01-Apr-2024

ବୌଦ୍ଧ/ହରଭଙ୍ଗା(ଜୟାନନ୍ଦ ମିଶ୍ର ): ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ଲୁଣିବାହାଲ ପଞ୍ଚାୟତ ରେ ମନରେଗା ଯୋଜନାରେ ଚାଲିଥିବା ଆଖିବୁଜା ଦୁର୍ନୀତି ଉପରେ ଆମ୍ବଡସମ୍ୟାନଙ୍କ ପୁଣି ଛାଟ ପଡିଛି ।ମନରେଗା ଯୋଜନାରେ ଏକ ରାସ୍ତା କାମରେ ଦୁର୍ନୀତି ଏବଂ  ଅନିୟମିତତା ଉପରେ ଆମ୍ବୁଡମ୍ୟାନ କଡା କାର୍ଯ୍ୟାନୁଷ୍ଟାନ ଗ୍ରହଣ କରିଛନ୍ତି ।ଦୁର୍ନୀତିରେ ସଂମ୍ପୃକ୍ତ ପଞ୍ଚାୟତ ର ସରପଞ୍ଚ ,ପିଇଓ ,ଜିଆରଏସଙ୍କ ସମେତ କନିଷ୍ଟ  ଯନ୍ତ୍ରୀ ଏବଂ ବ୍ଲକ ଏ.ପି.ଓ ଙ୍କ ଠାରୁ ୨ଲକ୍ଷ୫୧ହଜାର ୬୦୯.୪୧ଟଙ୍କା ଭରଣା ପାଇଁ ନିର୍ଦ୍ଦେଶ ଦେଇଛନ୍ତି ।ସୂଚନା ଅନୁଯାୟୀ ହରଭଙ୍ଗା ବ୍ଲକ୍ ଲୁଣିବାହାଲ ପଂଚାୟତର ଶୁକପାଲି ଧୋବାସାହି ଠାରୁ ବରୁଆଳ ବନ୍ଧ ରାସ୍ତା ଉନ୍ନତିକରଣ କାର୍ଯ୍ୟରେ ଦୁର୍ନୀତି ହୋଇଥିବା ନେଇ ଲଇଗାଁ ଗ୍ରାମର 
ବାବୁଲା ଦେହୁରୀ ଗତ ଜାନୁୟାରୀ ମାସରେ  ମନରେଗା ଲୋକପାଳ ବୌଦ୍ଧଙ୍କ ନିକଟରେ ଲିଖିତ ଅଭିଯୋଗ କରିଥିଲେ ।ଲୋକପାଳଙ୍କ ପକ୍ଷରୁ ଏକ ମାମଲା ରୁଜୁକରାଯାଇ ଘଟଣାର ତ୍‌ଦନ୍ତ ପରେ ରାସ୍ତା କାର୍ଯ୍ୟରେ ହୋଇଥିବା ଦୁର୍ନୀତି ଏବଂ ଅନିୟମିତତା ଧରାପଡିଥିଲା । ଡ.ଦିଲ୍ଲିପ କୁମାର ମହାପାତ୍ର (ମନରେଗା ଲୋକପାଳ ବୌଦ୍ଧ)  ଏହି ମାମଲାର ଶୁଣାଣି କରି ବ୍ଲକ  ଏ.ପି.ଓ ହେମନ୍ତ କୁମାର ପ୍ରଧାନ,ଲୁଣିବାହାଲ ସରପଞ୍ଚ ଚନ୍ଦ୍ରମା ପ୍ରଧାନ,ପୂର୍ବତନ କନିଷ୍ଟ  ଯନ୍ତ୍ରୀ ମନୋଜ କୁମାର ପାଣିଗ୍ରାହୀ, ପୂର୍ବତନ ପିଇଓ ପୁରନ୍ଦର ଠେଲା ଏବଂ ପୂର୍ବତନ ଜି.ଆର.ଏସ ପ୍ରଶାନ୍ତ କୁମାର ପଣ୍ଡାଙ୍କ ଭଳି ୫ଜଣଙ୍କଠାରୁ  ୫୦ହଜାର ୩୨୧.୮୮ଟଙ୍କା ଲେଖାଏଁ  ମୋଟ ୨ଲକ୍ଷ ୫୧ହଜାର ୬୦୯.୪୧ଟଙ୍କା ଏକମାସ ଭିତରେ ଦରମାରୁ ଭରଣା ପାଇଁ ନିର୍ଦ୍ଦେଶ ଦେଇଛନ୍ତି ।ଏହା ସହିତ ସେମାନଙ୍କ ବିରୁଦ୍ଧରେ ବିଭାଗୀୟ ପ୍ରୋସିଡିଂ ପାଇଁ ସୁପାରିଶ କରିଛନ୍ତି ।ଏହା ସହିତ ମନରେଗା ନିୟମ ଉଲ୍ଲଘଂନ କରୁଥିବା ଲାଇସେନ୍ସପ୍ରାପ୍ତ  ପ୍ରଧାନ ଟ୍ରାନସ୍ପୋର୍ଟର ଭେଣ୍ଡର ବାତିଲ ପାଇଁ ମଧ୍ୟ ନିର୍ଦ୍ଦେଶ ଦେଇଛନ୍ତି ।ଶେଷରେ ବି.ଡି.ଓ ,ବ୍ଲକ ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ ଏବଂ ସହକାରୀ ଯନ୍ତ୍ରୀଙ୍କୁ ପ୍ରକଳ୍ପ କାର୍ଯ୍ୟ ତଦାରଖ ଉପରେ ନଜର ରଖିବାକୁ ନିର୍ଦ୍ଦେଶ ଦେଇଛନ୍ତି ।ଗତ ସେପ୍ଟେମ୍ବର ୨୦୨୩ ରେ ଏହି ପଞ୍ଚାୟତରୁ ବିନା କୃଷି ପୋଖରୀ ଖନନ ଦୁର୍ନୀତି ଉପରେ ଆମ୍ବୁଡସମ୍ୟାନ ୭ଜଣ ଅଧିକାରୀଙ୍କ ନାଁରେ କାର୍ଯ୍ୟାନୁଷ୍ଠାନ ସୁପାରିଶ କରିଥିଲେ ।ବାରମ୍ବାର ଗୋଟିଏ ପଞ୍ଚାୟତ ରୁ ମନରେଗା ଦୁର୍ନୀତିର ପର୍ଦ୍ଦାଫାଶ ପରେ ବି ଏହି ପଞ୍ଚାୟତରେ କାର୍ଯ୍ୟରତ ପିଇଓ,ଜିଆରଏସ,ଯନ୍ତ୍ରୀ ଭଳି ସରକାରୀ କର୍ମଚାରୀଙ୍କ ସହିତ  ବି.ଡି.ଓ ଙ୍କ ଉପରେ କଡା ନଜର ରଖିବାକୁ ସାଧାରଣରେ ଦାବୀ ହେଉଛି ।