04-May-2025

ବଲାଙ୍ଗୀର (ପ୍ରେରଣା ଖବର): ବଲାଙ୍ଗୀର ମୁନିସିପାଲିଟି ଅନ୍ତର୍ଗତ ସର୍କିଟ ହାଉସ ରୋଡ ତଥା ସାଲେପାଲିରୁ ରେଳଷ୍ଟେସନକୁ ସଂଯୋଗ କରୁଥିବା ରାସ୍ତାରେ (୧୮ ନମ୍ଵର୍ ୱାର୍ଡ)  ଡ୍ରେନ୍ ପାଣି ବର୍ତ୍ତମାନ ରାସ୍ତାରେ ବୋହୁ ଥିବା ଯୋଗୁଁ ଏକ ଅସ୍ଵାସ୍ଥ୍ୟକର କର ପରିବେଶ ସ୍ରୁଷ୍ଟି ହେଉଛି l  ଏହା ଦ୍ଵାରା ଏହି ରାସ୍ତା ଉପରେ ନିର୍ଭରଶୀଳ ଲୋକଙ୍କୁ ଅନେକ ହଇରାଣର ସମ୍ମୁଖୀନ ହେବାକୁ ପଡୁଛି l ବଲାଙ୍ଗୀର ପି.ଡବ୍ଲ୍ୟୁ.ଡି ବିଭାଗ ତରଫରୁ ଏଠାରେ ଡ୍ରେନ୍ ନିର୍ମାଣ ହୋଇଛି ସତ କିନ୍ତୁ ଡ୍ରେନ୍

ଉପରେ ଅତ୍ୟଧିକ ମୋଟା ସିମେଣ୍ଟ ସ୍ଲାଭ୍ ଦେଇଥିବା ଯୋଗୁଁ ଆବଶ୍ୟକ ସ୍ଥଳେ ଠିକ୍ ଭାବରେ ନାଳ ସଫା ହୋଇପାରୁ ନାହିଁ l ଆହୁରି ମଧ୍ୟ ସଚେତନତାର ଅଭାବ ଯୋଗୁଁ ଡ୍ରେନ୍ ଭିତରେ କୁଢକୁଢ ଅଳିଆ ଆବର୍ଜନା ପଡି ଡ୍ରେନ୍ ଅବରୋଧ ସହିତ ଡ୍ରେନ୍ ର  ମଇଳା ପାଣି ରାସ୍ତାରେ ବୋହୁଥିବା ଦେଖାଯାଉଛି l ସାଲେପାଲିରେ ରାମଳୀଳା ହେଉଥିବା ଗୌନ୍ତିଆ ସ୍ଵର୍ଗତ ହେମନ୍ତ ସାଏ ଙ୍କ ଘର ସାମ୍ନାରେ ମଧ୍ଯ ଡ୍ରେନେଜ୍ ବ୍ୟବସ୍ଥା ବିପର୍ଯ୍ଯସ୍ତ ହୋଇ ପଡିଥିବା ଜଣାପଡିଛି l  ଅନେକ ସମୟରେ ଜେସିପି ମେସିନ୍ ଆସି ସ୍ଲାଭ୍  କାଢି ଡ୍ରେନ୍ ସଫା କଲା ବେଳେ ସ୍ଲାଭ୍ ଭାଙ୍ଗି ଯିବା ବା ସହ ମୁଖ୍ୟ  ରାସ୍ତା ସବୁ ଖରାପ ହୋଇ ଯାଉଛି l ଏ ନେଇ ପଡାବାସୀ ଅନେକ  ଥର

ବଲାଙ୍ଗିର ମୁନିସିପାଲିଟି କର୍ତ୍ତୃପକ୍ଷ ଓ ବିଭାଗୀୟ ଅଧିକାରୀଙ୍କୁ  ଅଭିଯୋଗ କରିଥିଲେ ମଧ୍ଯ ଏ ସମସ୍ୟା ପ୍ରତି କେହି କର୍ଣ୍ଣପାତ କରି ନାହାଁନ୍ତି l ସରକାର ଲୋକଙ୍କ ସୁବିଧା ପାଇଁ ଲକ୍ଷ ଲକ୍ଷ ଟଙ୍କା ବ୍ୟୟରେ ଡ୍ରେନ୍ ଓ ରାସ୍ତା ନିର୍ମାଣ କରୁଛନ୍ତି କିନ୍ତୁ ସଚେତନତା ଓ ଦୂରଦୃଷ୍ଟିର ଅଭାବ ଯୋଗୁଁ ଏହା ଲୋକଙ୍କ କୌଣସି କାମରେ ଆସି ପାରୁନାହିଁ l ଆଗକୁ ବର୍ଷା  ଋତୁ l ଏବେ ଠାରୁ ସାଲେପାଲି ଅଞ୍ଚଳରେ ଡ୍ରେନେଜ୍ ସମସ୍ୟାର ସମାଧାନ ଦିଗରେ ଚେଷ୍ଟା କରା ନଗଲେ ଆଗକୁ ପରିସ୍ଥିତି ଆହୁରି ଖରାପ ହେବ ବୋଲି ଜନମତ ପ୍ରକାଶ ପାଇଛି