04-Oct-2024

ବଲାଙ୍ଗିର(ପ୍ରେରଣା ଖବର): ସ୍ଥାନୀୟ ସରକାରୀ ମହିଳା ମହାବିଦ୍ୟାଳୟର ଦର୍ଶନଶାସ୍ତ୍ର ବିଭାଗର ପ୍ରଥମ ବର୍ଷର ଛାତ୍ରୀମାନଙ୍କ ପାଇଁ ସ୍ୱାଗତ ସମ୍ବର୍ଦ୍ଧନା ଉତ୍ସବ ଅନୁଷ୍ଠିତ ହୋଇଯାଇଛି। ଦର୍ଶନଶାସ୍ତ୍ର ବିଭାଗର ମୁଖ୍ୟ ସଂଯୁକ୍ତା କୁମାରୀ ନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ମହାବିଦ୍ୟାଳୟର ଅଧ୍ୟକ୍ଷ ଡ.ଅରବିନ୍ଦ କୁମାର ଓଝା ମୁଖ୍ୟ ଅତିଥି ଭାବେ ଯୋଗ ଦେଇ ଭବିଷ୍ୟତ ଲକ୍ଷ୍ୟସ୍ଥଳରେ ପହଂଚିବା ପାଇଁ ସୁକର୍ମ ଏକ ପ୍ରକୃଷ୍ଟ ମାଧ୍ୟମ ବୋଲି କହିଥିଲେ l

ନିମନ୍ତ୍ରୀତ ବକ୍ତା ଭାବେ ଅବସରପ୍ରାପ୍ତ ମନୋରଂଜନ ମିଶ୍ର ଯୋଗ ଦେଇ ଲକ୍ଷ୍ୟ ହାସଲ ପାଇଁ ଖୁବ ଯତ୍ନବାନ ହେବା ଓ ଶ୍ରେଣୀ ଗୃହରେ ନିରବତା ରକ୍ଷା କରି ମନଯୋଗୀ ହେବା ପାଇଁ ପରାମର୍ଶ ଦେଇଥିଲେ । ଅନ୍ୟତମ ବକ୍ତାଭାବେ ପ୍ରଶାସନିକ ଅଧିକାରୀ ଡ.ସଦାଶିବ ମଲ୍ଲିକ ଦୈନିକ ଜୀବନରେ ଶୃଙ୍ଖଳାର ଯଥେଷ୍ଟ ଆବଶ୍ୟକତା ରହିଛି ବୋଲି ମତବ୍ୟକ୍ତ କରିଥିଲେ । ଦର୍ଶନଶାସ୍ତ୍ର ଅଧ୍ୟାପକ ରାକେଶ ମଲ୍ଲିକ, ସଂସ୍କୃତ ଅଧ୍ୟାପକ ଅଜିତ କୁମାର ପଣ୍ଡା, ତର୍କଶାସ୍ତ୍ର ଅଧ୍ୟାପିକା ମୋନାଲିଶା ପାଣି ଓ ଇଂରାଜୀ ଅଧ୍ୟାପିକା ଡ. ଅନୁରାଧା ମିଶ୍ର ନିଜ ବକ୍ତବ୍ୟରେ ବ୍ୟକ୍ତିଗତ ବା ସାମାଜିକ ସମୃଦ୍ଧି ପାଇଁ ଶୃଙ୍ଖଳା ଜ୍ଞାନ ଅପରିହାର୍ଯ୍ୟ ଅଟେ ବୋଲି କହିଥିଲେ l

କାର୍ଯ୍ୟକ୍ରମର ସଂଯୋଜନା ଦ୍ୱିତୀୟ ବର୍ଷର ଛାତ୍ରୀ ପ୍ରୀୟା ପାତ୍ର କରିଥିବା ବେଳେ ଧନ୍ୟବାଦ ଦେଇଥିଲେ ଛାତ୍ରୀ ଗଙ୍ଗାମୟୀ ମହାନନ୍ଦ। ଏହି ସଭାରେ ବରିଷ୍ଠ ବର୍ଗର ଛାତ୍ରୀ ମାନେ  ପ୍ରଥମ ବର୍ଷର ଛାତ୍ରୀମାନଙ୍କୁ ପୁଷ୍ପଗୁଚ୍ଛ ଦେଇ ସ୍ୱାଗତ ସମ୍ବର୍ଦ୍ଧନା ଜଣାଇଥିଲେ। କାର୍ଯ୍ୟକ୍ରମର ଶେଷରେ ଛାତ୍ରୀ ମାନଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହୋଇଥିଲା ।