29-Sep-2022

ବୀରମହାରାଜପୁର,( ବିନୋଦ ପାଣ୍ଡେ):  ସୁବର୍ଣ୍ଣପୁର ଜିଲ୍ଲାଦେଇ ପ୍ରଭାବିତ ହେଉଥିବା ମହାନଦୀରେ ବିଭିନ୍ନ ସମସ୍ୟାରୁ ମାଛ ବଂଶ କମିବାରେ ଲାଗିଥିବା ନେଇ ଅନେକ ସମୟରେ ଅଭିଯୋଗ ହୋଇଆସୁଥିଲା। ମହାନଦୀ ରେ ମାଛ ବଂଶ ବୃଦ୍ଧି ଓ ଅଧିକ ଉତ୍ପାଦନ  ପାଇଁ ଜିଲ୍ଲା ପ୍ରଶାସନ ପକ୍ଷରୁ ବିଭିନ୍ନ ସ୍ଥାନରେ ବହୁ ପରିମାଣରେ ମାଛ ଜାଆଁଳା

ଛଡାଯାଇଛି।  ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଉଫୁଲା ପଞ୍ଚାୟତ ଅନ୍ତର୍ଗତ ଖମ୍ବେଶ୍ୱରୀପାଲି ମହାନଦୀ ଘାଟ ଠାରେ ବିଭାଗ ପକ୍ଷରୁ ୨ଲକ୍ଷ ଉନ୍ନତ (ଇଣ୍ଡିଆ ମେଜର କାର୍ପ) ମାଛ ଜାଆଁଳା ଛଡାଯାଇଥିବା ଜଣାଯାଇଛି। ଏହି ଅବସରରେ ଖମ୍ବେଶ୍ୱରୀପାଲି ଠାରେ ସ୍ଥାନୀୟ ଲୋକମାନଙ୍କୁ ନେଇ ଏକ ସଚେତନତା କାର୍ଯ୍ୟକ୍ରମରେ ଅନୁଷ୍ଠିତ ହୋଇଥିଲା। ଏଥିରେ ଉଫୁଲା ସରପଞ୍ଚ ଶ୍ରୀୟା କର୍ମୀ ମୁଖ୍ୟ ଅତିଥି ଭାବେ ଯୋଗଦେଇ ଥିଲେ। ବିଭାଗ ପକ୍ଷରୁ ମାଛ ଚାଷକୁ ଉପଯୁକ୍ତ ତାଲିମ ପ୍ରଦାନ ସହ ସେମାନଙ୍କୁ ବିଭିନ୍ନ ସରକାରୀ ଯୋଜନାରେ ସାମିଲ କରାଯିବ, ବୀରମହାରାଜପୁର ବ୍ଲକ ପାଇଁ ସହକାରୀ ମତ୍ସ୍ୟ ଅଧିକାରୀ ନିଯୁକ୍ତି ସହ ମାଛ ଚାଷୀଙ୍କୁ ଚିହ୍ନଟ ଓ ସ୍ବୟଂ ସହାୟକ ଗୋଷ୍ଠୀକୁ ପ୍ରୋତ୍ସାହନ ଯୋଗେଇ ଦେବାକୁ ସରପଞ୍ଚ ଶ୍ରୀମତୀ କର୍ମୀ ଦାବି ଉପସ୍ଥାପନ କରିଥିଲେ। ସୁବର୍ଣ୍ଣପୁର ଜିଲ୍ଲା  ମତ୍ସ୍ୟ ଅଧିକାରୀ ପ୍ରସନ୍ନ ପଟ୍ଟନାୟକ,‌ଭାରପ୍ରାପ୍ତ ସରକାରୀ ମତ୍ସ୍ୟ ଅଧିକାରୀ ପ୍ରତାପ

ମେହେର, କନିଷ୍ଠ ବୈଷୟିକ ମତ୍ସ୍ୟ ସହାୟକ ଶଶିକାନ୍ତ ଦାସ କାର୍ଯ୍ୟକ୍ରମରେ ସାମିଲ ହୋଇଥିଲେ। ଏହି ଅବସରରେ ଗ୍ରାମ ପଞ୍ଚାୟତର କାର୍ଯ୍ୟନିର୍ବାହୀ ଅଧିକାରୀ ଗୈାରଚରଣ ସାହୁ,ଯୋଗାଣ ସହାୟକ ଦେବେନ୍ଦ୍ର ପଣ୍ଡା,  ୱାର୍ଡ଼ ସଭ୍ୟ ଧରୀତ୍ରୀ ବାଘ ପ୍ରମୁଖ ଉପସ୍ଥିତ ଥିଲେ। ଗ୍ରାମର ମତ୍ସ୍ୟଜୀବୀମାନେ ମହାନଦୀରେ ମାଛ ଜାଆଁଳା ଛାଡିବାରେ ସହଯୋଗ କରିଥିଲେ।