଶ୍ରୀକାନ୍ତ ପାଣିଗ୍ରାହୀଙ୍କ ଦିଗଦର୍ଶନରେ 

ଏବେ  ସ୍କୁଲର ହୀରକ ଜୟନ୍ତୀ ପାଳନ ହବାକୁ ଯାଉଛି l  ଟାଉନ୍ ବାଳିକା ଉଚ୍ଚବିଦ୍ୟାଳୟ  ଏବଂ ଶରତ ପାଣିଗ୍ରାହୀ ଫାଉଣ୍ଡେସନ ର ମିଳିତ ସହଯୋଗରେ ଆୟୋଜିତ ହୀରକ ଜୟନ୍ତୀ ସମାରୋହକୁ ଜାକଜମକରେ ପାଳନ କରିବା ପାଇଁ ସ୍କୁଲର ପୁରାତନ ଛାତ୍ରୀ, ସ୍କୁଲର ପୂର୍ବତନ ଶିକ୍ଷକ ଶିକ୍ଷୟିତ୍ରୀଙ୍କ ସମେତ ସହରର ବୁଦ୍ଧିଜୀବୀ ଓ ଶିକ୍ଷାପ୍ରେମୀ ମାନଙ୍କୁ ନେଇ ଆଜି ସ୍କୁଲ ପରିସରରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି l ସ୍କୁଲର ପ୍ରଧାନ ଶିକ୍ଷକ ନରେନ୍ଦ୍ର ମିଶ୍ର ଙ୍କ ଆବାହକତ୍ବରେ ଅନୁଷ୍ଠିତ ଏହି ବୈଠକରେ ଉତ୍ସବକୁ ଶାନ୍ତିଶୃଙ୍ଖଳାର ସହିତ ପାଳନ କରିବା ଏବଂ ସ୍ମରଣିକା ପ୍ରକାଶନ

ସମ୍ପର୍କରେ ବିସ୍ତୃତ ଆଲୋଚନା ହୋଇଥିଲା ଏହି ବୈଠକରେ ସ୍କୁଲର ଆଲୁମିନି କମିଟିର ସଭାନେତ୍ରୀ ସୁଶ୍ରୀ ଆନନ୍ଦିନୀ ଦର୍ଜି, ପୂର୍ବତନ ପ୍ରଧାନ ଶିକ୍ଷୟିତ୍ରୀ ସୁଭଦ୍ରା ସ୍ଵାଇଁ, ବିଜୟିନୀ ଦାନୀ,ଶିକ୍ଷାବିତ୍ ମନୋରଞ୍ଜନ ସାହୁ, ଶିକ୍ଷକ ସତ୍ୟାନନ୍ଦ ବିଶ୍ଵାଳ, ସୁଭଶ୍ରୀ ଭୋଇ, ଅନୁଷ୍କା କୁମ୍ଭାର,କୃଷ୍ଣଚନ୍ଦ୍ର ବାଗ, ପୁନମ ରଣା,ବନିତା ତରିଆ, ମନୀଷା ସାହୁ,ଗୀତାଞ୍ଜଳି ମାଝୀ ଅରୁନ୍ଧତୀ ବଢେଇ, ଅନୀତା ସିଂହ ପ୍ରମୁଖ ଯୋଗ ଦେଇ ଆଲୋଚନାରେ ଅଂଶଗ୍ରହଣ କରି ଥିଲେ l ଶେଷରେ  ଶିକ୍ଷୟିତ୍ରୀ ଝୁନିଲତା ଭୋଇ ସମସ୍ତଙ୍କୁ ଧନ୍ୟବାଦ ଅର୍ପଣ କରିବା ସହ ଆଗାମୀ ଦିନରେ ସମସ୍ତଙ୍କ ସହଯୋଗ କାମନା କରିଥିଲେ l