21-Aug-2024

ଖପ୍ରାଖୋଲ(ପ୍ରେରଣା ଖବର): ଖପ୍ରାଖୋଲ ବ୍ଲକ୍ ର ଓଡିଶା ଜୀବିକା ମିଶନରେ ବାଘମୁଣ୍ଡ ପଞ୍ଚାୟତରେ ଏମ ବି କେ ଓ ସିଆରପି ନିଯୁକ୍ତିରେ ଉତ୍କୋଚ କାରବାରର ଅଭିଯୋଗ ହୋଇଥିବା ଓ ବିଡିଓ ଏବଂ ସିଡିପିଓ ଯାଇ ତଦନ୍ତ କରି ଏହାକୁ ବାତିଲ୍ କରିଦେଇଥିବା ଜଣାଯାଇଛି । ଏଥିରେ ଓଏଲଏମର ବ୍ଲକ୍ ଓ ପଞ୍ଚାୟତ ସ୍ତରୀୟ  କେତେକ କର୍ମକର୍ତ୍ତାଙ୍କ ସମ୍ପୃକ୍ତି ରହିଥିବା କୁହାଯାଉଛି ।  ଏ ସମ୍ପର୍କରେ ମଧ୍ୟ  ଭାରପ୍ରାପ୍ତ ଡିପିଏମ ସୁମନ ଦ୍ବିବେଦୀ ଓ ଅନ୍ୟ ଅଧିକାରୀମାନେ ଅବଗତ ଥିବା ପ୍ରକାଶ । ସଂପ୍ରତି ଖପ୍ରାଖୋଲର ବିପିଏମ ମନୋଜ କେର୍କେଟା ଓ ବିଏଲସି ପ୍ରଶାନ୍ତ ନନ୍ଦ ଅଛନ୍ତି । ଏ ସମ୍ପର୍କରେ ସେମାନଙ୍କୁ ଯୋଗାଯୋଗର ଉଦ୍ୟମ ସତ୍ତ୍ୱେ ସମ୍ଭବ ହୋଇପାରିନାହିଁ । 

ଦ୍ବିତୀୟତଃ ଏହି ବ୍ଲକ୍ ର ହରିଶଙ୍କର ଠାରେ ଖୋଲାଯାଇଥିବା ମିଶନଶକ୍ତି କାଫେର ଲାଭ ବିଏଲଏଫର ସଭ୍ୟା ଓ କର୍ମକର୍ତ୍ତୀମାନେ ବାଣ୍ଟି ନେଉଛନ୍ତି । ଏହା ସରକାରଙ୍କ ତହବିଲ୍ କୁ ଯାଏନାହିଁ । ଏଠାରେ ଦାମୀ ରେଷ୍ଟୁରାଣ୍ଟ୍ ବା ହୋଟେଲ ଭଳି ଉଚ୍ଚଦରରେ ଖାଦ୍ୟପେୟ ବିକ୍ରିରୁ ବେଶ୍ ଲାଭ ହୋଇଥାଏ । 

ତେବେ ଏଇ ଦୁଇଟି ଉଦାହରଣ ଯଥେଷ୍ଟ ନୁହେଁ । ଏଇବ୍ଲକ୍ ର ଅନ୍ୟାନ୍ୟ ପଞ୍ଚାୟତରେ ଜିପିଏଲଏଫ୍ କୁ ଆସୁଥିବା ଅନ୍ୟାନ୍ୟ ପାଣ୍ଠିର କିପରି ସଦୁପଯୋଗ ହେଉଛି , ପ୍ରକଳ୍ପ ଗୁଡିକର ବାସ୍ତବିକତା ଓ ନିଯୁକ୍ତି ଆଦି ସମ୍ପର୍କରେ ପୁଙ୍ଖାନୁପୁଙ୍ଖ ତଦନ୍ତ କରାଗଲେ , ବହୁ ଅନିୟମିତତାର ପର୍ଦ୍ଦାଫାଶ୍ ହୋଇପାରିବ ବୋଲି ଲୋକେ ଆଲୋଚନା କରୁଛନ୍ତି ।

ବଲାଙ୍ଗୀର ଜିଲ୍ଲାର ବଙ୍ଗୋମୁଣ୍ଡା ବ୍ଲକ୍ ରେ ଗତବର୍ଷଠାରୁ ଏଭଳି ବିପିଏମ ଓ ବିଏଲସିଙ୍କ ବିରୁଦ୍ଧରେ କେଳେଙ୍କାରୀର ଅଭିଯୋଗ ପରେ ଏବେ ଖପ୍ରାଖୋଲ ବ୍ଲକ୍ ରେ ଏଭଳି ଅଭିଯୋଗ ପ୍ରକାଶ ପାଇବାରୁ ଏହା ଜିଲ୍ଲାର ଅନ୍ୟାନ୍ୟ ବ୍ଲକ୍ ରେ ମଧ୍ୟ ଘଟିଥିବାର ସନ୍ଦେହ କରାଯାଉଛି ।  ଏହାସତ୍ତ୍ୱେ ଜିଲ୍ଲାପାଳ ଓ ଓଏଲଏମର ରାଜ୍ୟ ଅଧିକାରୀମାନେ ଗଣମାଧ୍ୟମରେ ଖବର ପ୍ରକାଶ ପରେ ମଧ୍ୟ ନୀରବ ରହିବା ଆଶ୍ଚର୍ଯ୍ୟଜନକ ବୋଲି ଜନମତ ପ୍ରକାଶ ପାଇଛି ।