07-Nov-2024

ବରଗଡ଼/ଅତାବିରା(ଆକାଶ ମିଶ୍ର): "ସରକାର କା ମାଲ୍, ଦରିଆ ମେ ଡାଲ୍" ଉକ୍ତିର ଯଥାର୍ଥତା ପରିଲକ୍ଷିତ ହୁଏ  ଲକ୍ଷାଧିକ ଅର୍ଥ ବ୍ୟୟରେ ତିଆରି ହୋଇ ଖତ ଖାଉଥିବା ବରଗଡର ଦୁଇମହଲାର ଷ୍ଟାଫ କ୍ୱାର୍ଟରକୁ ଦେଖିଲେ ୲
 କାର୍ଯ୍ୟକ୍ଷମ ହୋଇପାରୁନି ଏହି ବିଦ୍ୟାଳୟ ଷ୍ଟାଫ  କ୍ୱାର୍ଟର। ଲକ୍ଷାଧିକ ଟଙ୍କା ବ୍ୟୟରେ ୨ମହଲା ବିଶିଷ୍ଟ କୋଠା ସରକାର ନିର୍ମାଣ କରିଥିବା ବେଳେ ତାହା ଏବେ ଖାଲି ପଡିଛି। ବରଗଡ ଜିଲ୍ଲା ଅତାବିରା ବ୍ଲକ ଅନ୍ତର୍ଗତ ସୋଢ଼ାପାଲି ସ୍ଥିତ ଆଦିବାସୀ  ଆବାସିକ ଆଶ୍ରମ ବିଦ୍ୟାଳୟରେ ଦୀର୍ଘ ବର୍ଷ ଧରି ନିର୍ମାଣ ହୋଇଛି ଦୁଇ ମହଲା ବିଶିଷ୍ଟ କୋଠଘର l ବିଦ୍ୟାଳୟର ଷ୍ଟାଫ ମାନଙ୍କ ରହିବା ପାଇଁ। କିନ୍ତୁ ଏହାର ନିର୍ମାଣ କାର୍ଯ୍ୟ ସମୂର୍ଣ୍ଣ ହୋଇ ନଥିବାରୁ ବର୍ଷ ବର୍ଷ ଧରି ପଡି ରହି ଭିତରେ ଅନାବନା ଘାସବୁଦା ସହ ଜରାଜୀର୍ଣ୍ଣ ହୋଇ ପଡ଼ିଛି। ଏହି କୋଠଘର ଟି ବାହାରୁ ରଂଗ କରାଯାଇ ଚକାଚକ୍ କରାଯାଇଛି। ଯିଏ ଦେଖିଲେ କହିବ ବିଦ୍ୟାଳୟର ବିକାଶ ଆଗେଇ ଚାଲିଛି। କିନ୍ତୁ ଭିତର ଟା ଦେଖିଲେ ଜଣା ପଡ଼ୁଛି ସରକାରୀ ଅର୍ଥର ଅପବ୍ୟୟ କିପରି କରାଯାଉଛି। ଯେଉଁ ଉଦ୍ଦେଶ୍ୟରେ ଏହା ନିର୍ମାଣ କରା ଯାଉଛି, ତାହା କୋଉ ଦୃଷ୍ଟିରୁ ମଧ୍ୟ ସାର୍ଥକ ନୁହେଁ ବରଂ ଏହା ଲୋକଙ୍କ ପ୍ରତି ବିପଦ ସୃଷ୍ଟି କରୁଛି। ନା ଏଥିରେ କର୍ମଚାରୀ (ଶିକ୍ଷକ) ମାନେ ରହି ପାରୁଛନ୍ତି ନା  ଶ୍ରେଣୀଗୃହ ଅଥବା ହଷ୍ଟେଲ ଭାବରେ କିଛି କାମକୁ  ଆସି ପାରୁଛି । କେବଳ ଲୋକ ଦେଖାଣିଆ ଭାବରେ  କୋଠା ଟି ଚକାଚକ୍ ଦିଶୁଛି ।  ବିଦ୍ୟୁତ୍  ସଂଯୋଗ ହୋଇ ନାହିଁ କି  ଜଳ ଯୋଗାଣ ବ୍ୟବସ୍ଥା  ନାହିଁ । ତେଣୁ   କେହି ରହିପାରୁ ନାହାନ୍ତି । ତେବେ ବିଦ୍ୟାଳୟ ପ୍ରତି ସରକାରଙ୍କ  ଅବହେଳା  ଏଥିରୁ ବେଶ ସ୍ପଷ୍ଟ। କେଉଁଠି ବିଦ୍ୟାଳୟରେ  ଶ୍ରେଣୀ କୋଠରୀ ଅଭାବରୁ ପିଲାଏ ବାରଣ୍ଡାରେ ଗଛମୂଳେ ବସି ପାଠ ପଢୁଥିବା  ବେଳେ ଏଠି ଖତ ଖାଉଛି କୋଠା । ଧନ୍ୟ ସେଇ ସରକାରୀ  ଅଧିକାରୀ ବାବୁ ଙ୍କ କାର୍ଯ୍ୟ ଆଉ ଧନ୍ୟ ସରକାର । ଜନସାଧାରଣଙ୍କ ଅର୍ଥ  ଯାହା ଦେଶର ,ରାଜ୍ୟର  ସମ୍ପଦ ଏମିତି  ବ୍ୟର୍ଥ ରେ ଚାଲିଯାଉଛି । ଅନ୍ୟ ପକ୍ଷରେ  ଶିକ୍ଷାର  ବିକାଶ ନାମରେ ସରକାର ଧେଣ୍ଡୁରା ପିଟୁଛନ୍ତି,  ଆଦିବାସୀ ମାନଙ୍କ ସାକ୍ଷରତା ବୃଦ୍ଧି, ଶିକ୍ଷା  ବିକାଶ  ପାଇଁ ଜିଲ୍ଲା ମଙ୍ଗଳ ଅଧିକାରୀ  ଅନେକ ଆଶ୍ରମ ବିଦ୍ୟାଳୟ  ର  ଯୋଜନା କରାଯାଇ  ତାଙ୍କର ଶିକ୍ଷାର ଦିଗକୁ ପ୍ରସାରିତ  କରୁଥିବା କୁହାଯାଉଛି ,
କିନ୍ତୁ ବିଦ୍ୟାଳୟରେ ଆବଶ୍ୟକ ମୁତାବକ ଶିକ୍ଷକ ନଥିବାରୁ ଶିକ୍ଷାଦାନ ବାଧାପ୍ରାପ୍ତ ହେଉଛି , ତାହା କାହାକୁ କୁହାଯିବ ? ଏହି ବିଦ୍ୟାଳୟ ପ୍ରଥମରୁ ଅଷ୍ଟମ ଯାଏ  ରେ ୧୪୦ ଜଣ ଛାତ୍ରଛାତ୍ରୀ ପାଠ ପଢୁଥିବା ବେଳେ ଜଣେ ମାତ୍ର ଶିକ୍ଷକ  ଅଛନ୍ତି ପ୍ରଧାନ ଶିକ୍ଷକ । ଆଉ  ତିନି ଜଣ  ଅତିଥି ଶିକ୍ଷକ ଶିକ୍ଷୟିତ୍ରୀ ରହିଛନ୍ତି । ଯେଉଁମାନେ ମାସକୁ ମାତ୍ର ୪୦ ଟି ପିରିୟଡ଼ ପଢ଼ାଇବେ  ନିୟମ ଅନୁସାରେ ।ତେବେ ଅନ୍ୟ ସମୟରେ ବିଦ୍ୟାଳୟ ରେ ପାଠପଢା   କେମିତି  ଚଳିବ ତାହା  ମଙ୍ଗଳ ଅଧିକାରୀଙ୍କ ଚିନ୍ତାର ବାହାରେ। ଅତ୍ୟନ୍ତ ପକ୍ଷରେ ୫ ଜଣ ଶିକ୍ଷକ ଦରକାର , କିନ୍ତୁ ଖାଲି ପଡ଼ିଛି ପଦବୀ। ପିଲାଙ୍କ ଭବିଷ୍ୟତ ଚିନ୍ତା ନେଇ ଗ୍ରାମବାସୀଙ୍କ ପକ୍ଷରୁ ୩ ଜଣ ଶିକ୍ଷକ ଶିକ୍ଷୟିତ୍ରୀଙ୍କୁ ରଖାଯାଇଛି ଏବଂ ଜଣେ ସହୃଦୟ ବ୍ୟକ୍ତି ସ୍ଵେଚ୍ଛାକୃତ ଭାବରେ ଶିକ୍ଷାଦାନ କରୁଛନ୍ତି ।ୟେ ହେଉଛି ଆଶ୍ରମ ବିଦ୍ୟାଳୟ ର ଅସଲ ରୂପ । ନିଜ  ପିଲାଙ୍କର ଉଜ୍ଜ୍ୱଳ ଭବିଷ୍ୟତ ଚିନ୍ତାକରି ଏହି ବିଦ୍ୟାଳୟରେ ପାଠ ପଢ଼ାଉଥିବl ପିତାମାତା ମାନଙ୍କର ସପ୍ନ ମାଟିରେ ମିଶିବାକୁ ଯାଉଛି । ତେବେ କେବେ ବଦଳୁଛି ଏହି ବିଦ୍ୟାଳୟର ରୂପରେଖ, କେବେ ମଙ୍ଗଳ ଅଧିକାରୀଙ୍କ ନିଦ୍ରା ଭାଙ୍ଗିବ ଆଉ ଦୃଷ୍ଟି ପଡ଼ିବ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି ।