02-Apr-2024

କଣ୍ଟାମାଳ, (ପ୍ରେରଣା ଖବର) ସାଧାରଣ ନିର୍ବାଚନ ନିମନ୍ତେ କଣ୍ଟାମାଳ ବିଧାନସଭା ପାଇଁ ଭାରତୀୟ ଜନତା ପାର୍ଟି ଓ କଂଗ୍ରେସ ଦଳ ପକ୍ଷରୁ ଆଜି ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ପ୍ରକାଶ ପାଇଛି l  ପୂର୍ବରୁ ବିଜେଡି ଦଳ ତାର ପ୍ରାର୍ଥୀ ନାମ ଘୋଷଣା କରିଥିବାବେଳେ ଆଜି ମଧ୍ୟାହ୍ନ ସମୟରେ ଉଭୟ ବିଜେପି ଓ କଂଗ୍ରେସ ଦଳ ପକ୍ଷରୁ ଅନୁଷ୍ଠାନିକ ଭାବେ ନାମ ଘୋଷଣା କରିଛନ୍ତି l ବୌଦ୍ଧ ଜିଲ୍ଲା ର କଣ୍ଟାମାଳ ବିଧାନସଭା କ୍ଷେତ୍ର ପାଇଁ ଭାରତୀୟ ଜନତା ପାର୍ଟି (ବିଜେପି ) ରୁ କହ୍ନାଇ ଚରଣ ଡାଙ୍ଗ ଙ୍କୁ ପୁନର୍ବାର ଦଳ ପ୍ରାର୍ଥୀ କରିଛି l  ସେହିପରି କଂଗ୍ରେସ ଦଳ ଚଳିତ ନିର୍ବାଚନ ରେ ନୂତନ ଭାବେ ବାଲିଗୁଡାର ଟାଣୁଆ ନେତା ମନୋଜ ଆଚାର୍ଯ୍ୟ ଙ୍କୁ କଣ୍ଟାମାଳରୁ ପ୍ରାର୍ଥୀ ଭାବେ ଘୋଷଣା କରିଛି   l    ତୃତୀୟ ଥର ପାଇଁ ବିଜେପି ଦଳ କଣ୍ଟାମାଳ ପାଇଁ ଶ୍ରୀଯୁକ୍ତ ଡାଙ୍ଗ ଙ୍କ କାର୍ଯ୍ୟଦକ୍ଷତା, ସାଙ୍ଗଠନିକ ସ୍ଥିତି ଓ ଲୋକପ୍ରିୟତା ଉପରେ ଆସ୍ଥା ପ୍ରକଟ କରି ପ୍ରାର୍ଥୀ କରିଛି  l  ଦଳ ତରଫରୁ ପୁନଃ ଶ୍ରୀ ଡାଙ୍ଗ ଙ୍କ ନାମ ଘୋଷଣା ପରେ କଣ୍ଟାମାଳ ବିଧାନସଭା ନିର୍ବାଚନ ମଣ୍ଡଳୀର ବିଜେପି କର୍ମୀମାନଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି   l   ବିଭିନ୍ନ ସ୍ଥାନରେ ବିଜେପି ଓ କଂଗ୍ରେସ କର୍ମୀ  ଆତସବାଜି ସହ ମିଷ୍ଟାନ ବଣ୍ଟନ କରି ଖୁସିରେ ପରସ୍ପରକୁ ଆଲିଙ୍ଗନ କରୁଥିବା ଦେଖିବାକୁ ମିଳିଥିଲା  l   ସେହିପରି ଜିଲ୍ଲାର ଅନ୍ୟତମ ବୌଦ୍ଧ ବିଧାନସଭା ନିର୍ବାଚନ ମଣ୍ଡଳୀ ପାଇଁ ବିଜେପିରୁ ହରଭଙ୍ଗା ବ୍ଲକ ଉପାଧ୍ୟକ୍ଷ ସରୋଜ ପ୍ରଧାନ  ଓ ବରିଷ୍ଠ ଆଇନଜୀବୀ ତଥା ଜିଲ୍ଲା କଂଗ୍ରେସ କମିଟି ସଭାପତି ନବ କୁମାର ମିଶ୍ର ଙ୍କୁ କଂଗ୍ରେସ ଦଳ ପ୍ରାର୍ଥୀ କରିଛି l  ତିନି ପ୍ରମୁଖ ଦଳର ପ୍ରାର୍ଥୀ ଘୋଷଣା ସରିଥିବାବେଳେ କଣ୍ଟାମାଳ ବ୍ଲକର ବିଭିନ୍ନ ଛକ, ବଜାର, ଚା ଦୋକାନ ରେ ନିର୍ବାଚନୀ ଖଟି ଆରମ୍ଭ ହୋଇଥିବା ଦେଖିବାକୁ ମିଳିଛି  l