26-Nov-2024

କୁଚିଣ୍ଡା(ସିଲୁ ସୁନାନୀ) ସମ୍ବଲପୁର ଜିଲ୍ଲା କୁଚିଣ୍ଡା ପଞ୍ଚାୟତ ସମିତି ସମ୍ମିଳନୀ କକ୍ଷରେ ସୋମବାର କୁଚିଣ୍ଡା ବ୍ଲକସ୍ତରୀୟ ଜନଶୁଣାଣି ଶିବିର ଅନୁଷ୍ଠିତ ହୋଇଯାଇଛି।ଏଥିରେ ସମ୍ବଲପୁର ଜିଲ୍ଲାପାଳ ସିଦ୍ଧେଶ୍ବର ବଳିରାମ ବୋନ୍ଦର ଅଧ୍ୟକ୍ଷତା କରି କୁଚିଣ୍ଡା ବ୍ଲକର ୧୭ପଞ୍ଚାୟତରୁ ଆସିଥିବା ୭୦ ଅଭିଯୋଗର ଶୁଣାଣି କରିଥିଲେ।ବ୍ୟକ୍ତିଗତ ଭାବେ ୫୦ ଅଭିଯୋଗ ଏବଂ ଗୋଷ୍ଠିଗତ ଭାବେ ୨୦ଅଭିଯୋଗ ଉପରେ ଶୁଣାଣି କରି ଏହାର ଫଇସଲା ପାଇଁ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଥିଲେ।ଶିବିରରେ ସମ୍ବଲପୁର ଜିଲ୍ଲାପରିଷଦ ସିଡିଓ ପ୍ରସନ୍ନ ପାତ୍ର,ଅତିରିକ୍ତ ଆରକ୍ଷୀ ଅଧିକ୍ଷକ ଆଲବିନୁସ କେର୍କେଟା,କୁଚିଣ୍ଡା ଉପଜିଲ୍ଲାପାଳ ଗୌରବମୟ ପ୍ରଧାନ, ଆଇଟିଡିଏ ପ୍ରକଳ୍ପ ପ୍ରଶାସକ ହେମସାଗର ଭୋଇ, ଏସଡିପିଓ ଅମିତାଭ ପଣ୍ଡା,ଜିଲ୍ଲା ପଞ୍ଚାୟତ ଅଧିକାରୀ ଅନଙ୍ଗଭଞ୍ଜ ସାଗର,ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଥବିର ମହାନନ୍ଦ, ମିତାଲି ମଧୁସ୍ମିତା ଦଳେଇ,ବିଡିଓ ଜୟନ୍ତ ସାହୁଙ୍କ ସମେତ ସମସ୍ତ ଲାଇନ ବିଭାଗର ଅଧିକାରୀ ମାନେ ଉପସ୍ଥିତ ରହି ଥିଲେ।ଏଥିରେ ଅଧିକାଂଶ ଅଭିଯୋଗ ଚାଷୀଙ୍କ ଧାନକ୍ରୟ ସମସ୍ୟା ଓ ମଣ୍ଡିପରିଚାଳନା ସମ୍ପର୍କରେ ଆସିଥିଲା।ଏହାଛଡା ପ୍ରଧାନମନ୍ତ୍ରୀ ଆବାସ ଯୋଜନା,ପାନୀୟଜଳ ସମେତ ବାଉରୀଗୋଡା ପଞ୍ଚାୟତର ଅର୍ଜୁନବାର୍ଡ ଜଳବିଭାଜିକା କମିଟି

କର୍ମକର୍ତ୍ତାଙ୍କ ମନମୁଖି କାର୍ଯ୍ୟର ତଦନ୍ତ, ଅର୍ଡାବାହାଲ ପଞ୍ଚାୟତକୁ ମରୁଡି ଘୋଷଣା କରିବା ସମ୍ପର୍କରେ ଅଭିଯୋଗ ଆସିଥିଲା।ଏହିଅବସରରେ ଜିଲ୍ଲାପାଳ ବୋନ୍ଦର ଜଣେ ହିତାଧିକାରୀଙ୍କୁ ରେଡକ୍ରସ ପାଣ୍ଠିରୁ ୨୦ହଜାର ଟଙ୍କାର ସହାୟତା, ୨ଜଣଙ୍କୁ ଶ୍ରମିକ କାର୍ଡ,୩ଜଣଙ୍କୁ ବାର୍ଦ୍ଧକ୍ୟ ଭତ୍ତା ଓ ଜଣେ ଭିନ୍ନକ୍ଷମଙ୍କୁ ହ୍ୱିଲ ଚେୟାର ପ୍ରଦାନ କରି ଥିଲେ।ପରେ ସେ ମନ୍ତ୍ରୀମୁଣ୍ଡାରେ ଏସଏଚଜି ପକ୍ଷରୁ ହୋଇଥିବା ଲଙ୍କାମରିଚ ଚାଷ ପ୍ରକଳ୍ପ  ପରିଦର୍ଶନ କରିଥିଲେ।ଶିବିର ପରିଚାଳନାରେ କୁଚିଣ୍ଡା ବ୍ଲକର ଅତିରିକ୍ତ ବିଡିଓ ସହଦେବ ନନ୍ଦ,ଆକାଉଣ୍ଟ ଅଫିସର ଅଜୟ ବାଗେ,ସହକାରୀ ନିର୍ବାହୀ ଯନ୍ତ୍ରୀ ପ୍ରଜ୍ଞା ପରମିତା ନାୟକ, ସେକ୍ସନ ଅଫିସର ତରୁଣ ପ୍ରସାଦ ବିଶ୍ବାଳ ପ୍ରମୁଖ ସହଯୋଗ କରିଥିଲେ।

(ସମ୍ବଲପୁର କୁଚିଣ୍ଡାରୁ ସିଲୁ ସୁନାନୀଙ୍କ ରିପୋର୍ଟ)