28-Mar-2024

ବଲାଙ୍ଗିର(ପ୍ରେରଣା ଖବର ): ନିର୍ବାଚନ ପ୍ରକ୍ରିୟାର ଅଖଣ୍ଡତାକୁ ବଜାୟ ରଖିବା ଉଦ୍ଦେଶ୍ୟରେ ସ୍ୱାସ୍ଥ୍ୟଗତ ଆଧାରରେ ପୋଲିଂ ଅଧିକାରୀଙ୍କ ଦ୍ୱାରା ଉଠାଯାଇଥିବା ଅଭିଯୋଗର ସତ୍ୟତାକୁ ସୁନିଶ୍ଚିତ କରିବା ପାଇଁ ବଲାଙ୍ଗିର ଜିଲ୍ଲା ପ୍ରଶାସନ ପକ୍ଷରୁ ଡାକ୍ତରୀ ପରୀକ୍ଷା କରାଯିବାକୁ ସ୍ଥିର ହୋଇଛି  I ଜିଲ୍ଲା ସ୍ୱାସ୍ଥ୍ୟ ବିଭାଗ ପକ୍ଷରୁ ଗଠିତ ମେଡିକାଲ ବୋର୍ଡ ଦ୍ୱାରା ପୋଲିଂ ଅଧିକାରୀଙ୍କ ଡାକ୍ତରୀ ପରୀକ୍ଷା କରାଯିବ I ନିର୍ବାଚନ ପ୍ରକ୍ରିୟାରେ ନିଜର କର୍ତ୍ତବ୍ୟ ସମ୍ପାଦନ କରିବାର କ୍ଷମତାକୁ ପ୍ରଭାବିତ କରୁଥିବା ସ୍ୱାସ୍ଥ୍ୟ ସମ୍ବନ୍ଧୀୟ ପ୍ରସଙ୍ଗକୁ ଦର୍ଶାଇଥିବା ପୋଲିଂ ଅଧିକାରୀଙ୍କ ଚିକିତ୍ସା ସ୍ଥିତିକୁ ସୂକ୍ଷ୍ମ ଭାବେ ଅନୁଧ୍ୟାନ କରିବା ଏହି ଡାକ୍ତରୀ ପରୀକ୍ଷାର ଉଦ୍ଦେଶ୍ୟ I 

ଏହି ସୂଚୀ ଅନୁଯାୟୀ ବଲାଙ୍ଗୀର ଉପଖଣ୍ଡ ୧୨୦ ଜଣ ଅଧିକାରୀଙ୍କ ଆସନ୍ତା ମାର୍ଚ୍ଚ ୨୯  ତାରିଖ ଏବଂ ୧୧୬ ଜଣଙ୍କ ଆସନ୍ତା ମାର୍ଚ୍ଚ ୩୦ ତାରିଖ  , ପାଟଣାଗଡ଼ ଉପଖଣ୍ଡ ୪୬ ଜଣ ଅଧିକାରୀଙ୍କ ଆସନ୍ତା ମାର୍ଚ୍ଚ ୨୯  ତାରିଖ ଏବଂ ୪୭ ଜଣଙ୍କ ଆସନ୍ତା ମାର୍ଚ୍ଚ ୩୦ ତାରିଖ  , ଟିଟିଲାଗଡ ଉପଖଣ୍ଡ ୯୭ ଜଣ ଅଧିକାରୀଙ୍କ ଆସନ୍ତା ମାର୍ଚ୍ଚ ୨୯  ତାରିଖ ଏବଂ ୮୫ ଜଣଙ୍କ ଆସନ୍ତା ମାର୍ଚ୍ଚ ୩୦ ତାରିଖ  ପୂର୍ବାହ୍ନ ଘ ୧୦ ସମୟରେ ସମସ୍ତ ଡାକ୍ତରୀ ପରୀକ୍ଷା କରାଯିବ I ସମୁଦାୟ ୫୩୫ ଜଣ ପୋଲିଙ୍ଗ ବ୍ୟକ୍ତିବିଶେଷଙ୍କ ପରୀକ୍ଷା ହେବାର ସ୍ଥିର ହୋଇଛି ।  ଉକ୍ତ ପରୀକ୍ଷା ଗୁଡିକ ଭୀମଭୋଇ ମେଡ଼ିକାଲ କଲେଜ , ପାଟଣାଗଡ଼ ଉପଖଣ୍ଡ ମେଡ଼ିକାଲ ଓ ଟିଟିଲାଗଡ ଉପଖଣ୍ଡ ମେଡିକାଲ ରେ ହେବ । ପ୍ରଥମ ପର୍ଯ୍ୟାୟ ପୋଲିଂ ଅଧିକାରୀଙ୍କ ଟ୍ରେନିଂ ପରେ ସେମାନଙ୍କ ଦ୍ବାରା ଉଠାଯାଇଥିବା ଅଭିଯୋଗ ଆଧାରରେ ଏହି ଡାକ୍ତରୀ ପରୀକ୍ଷା ହେବ । 

ନିର୍ବାଚନ ପ୍ରକ୍ରିୟାରେ ସମସ୍ତ ପୋଲିଂ ଅଧିକାରୀ ଶାରୀରିକ ଭାବେ ସୁସ୍ଥ ଏବଂ ସେମାନଙ୍କ କର୍ତ୍ତବ୍ୟ ପାଳନ କରିବାରେ ସକ୍ଷମତା ସୁନିଶ୍ଚିତ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ଏହି ପଦକ୍ଷେପ ନିଆଯାଇଛି I ସମସ୍ତ ସମ୍ପୃକ୍ତ ପୋଲିଂ ଅଧିକାରୀମାନଙ୍କୁ ଡାକ୍ତରୀ ପରୀକ୍ଷା ପାଇଁ ନିର୍ଦ୍ଧାରିତ ସମୟରେ ନିର୍ଦ୍ଧାରିତ ସ୍ଥାନରେ ଉପସ୍ଥିତ ରହିବାକୁ ପରାମର୍ଶ ଦିଆଯାଇଛି I