03-Sep-2024

ହରଭଙ୍ଗା(ଦେବବ୍ରତ ଦାଶ): ଏବେ ସୋସିଆଲ ମିଡ଼ିଆର ବହୁଳ ବ୍ୟବହାର ହୋଇ ଚାଲିଛି । ସମସ୍ତ ରାଜନୈତିକ ଦଳ ଏହାକୁ ବ୍ୟବହାର କରି ନିର୍ବାଚନ ବୈତରଣୀ ପାର ମଧ୍ୟ ହେଉଛନ୍ତି । ହେଲେ ଏହାର ଦୁରୂପଯୋଗ ବେଳେ ଏହି ରାଜନୈତିକ ଦଳକୁ ଅଡୁଆରେ ପକାଇ ଦେଉଛି । ଏମିତି ଏକ ଘଟଣା ସାରା ବୌଦ୍ଧ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି । ହରଭଙ୍ଗା ବ୍ଲକ ତିଲେଶ୍ୱର ପଂଚାୟତ ବିଜେଡ଼ି ଫେସବୁକ ଗ୍ରୁପରେ ଏକ ମନ୍ତବ୍ୟ ରାଜନୈତିକ ମହଲକୁ ଚକିତ କରିଛି । ବିଜେଡ଼ିର ଏହି ସୋସିଆଲ ମିଡ଼ିଆ ଗୃପରେ ଜଣେ ମହିଳା ଜନପ୍ରତିନିଧିଙ୍କ ଫୋଟୋ ସହ ଜଣେ ସରକାରୀ କର୍ମଚାରୀଙ୍କ ଫୋଟୋ ଯୋଡ଼ି ଅଶାଳୀନ ଭାବେ ବ୍ୟାଖ୍ୟା କରି ପୋଷ୍ଟ କରାଯାଇଛି । ତେବେ ଏହା ସୋସିଆଲ ମିଡ଼ିଆରେ ଘୁରି ବୁଲିବା ପରେ ସଂପୃକ୍ତ ମହିଳା ଜନପ୍ରତିନିଧି ଏନେଇ ପୁରୁଣାକଟକ ଥାନାରେ ଲିଖିତ ଅଭିଯୋଗ କରିଛନ୍ତି । ଏଥିସହିତ ଘଟଣା ରେ ଜଡ଼ିତ ସଂଦିଗ୍ଦ ତିଲେଶ୍ୱରର ବିଜେଡି କର୍ମୀ ସୁଜ୍ଞାନ କର୍ଣ୍ଣ, ପ୍ରତାପ ବେହେରା, ବିକ୍ରମ ପ୍ରଧାନ, ପ୍ରକାଶ ବେହେରା, ସଂଗ୍ରାମ ପ୍ରଧାନ, ବାଲ୍ୟକୃଷ୍ଣ ପ୍ରଧାନ ଙ୍କ ନାମରେ ଥାନାରେ ଏତଲା ଦିଆଯାଇଛି । ଥାନାରେ ଏତଲା ପରେ ଉକ୍ତ ପୋଷ୍ଟ ଟି ସୋସିଆଲ ମିଡ଼ିଆରୁ କାଟି ଦିଆଯାଇଥିବା ବେଳେ କିଛି ସମୟ ପରେ ଉକ୍ତ ଆଇଡ଼ି ଟି ଡିଲେଟ କରାଯାଇଛି । ଏହାକୁ ନେଇ ବିଜେଡ଼ି ଅଡ଼ୁଆରେ ପଡିଥିବା ନେଇ ଚର୍ଚା ହେଉଛି । ଏନେଇ ପୁରୁଣାକଟକ ଥାନା ଅଧିକାରୀ ଶାରଦା ପ୍ରଶନ୍ନ ଦାସଙ୍କୁ ପଚାରିବାରୁ ଲିଖିତ ଅଭିଯୋଗ ହୋଇଛି । ଏନେଇ କେସ ନମ୍ବର ୧୩୦/୨୪ରେ ଏକ ମାମଲା ରୁଜୁ କରି ଭାରତୀୟ ନ୍ୟାୟ ସଂହିତା 79, 319(2),336(2),336(4) ଧାରା ଲଗାଇ ତଦନ୍ତ କରୁଛି ପୋଲିସ ।