16-May-2024

ବଲାଙ୍ଗୀର(ପ୍ରେରଣା ଖବର ): ଏବେ ଓଡିଶା ରାଜନୀତିର ଧୂରୀଣ ରାଜନେତା ନବୀନ ପଟ୍ଟନାୟକ ଓ ତାଙ୍କର ବାଲ୍ୟବନ୍ଧୁ ଅନଙ୍ଗଙ୍କ ମଧ୍ୟରେ ଘନିଷ୍ଠତା ପୁଣିଥରେ ବଢୁଥିବା ଲକ୍ଷ୍ୟ କରାଯାଇଛି । ଅବଶ୍ୟ ଉଭୟଙ୍କ ମଧ୍ୟରେ କେବେ ମଧ୍ୟ ତିକ୍ତତା ଆସିନଥିଲେ ହେଁ ବେଳେ ବେଳେ କିଛି ଲୋକ ତାଙ୍କର ଘନିଷ୍ଠତା କମିଥିବା ଗଣମାଧ୍ୟମରେ ଆଲୋଚନା କରୁଥିଲେ । କୁଆଡେ କରୋନା ମହାମାରୀ ପରେ ଅନେକ ଲୋକ ନବୀନଙ୍କୁ ଭେଟି ପାରୁନଥିବା ନେଇ ଚର୍ଚ୍ଚା ହେଉଥିଲା । ସେଥିରେ ବଲାଙ୍ଗୀର ରାଜପରିବାର ମଧ୍ୟ ଥିବା ରାଜଧାନୀରେ ଆଲୋଚନାର ବିଷୟ ଥିଲା । କିନ୍ତୁ ଏବେ କିଛି ଦିନ ହେଲା ନବୀନଙ୍କ ସହିତ ଅନଙ୍ଗଙ୍କ ଘନିଷ୍ଠତା ଆହୁରି ନିବିଡ ଥିବା ଲକ୍ଷ୍ୟ କରାଯାଇଛି । ମୁଖ୍ୟମନ୍ତ୍ରୀ ନବୀନଙ୍କ କଣ୍ଟାବାଞ୍ଜିରେ ପ୍ରାର୍ଥିତ୍ୱ ଘୋଷଣା ପରେ ସବୁଠୁ ବେଶି ଖୁସି ହୋଇଥିଲେ ଅନଙ୍ଗଉଦୟ ସିଂଦେଓ । ସେହିଦିନ ସେ ଖୁସିରେ ଲୋକଙ୍କୁ ମିଠାବାଣ୍ଟିଥିଲେ । ଟିଟିଲାଗଡରେ ନବୀନ ପ୍ରାର୍ଥିପତ୍ର ଦାଖଲ ସମୟରେ ତାଙ୍କ ସ୍ୱାଗତ କରି ନବୀନ-ଅନଙ୍ଗଙ୍କ ହାତମିଳାମିଳି -କୋଳାକୋଳି ଓ କଳିକେଶଙ୍କ ମୁଣ୍ଡରେ ନବୀନ ହାତରଖି ଆଶୀର୍ବାଦ ରାଜପରିବାର ସହିତ ନବୀନଙ୍କ ସମ୍ପର୍କକୁ ନେଇ ସମସ୍ତଙ୍କୁ ଆଉଥରେ ଚିନ୍ତା କରିବାକୁ ବାଧ୍ୟ କରିଥିଲା । ଏବେ ନବୀନଙ୍କ ବଲାଙ୍ଗୀର ନିର୍ବାଚନୀପ୍ରଚାରରେ ଆସିବା ସମୟରେ ଅନଙ୍ଗଙ୍କ ସପରିବାର ମନୋହରପୁର ହେଲିପେଡରେ ଉପସ୍ଥିତ ରହି ସ୍ୱାଗତ କରିବା ରୋଚକ ହୋଇଥିଲା । ମନୋହରପୁର ହେଲିପେଡରେ ଅନଙ୍ଗଉଦୟ ସିଂଦେଓ, ତାଙ୍କ ପତ୍ନୀ ବିଜୟଲକ୍ଷ୍ମୀ ଦେବୀ, କଳିକେଶନାରାୟଣ ସିଂଦେଓ, କଳିକେଶଙ୍କ ପତ୍ନୀ ମେଘନା ସିଂଦେଓ, ଅନଙ୍ଗଙ୍କ ମଝିଆପୁଅ ମନ୍ମଥବିଜୟ ସିଂଦେଓ ଉପସ୍ଥିତ ରହି ନବୀନଙ୍କୁ ଭବ୍ୟ ସ୍ୱାଗତ କରିଥିଲେ । ନବୀନ ଓ ୫ଟି ଅଧ୍ୟକ୍ଷ ଭି.କାର୍ତ୍ତିକେୟନ ପାଣ୍ଡିଆନ ରାଜପରିବାର ସଦସ୍ୟଙ୍କ ସହିତ ଫଟୋପୋଜ ମଧ୍ୟ ଦେଇଥିଲେ । ଆଲୋଚନା କାଳର ନବୀନଙ୍କ ମୁରୁକି ହସି ଫଟୋ ବିଜେଡିର ଏକ ନିଶ୍ଚିତ ବିଜୟର ସଂକେତ ବୋଲି ବଲାଙ୍ଗୀରରେ ଚର୍ଚ୍ଚା ହେଉଛି । 
      ଓଡିଶା ରାଜନୀତିର ଦୁଇଜଣ ପ୍ରମୁଖ ନେତାହେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ତାଙ୍କ ଡୁନସ୍କୁଲ ସାଥି ଅନଙ୍ଗଉଦୟ ସିଂଦେଓ । ଦୁଇଜଣ ସାଥିହୋଇ ଡୁନସ୍କୁଲରେ ପଢିବା ସହିତ ରାଜନୈତିକ ଜୀବନର ସହଯାତ୍ରୀ ହୋଇଆସିଛନ୍ତି । ନବୀନ ହେଉଛନ୍ତି ପୂର୍ବତନ ମୁଖ୍ୟମନ୍ତ୍ରୀ ସ୍ୱର୍ଗତ ବିଜୁ ପଟ୍ଟନାୟକଙ୍କ ସୁପୁତ୍ର ଓ ଅନଙ୍ଗଉଦୟ ସିଂଦେଓ ହେଉଛନ୍ତି ପୂର୍ବତନ ମୁଖ୍ୟମନ୍ତ୍ରୀ ସ୍ୱର୍ଗତ ପଟଣା ମହାରାଜା ରାଜେନ୍ଦ୍ରନାରାୟଣ ସିଂଦେଓଙ୍କ ସାନପୁଅ । ଉଭୟ ଜଣେ ଜଣେ ମୁଖ୍ୟମନ୍ତ୍ରୀଙ୍କ ପୁଅ ଓ ରାଜନୈତିକ ପରିବାରର । ଅନଙ୍ଗ ୧୯୭୪ ମସିହାରେ ଲୋଇସିଂହାର ବିଧାୟକ ପଦରୁ ତାଙ୍କର ରାଜନୈତିକ ଜୀବନ ଆରମ୍ଭ କରିଥିଲେ । ୧୯୯୦ ମସିହାରେ ଜନତାଦଳ ଟିକେଟରେ ବଲାଙ୍ଗୀର ସଦର ଆସନରୁ ବିଧାୟକ ହୋଇ ସ୍ୱର୍ଗତ ବିଜୁ ପଟ୍ଟନାୟକଙ୍କ ମନ୍ତ୍ରୀମଣ୍ଡଳରେ ମନ୍ତ୍ରୀ ମଧ୍ୟ ହୋଇଥିଲେ । କିନ୍ତୁ ୧୯୯୬ ମସିହାରେ ବିଜୁ ପଟ୍ଟନାୟକଙ୍କ ଦେହାନ୍ତ ପରେ ଓଡିଶା ରାଜନୀତିରେ ଏକ ଶୁନ୍ୟସ୍ଥାନ ସୃଷ୍ଟି ହୋଇଥିଲା । କିଛି ବନ୍ଧୁଙ୍କ ସହିତ ମିଶି ବିଦେଶରେ ଥିବା ନବୀନଙ୍କୁ ଡାକିଆଣି ଓଡିଶାରେ ଏକ ନୂତନ ରାଜନୈତିକଦଳ ଗଠନ କରି ଓଡିଶାର ଚିତ୍ର ବଦଳାଇ ଦେଇଥିଲେ ଅନଙ୍ଗ । ବିଜୁ ପଟ୍ଟନାୟକଙ୍କ ପୁତ୍ର ନବୀନଙ୍କ ଦକ୍ଷତାକୁ ନେଇ ସାରା ଓଡିଶାରେ ବିଜେଡିଦଳ ଲୋକଙ୍କ ପ୍ରୀୟଭାଜନ ହେଲା । ତେବେ ବିଜେଡିର ଅନେକ ପ୍ରତିଷ୍ଠାତା ସଦସ୍ୟ ବିଭିନ୍ନ ସମୟରେ ନବୀନଙ୍କଠାରୁ ଦୂରେଇ ଯାଇଛନ୍ତି । କିନ୍ତୁ ବିଶ୍ୱସ୍ତ ଅନଙ୍ଗ କେବେ ମଧ୍ୟ ନବୀନଙ୍କ ଠାରୁ କିମ୍ବା ଦଳରୁ ନିଜକୁ ଦୂରେଇନେବାର ଚିନ୍ତା କରିନାହାଁନ୍ତି । ଦଳରେ ଓ ଦଳବାହାରେ ଅନେକ ଥର ଅନଙ୍ଗଙ୍କ ବିରୁଦ୍ଧରେ ଷଡଯନ୍ତ୍ର ହୋଇଛି କିନ୍ତୁ ନବୀନ-ଅନଙ୍ଗଙ୍କ ଯୋଡିକୁ କେହି ଭାଙ୍ଗି ପାରିନାହାଁନ୍ତି । ଅନଙ୍ଗଉଦୟ ସିଂଦେଓ ଗତ ୨୦୧୯ ମସିହାରେ ନିର୍ବାଚନ ରାଜନୀତିରୁ ନିଜକୁ ଦୂରେଇ ନେଇ ତାଙ୍କ ପୁଅମାନଙ୍କ ପାଇଁ ବାଟ ଛାଡିଥିଲେ । ସେଥିରେ ମଧ୍ୟ ନବୀନ ସହଯୋଗ କରିଆସିଛନ୍ତି । ଚଳିତଥର ଅନଙ୍ଗ ପରିବାରରୁ କଳିକେଶ ଏକମାତ୍ର ପ୍ରାର୍ଥି ବଲାଙ୍ଗୀର ସଦର ଆସନର ବିଧାୟକ ପ୍ରାର୍ଥି ହୋଇଛନ୍ତି । ତାଙ୍କର ଭବିଷ୍ୟତ ରାଜନୀତି ଚଳିତଥର ନିର୍ଦ୍ଧାରଣ ହେବ । ଏବେ କଳିକେଶ ମଧ୍ୟ ନବୀନଙ୍କ ଭରସାରେ ରହିଛନ୍ତି । ଗତ କିଛିବର୍ଷ ମଧ୍ୟରେ କଳିକେଶ ଅନେକଗୁଡିଏ ବିକାଶ ପ୍ରକଲ୍ପ ବଲାଙ୍ଗୀରକୁ ଆଣି ପାରିଛନ୍ତି । ନବୀନଙ୍କ ସହ ଅନଙ୍ଗ ପରିବାରର ଘନିଷ୍ଠତା ବଲାଙ୍ଗୀରକୁ ଶୁଭଙ୍କର ବୋଲି କୁହାଯାଉଛି ।