07-Aug-2025

ନୂଆପଡ଼ା (ରାମନାଥ ପଣ୍ଡା)ନୂଆପଡ଼ା ଜିଲ୍ଲା ଶିକ୍ଷା ବିଭାଗରେ ଚଳିତ ଶିକ୍ଷା ବର୍ଷରେ ଜିଲ୍ଲାର ପ୍ରତ୍ୟେକ ବ୍ଲକରେ  ଶିକ୍ଷକ ଶିକ୍ଷୟତ୍ରୀଙ୍କୁ ବଦଳି କରାଯାଇଛି ।ଏହି ବଦଳିକୁ ନେଇ କିଛି ବିଦ୍ୟାଳୟରେ ପରିଚାଳନା କମିଟି ଅସନ୍ତୁଷ୍ଟ ଥିବାବେଳେ କିଛି ବିଦ୍ୟାଳୟରେ ଅଭିଭାବକ ଅସନ୍ତୁଷ୍ଟ ପୁଣି କିଛି ବିଦ୍ୟାଳୟରେ ବିଦ୍ୟାଳୟକୁ ତାଲା ବନ୍ଦ କରିବାକୁ କମିଟି ଓ ଅଭିଭାବକ ତତ୍ପର ହୋଇ ଉଠିଛନ୍ତି ।ଠିକ୍ ସେହିଭଳି ଭିନ୍ନ ଏକ ଦୃଶ୍ୟ ଆଜି ଦେଖିବାକୁ ମିଳିଛି ବୋଡ଼େନ ବ୍ଲକ ବୋଇରର୍ଗାଁ ୟୁ ପି ଏସ ରେ ଛାତ୍ର ଛାତ୍ରୀ କାନ୍ଦି କାନ୍ଦି ସ୍କୁଲ  ଗେଟ୍ ରେ ଛିଡ଼ା ହୋଇଥିଲେ ସକାଳ ୧୦ ଘଣ୍ଟାରୁ ଦିନ ୧ଟା ୧୫ ମିନିଟ ପର୍ଯ୍ୟନ୍ତ ।ସେମାନେ ଜିଦ୍ କରୁଥିଲେ ଜିଲ୍ଲାପାଳ ଓ ଶିକ୍ଷା ବିଭାଗୀୟ ଅଧିକାରୀ ତାଙ୍କ ପାଖକୁ ଆସି ତାଙ୍କ ଦାବୀକୁ ପୂରଣ କରି ତାଙ୍କ ବିଦ୍ୟାଳୟରୁ ଅନ୍ୟ ବିଦ୍ୟାଳୟକୁ ବଦଳି ହୋଇଥିବା ଶିକ୍ଷକ ଶିକ୍ଷୟତ୍ରୀଙ୍କୁ ଜିଲ୍ଲାପାଳ ଫେରାଇ ଦିଅନ୍ତୁ ବୋଲି ।ଅଧିକାରୀ ନଆସିବା ଯାଏଁ ସ୍କୁଲ ଗେଟ୍ ରେ ସେମିତି ହିଁ କାନ୍ଦି କାନ୍ଦି ଛିଡ଼ା ହୋଇଥିବେ ବୋଲି ସ୍ପଷ୍ଟ ପ୍ରକାଶ କରୁଥିଲେ କିନ୍ତୁ ସି ଆର୍ ସି ସି ରିଖିରାମ ଜଗତ, ସାମ୍ବାଦିକ ରାମନାଥ ପଣ୍ଡା ଓ ସାମ୍ବାଦିକ ବିଶିକେଶନ ପଣ୍ଡା ଅନେକ ପ୍ରକାର ବୁଝାଇବା ପରେ ଦିନ ୧ଟା ୧୫ ମିନିଟ ସମୟରେ ଛାତ୍ର ଛାତ୍ରୀ ଭୋଜନ କରିବାକୁ ସ୍କୁଲ ଭିତରକୁ ପ୍ରବେଶ କରିଥିଲେ । ଶିକ୍ଷା ବିଭାଗରେ କାହିଁକି ଏମିତି ଦୃଶ୍ୟ ବର୍ତ୍ତମାନ ସାମ୍ନାକୁ ଆସୁଛି,ଏହା ପଛର କାରଣ କ'ଣ ହୋଇଥାଇପାରେ ତାହା ବୁଝିବା ଭାରି କଷ୍ଟ ।ଚାକିରି କ୍ଷେତ୍ରରେ ସ୍ଥାନାନ୍ତର ଏକ ପ୍ରକ୍ରିୟା ,ଏକଥା ଛାତ୍ର ଛାତ୍ରୀ ବୁଝି ପାରିବେ ନାହିଁ ତେଣୁ ଅବୁଝା ଓ ଜିଦ୍ କରୁଥିବା ଛାତ୍ର ଛାତ୍ରୀଙ୍କୁ ବୁଝାଇ  ତାଙ୍କ ମନକୁ ଶାନ୍ତ କରିବା ହେଉଛି ଶିକ୍ଷକ ଶିକ୍ଷୟତ୍ରୀ ମାନଙ୍କ ଦାୟୀତ୍ୱ ।