21-Jul-2024

ହରଭଙ୍ଗା(ଦେବବ୍ରତ ଦାଶଙ୍କ ରିପୋର୍ଟ) ବୌଦ୍ଧ ଜିଲା ସାମ୍ବାଦିକ ସଂଘର ସାଧାରଣ ପରିଷଦ ବୈଠକ ସଭାପତି ଶଶାଙ୍କ ଶେଖର ମିଶ୍ରଙ୍କ ଅଧ୍ୟକ୍ଷତାରେ ସ୍ଥାନୀୟ କର୍ମଚାରୀ ଭବନଠାରେ ଅନୁଷ୍ଠିତ ହୋଇଯାଇଛି । ବୈଠକରେ ଉପସ୍ଥିତ ସଦସ୍ୟମାନଙ୍କୁ ଜିଲା ସଂଘର ସାଧାରଣ ସମ୍ପାଦକ ରବିନ୍ଦ୍ର କୁମାର ପଟ୍ଟନାୟକ ସ୍ୱାଗତ କରିବା ସହିତ ସଂଘର ବିଭିନ୍ନ କାର୍ଯ୍ୟକ୍ରମ ପାଇଁ ସମସ୍ତଙ୍କର ସହଯୋଗ କାମନା କରିଥିଲେ । ସଭାପତି ଶ୍ରୀମିଶ୍ର ସଂଘିୟ ଏକତା ବଳରେ ସବୁକାର୍ଯ୍ୟ ସମ୍ଭବ ବୋଲି ପ୍ରକାଶ କରିବା ସହିତ ଜିଲା ସାମ୍ବାଦିକ ସଂଘ ଜିଲାରେ ଏକ ଅଗ୍ରଣୀ ଅନୁଷ୍ଠାନ ହୋଇଥିବାବେଳେ ଏହାର ଉଦ୍ଦେଶ୍ୟ ସବୁବେଳେ ସମାଜର ବିକାଶ ପାଇଁ କାର୍ଯ୍ୟ କରିବା ବୋଲି କହିଥିଲେ । ବହୁ ବରିଷ୍ଠ ସାମ୍ବାଦିକଙ୍କ ଆଶିର୍ବାଦ ଜିଲା ସାମ୍ବାଦିକ ସଂଘ ଉପରେ ରହିଥିବାବେଳେ ସ୍ୱର୍ଗୀୟ ସଦସ୍ୟମାନଙ୍କ ସ୍ମୃତିକୁ ଉଜ୍ଜିବିତ କରି ରଖିବା ପାଇଁ  ସଂଘ ପକ୍ଷରୁ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯିବାକୁ ବୈଠକରେ ଆଲୋଚନା ହୋଇଥିଲା । ସଂଘର ନୂତନ କାର୍ଯ୍ୟାଳୟ ପାଇଁ ପାଣ୍ଠି ଯୋଗାଡ ସହିତ ଏକ ନିର୍ମାଣ କମିଟି ଗଠନ କରାଯାଇଥିଲା । ଉକ୍ତ କମିଟିର ପ୍ରତ୍ୟକ୍ଷ ତତ୍ୱାବଧାନରେ ସଂଘ ପାଇଁ ପ୍ରସ୍ତାବିତ ସ୍ଥାନରେ ନୂତନ କାର୍ଯ୍ୟାଳୟ ନିର୍ମାଣ କରାଯିବାକୁ ନିଷ୍ପତି ଗ୍ରହଣ କରାଯାଇଥିଲା । ସଂଘ ପରିଚାଳନାରେ ଶୃଙ୍ଖଳା ପାଇଁ ସଂଘର ସମ୍ବିଧାନକୁ ସଂଶୋଧନ କରାଯିବାକୁ ବୈଠକରେ ସର୍ବସମ୍ମତିକ୍ରମେ ନିଷ୍ପତି ଗ୍ରହଣ କରାଯାଇଥିଲା । ସଂଘର କାର୍ଯ୍ୟକାରୀ କମିଟିରେ ନିଆଯାଇଥିବା ନିଷ୍ପତି ଗୁଡିକୁ ସାଧାରଣ ପରିଷଦ ବୈଠକରେ ସବମ୍ମତିକ୍ରମେ ଅନୁମୋଦନ କରାଯାଇଥିଲା । ଶୃଙ୍ଖଳା କମିଟି ଅଧ୍ୟକ୍ଷ ଦେବାଶିଷ ପୁରୋହିତ ସଂଘିୟ ଶୃଙ୍ଖଳା ଓ ନୂତନ କାର୍ଯ୍ୟଧାରା ଦ୍ୱାରା ସଂଘ ସାଧାରଣରେ ଆଦୃତ ହୋଇପାରିବ, ତେଣୁ ସେଥିପାଇଁ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯିବାକୁ ଗୁରୁତ୍ୱାରୋପ କରିଥିଲେ । ସେହିପରି ରାଜ୍ୟ କାର୍ଯ୍ୟକାରିଣୀ ସଦସ୍ୟ ସଂପଦ କୁମାର ଅଗ୍ରୱାଲା  ରାଜ୍ୟ ସଂଘ ଓ ଜିଲା ସଂଘ ମଧ୍ୟରେ ସମନ୍ୱୟ ରକ୍ଷା କରିବାସହ ସଂଘରେ କୌଣସି ବିଶୃଙ୍ଖଳାକୁ ପ୍ରଶ୍ରୟ ଦିଆଯିବନାହିଁ ବୋଲି ପ୍ରକାଶ କରିଥିଲେ । ସାମ୍ବାଦିକ କଲ୍ୟାଣ ପାଣ୍ଠି ଅଧ୍ୟକ୍ଷ ଅଜିତ କୁମାର ବାରିକ୍ ସଂଘ

ତଥା ସଦସ୍ୟମାନଙ୍କ ସାମାଜିକ ଓ ଆର୍ଥିକ ସୁରକ୍ଷା ପାଇଁ କଲ୍ୟାଣ ପାଣ୍ଠି ବୃଦ୍ଧିରେ ସମସ୍ତଙ୍କର ଯୋଗଦାନ ପାଇଁ ନିବେଦନ କରିଥିଲେ । ଶେଷରେ କାର୍ଯ୍ୟକ୍ରମ ସଂଯୋଜକ ଦେବାଶିଷ ପୁରୋହିତ ସଂଘ ପକ୍ଷରୁ ଆଗାମୀ କାର୍ଯ୍ୟକ୍ରମ ସଂପର୍କରେ ଆଲୋଚନା କରିଥିଲେ । ବୈଠକରେ ଜିଲା ସଦରମହକୁମା ସମେତ ତିନି ବ୍ଲକରୁ ସଦସ୍ୟମାନେ ଯୋଗଦେଇ ଆଲୋଚନାରେ ସକ୍ରିୟ ଅଂଶଗ୍ରହଣ କରିଥିଲେ । ଶେଷରେ ବରିଷ୍ଠ ସଦସ୍ୟ ସୀତାକାନ୍ତ ସିଂହ ଧନ୍ୟବାଦ ପ୍ରଦାନ କରିଥିଲେ ।