31-Jul-2025

"ପ୍ରେମଚନ୍ଦ ସାହିତ୍ୟର ଆଲୋକ ବିଶ୍ୱ ସାହିତ୍ୟକୁ ଚମକ ପ୍ରଦାନ କରୁଛି "

ବଲାଙ୍ଗୀର :ସ୍ଥାନୀୟ ସରକାରୀ ମହିଳା ମହାବିଦ୍ୟାଳୟ ଠାରେ ହିନ୍ଦୀ (ସମ୍ମାନ)ବିଭାଗ ତରଫରୁ ପ୍ରେମଚନ୍ଦଙ୍କ ଜୟନ୍ତୀ ପାଳିତ ହୋଇଯାଇଛି। ପ୍ରଥମେ ପ୍ରେମଚନ୍ଦଙ୍କ ଫୋଟୋ ଚିତ୍ରରେ ମାଲ୍ୟାର୍ପଣ ପରେ ସଭାକାର୍ଯ୍ୟ ଆରମ୍ଭ ହୋଇଥିଲା। ଅଧ୍ୟାପକ ପ୍ରଭଞ୍ଜନ କୁମାର ମିଶ୍ର ନିଜ ବକ୍ତବ୍ୟରେ ପ୍ରେମଚନ୍ଦଙ୍କ କଥା ସାହିତ୍ୟର ଭାବ ଓ ବିଷୟ ଭୂମି ସମ୍ପୂର୍ଣ୍ଣ ମାନବ ଜୀବନକୁ ପରିସର ଭୁକ୍ତ କରିପାରିଥିଲା ବୋଲି କହିବା ସହ ସେଥିରେ ସମାଜର ଗ୍ରାମୀଣ ଚିତ୍ରଣ ବିସ୍ତୃତ ଭାବେ ପରିଲକ୍ଷିତ ହୁଏ ବୋଲି କହିଥିଲେ। ଅନ୍ୟତମ ଅତିଥି ଅଧ୍ୟାପକ ଉତ୍ତମ ଭୋଇ ପ୍ରେମଚାନ୍ଦ ସାହିତ୍ୟର ଆଲୋକ ଆଜି ମଧ୍ୟ ସମ୍ପୂର୍ଣ୍ଣ ବିଶ୍ୱ ସାହିତ୍ୟ କୁ ଚମକ ପ୍ରଦାନ କରୁଅଛି ବୋଲି କହିବା ସହ ପ୍ରେମଚନ୍ଦଙ୍କ କାହାଣୀମାନ କାଳକୁ ଜୟ କରି ଚାଲିଛି ବୋଲି

କହିଥିଲେ। ଅଧ୍ୟାପିକା ଉର୍ମିଳା ମଟ୍ଟାରୀ ଆଧୁନିକ ଭାରତୀୟ ସାହିତ୍ୟକୁ ବିଶେଷ କରି କଥା ସାହିତ୍ୟକୁ ନୂତନ ରୂପ ଦେବାରେ ପ୍ରେମଚନ୍ଦଙ୍କ ଭୂମିକା ଅନନ୍ୟ ବୋଲି କହିଥିଲେ। ଛାତ୍ରୀ ମାନସୀ ସାହୁ ଉପନ୍ୟାସ ଭଳି କାହାଣୀ କ୍ଷେତ୍ରରେ ମଧ୍ୟ ପ୍ରେମଚନ୍ଦ କ୍ରାନ୍ତି ଆଣିଥିଲେ ବୋଲି କହିଥିବା ବେଳେ ଛାତ୍ରୀ ରିତାଞ୍ଜଳୀ କଅଁର ନିଜ ବକ୍ତବ୍ୟରେ ପ୍ରେମଚନ୍ଦ ଚରିତ୍ର ଚିତ୍ରଣର ପ୍ରତ୍ୟେକ ପ୍ରଣାଳୀକୁ ଅବଲମ୍ବନ କରିବାସହ ପ୍ରାୟତଃ ପାତ୍ର-ମୁଖି ସମ୍ବାଦ ମାଧ୍ୟମରେ ତାଙ୍କର ଚାରିତ୍ରିକ ବିଶେଷଣକୁ ଉଦଘାଟନ କରିବାକୁ ଚେଷ୍ଟା କରିଛନ୍ତି ବୋଲି କହିଥିଲେ। କାର୍ଯ୍ୟକ୍ରମରେ ହିନ୍ଦୀ (ସମ୍ମାନ)ବିଭାଗର ସମସ୍ତ ଛାତ୍ରୀ ଉପସ୍ଥିତ ଥିଲେ।