10-Apr-2024

ବାଲାଙ୍ଗୀର(ପ୍ରେରଣା ଖବର ): -ବଲାଙ୍ଗୀର ସଦର ବିଧାନସଭା କ୍ଷେତ୍ରର ବଲାଙ୍ଗୀର ପୌରାଞ୍ଚଳ ଏକ ଗୁରୁତ୍ୱପୂର୍ଣ୍ଣ ଅଞ୍ଚଳ । ପୌରାଞ୍ଚଳର ୩ ନମ୍ବର ୱାର୍ଡକୁ ଏବେ ୨୦୨୪ ନିର୍ବାଚନରେ ଉଭୟ କଂଗ୍ରେସ ଓ ବିଜେଡିଦଳ ଗୁରୁତ୍ୱ ଦେଉଛନ୍ତି । ଗତ ୨୦୧୯ ସାଧାରଣ ନିର୍ବାଚନରେ ଏହି ୱାର୍ଡରେ କଂଗ୍ରେସ ବିଧାୟକ ପ୍ରାର୍ଥି ନରସିଂହ ମିଶ୍ର ବିଜେଡିର ପ୍ରାର୍ଥି ଅର୍କେଶନାରାୟଣ ସିଂଦେଓଙ୍କଠାରୁ ପ୍ରାୟ ୯୦୦ଭୋଟ ଅଧିକ ପାଇଥିଲେ । ଫଳରେ ବଲାଙ୍ଗୀର ପୌରାଞ୍ଚଳୌରେ କଂଗ୍ରେସର ଭୋଟ ବଢିଥିଲା । ସେହିପରି ଗତ ପୌରନିର୍ବାଚନରେ କଂଗ୍ରେସର କାଉନସିଲର ରଜନୀ ବନଛୋର ମଧ୍ୟ ବିଜେଡି କାଉନସିଲରଠାରୁ ପ୍ରାୟ ୧୫୦ ଭୋଟ ଅଧିକ ପାଇ ବିଜୟୀ ହୋଇଥିଲେ । କିନ୍ତୁ ବିଜେଡିର ପୌରଅଧ୍ୟକ୍ଷା ଲିକା ସାହୁ ଏହି ୱାର୍ଡରୁ ୭୦ଟି ଅଧିକ ଭୋଟ ପାଇଥିଲେ । ସେଥିପାଇଁ କଂଗ୍ରେସଦଳର ଚିନ୍ତା ବଢିଯାଇଥିଲା । ନିଜର ପଲା ଭାରି ରଖିବାକୁ ଏବେ କଂଗ୍ରେସଦଳର ପ୍ରାର୍ଥି ସମରେନ୍ଦ୍ର ପ୍ରାର୍ଥି ଉଦ୍ୟମ ଚଳାଇଛନ୍ତି । ପୂର୍ବରୁ ରାଜପରିବାରର ଅନୁଗତ ଥିବା ତଥା ପୂର୍ବତନ ବିଜେଡି କାଉନସିଲର ଉପେନ ଦୀପଙ୍କୁ କଂଗ୍ରେସ ନିଜ ସପକ୍ଷରେ ନେଇଛି । ଗତକାଲି ୩ ନମ୍ବର ୱାର୍ଡରେ ହୋଇଥିବା କଂଗ୍ରେସ ବୈଠକରେ ଉପେନ ଦୀପଙ୍କ ସମେତ ତାଙ୍କ ସମର୍ଥକଙ୍କୁ କଂଗ୍ରେସରେ ଯୋଗଦାନ କରାଯାଇଛି । ଫଳରେ ଏହି ୱାର୍ଡରେ କଂଗ୍ରେସ ମଜବୁତ ହେବ ବୋଲି କଂଗ୍ରେସଦଳ କହିଛି । ସେପଟେ ବିଜେଡିଦଳ ମଧ୍ୟ ନୂଆ ତରିକା ଆପଣେଇଛି । ପୂର୍ବରୁ ଯେଉଁମାନେ କଂଗ୍ରେସଦଳରେ ଥିଲେ ସେମାନଙ୍କୁ ଆଣି ବିଜେଡିଦଳରେ ସାମିଲ କରାଇଛନ୍ତି । ସୋମବାର ଦିନ ଶୈଳଶ୍ରୀ ପ୍ୟାଲେସଠାରେ ହୋଇଥିବା ବିଜେଡିର ଏକ ମିଶ୍ରଣ ପର୍ବରେ ପ୍ରାୟ ୫୦ଜଣ ଯୁବକ ଆସି କଳିକେଶନାରାୟଣ ସିଂଦେଓଙ୍କଠାରେ ବିଜେଡିଦଳରେ ସାମିଲ ହୋଇଛନ୍ତି । ଶୁଣାଯାଉଛି ଗତ ୨୦୧୯ ନିର୍ବାଚନ ବେଳେ ଉପେନ ଦୀପ

ବିଜେଡିଦଳରେ ଥିଲେ ମଧ୍ୟ ବିରୋଧିଦଳ ସହ ହାତ ମିଳାଇଥିଲେ । ଯାହା ପାଇଁ ବିଜେଡିଦଳ ସେଠାରେ ବହୁତ କମ ଭୋଟ ପାଇଲା । ଏହାପରେ ପରେ ଉପେନ ଦୀପ ବିଜେଡିଦଳ ସହିତ ସମ୍ପର୍କ ଛିନ୍ନ କରିଥିଲେ । ଗତ ପୌରନିର୍ବାଚନ ବେଳେ ଉପେନ ବିଜେଡିଛାଡି ଭାଜପାଦଳରୁ କାଉନସିଲର ପ୍ରାର୍ଥି ହୋଇଥିଲେ । କିନ୍ତୁ ସେ ଅଲ୍ପ ଭୋଟ ପାଇ ହାରିଯାଇଥିଲେ । ଚଳିତ ସାଧାରଣ ନିର୍ବାଚନ ପୂର୍ବରୁ ଏବେ ସେ କଂଗ୍ରେସଦଳରେ ଯୋଗଦେଇ ନରସିଂହ ମିଶ୍ରଙ୍କୁ ବିକାଶମୂଳକ କାମରେ ସହଭାଗୀ ହେବାକୁ ଚାହିଁଛନ୍ତି । ସେପଟେ ବିଜେଡିଦଳ କହିଛି ଯେ,ଉପେନଙ୍କୁ ଥିବା ଓ ଯିବା ମଧ୍ୟରେ ବିଜେଡିକୁ କୌଣସି ଫରକ ପଡିବନି । ଚଳିତ ନିର୍ବାଚନରେ ବିଜେଡିଦଳ ଏହି ୱାର୍ଡରେ ନିଶ୍ଚୟ ଅଧିକ ଭୋଟ ପାଇବ ବୋଲି ଦୃଢୋକ୍ତି ପ୍ରକାଶ କରାଯାଇଛି । ପ୍ରକାଶ୍ୟ ଯେ,୩ନମ୍ବର ୱାର୍ଡର୍ ହେଉଛି ଏକ ଖ୍ରୀଷ୍ଟିଆନ ଓ ଦଳିତ ବହୁଳ ଅଞ୍ଚଳ । ପ୍ରାୟ ୩୨୦୦ ଭୋଟ ଥିବା ଏହି ୱାର୍ଡରେ ପ୍ରାୟ ୨୫୦୦ ଭୋଟ ପୁଲିଂ ହୋଇଥାଏ । ତେଣୁ ସେଥିରୁ ସିଂଘଭାଗ ଭୋଟ ହାତେଇବାକୁ ଉଭୟ ବିଜେଡି ଓ କଂଗ୍ରେସଦଳ ଉଦ୍ୟମ ଚଳାଇଛନ୍ତି ।