28-May-2024

କଣ୍ଟାମାଳ, (ଜୟ କୁମାର ମହାରଣା ) ନିମ୍ନରେ ଯାଇଥିବା ୧୧କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସି ଜଣେ ଯୁବକର ମୃତ୍ୟୁ ହୋଇଥିବା ଜଣା ପଡ଼ିଛି | ସୂଚନା ଅନୁସାରେ ବୌଦ୍ଧ ଜିଲ୍ଲା କଣ୍ଟାମାଳ ଥାନା ବରଗାଁ ଗ୍ରାମ ପଞ୍ଚାୟତ କୁମେଲବନ୍ଧ ଗ୍ରାମ ନିକଟରେ ନିମ୍ନରେ ଯାଇଥିବା ୧୧ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସି ଜଣକର ମୃତ୍ୟୁ ହୋଇ ଯାଇଛି l ମୃତକ ଜଣକ କୁମେଲବନ୍ଧ ଗ୍ରାମର କ୍ଷେତ୍ରବାସୀ ପୋଢ ବୋଲି ସୂଚନା ମିଳିଛି | କୁମେଲବନ୍ଧ ଗ୍ରାମର ଉଠା ଜଳ ସେଚନ ପ୍ରକଳ୍ପ ଆଡ଼କୁ ଯାଇଥିବା ୧୧ କେଭି ବିଦ୍ୟୁତ୍ ତାର ତଳକୁ ଝୁଲି ପଡିଥିବା ବେଳେ ସେହି ବାଟ ଦେଇ କୌଣସି କାମରେ ଯାଉଥିବା କ୍ଷେତ୍ର ପୋଢ ଅସାବଧାନତା ବଶତଃ ଉକ୍ତ ତାର ସଂସ୍ପର୍ଶରେ ଆସିଥିଲେ l ଫଳରେ ବିଦ୍ୟୁତ୍ ଆଘାତରେ ଘଟଣା ସ୍ଥଳରେ ହିଁ କ୍ଷେତ୍ର ମୃତ୍ୟୁ ବରଣ କରିଥିଲେ | ଖବର ପାଇ କଣ୍ଟାମାଳ ଥାନା ପୋଲିସ୍ ଓ ବିଦ୍ୟୁତ୍ ବିଭାଗ ଅଧିକାରୀ ଘଟଣା ସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ତଦନ୍ତ ଆରମ୍ଭ କରିଛି | ଉକ୍ତ ବିଦ୍ୟୁତ୍ ତାର କୁ ନିର୍ଦ୍ଧାରିତ ଉଚ୍ଚତାରେ ଟାଣିବା ପାଇଁ ଲୋକେ ବାରମ୍ବାର ବିଦ୍ୟୁତ୍ ବିଭାଗର ଦୃଷ୍ଟି ଆକର୍ଷଣ କରିଥିଲେ ସୁଦ୍ଧା ବିଭାଗ ଏହାକୁ ଅଣଦେଖା କରିଥିଲା | ଯାହା ଫଳରେ ଆଜି ଏକ ନିରୀହ ଜୀବନ ଚାଲି ଗଲା | ଉକ୍ତ ଘଟଣାରେ ସ୍ଥାନୀୟ ଲୋକେ ବିଦ୍ୟୁତ୍ ବିଭାଗ କୁ ଦାୟୀ କରିଛନ୍ତି | ତେବେ କ୍ଷେତ୍ର ଜଣେ ଗରିବ ଶ୍ରେଣୀର ହୋଇଥିବା ବେଳେ ସେ ଏକମାତ୍ର ପରିବାରର ରୋଜଗାରକ୍ଷମ ବ୍ୟକ୍ତି ଥିଲେ | ତାଙ୍କର ମୃତ୍ୟୁ ପରେ ସ୍ତ୍ରୀ ସହ ୪ପୁଅ ଝିଅ ଅନାଥ ହୋଇଛନ୍ତି | ଉକ୍ତ ଗରିବ ପରିବାରକୁ ବିଦ୍ୟୁତ ବିଭାଗ ପକ୍ଷରୁ କ୍ଷତିପୂରଣ ଦେବାକୁ ଗ୍ରାମବାସୀ ଦାବି କରିଛନ୍ତି|