-+91-9937148622 |
prerana_bgr@rediffmail.com |
Friday 29th March 2024 |
R.N.I. Regd No. ODIODI/2010/46693
Breaking News
11-Sep-2022
ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ) ଗତ ୮ ତାରିଖରେ କଣ୍ଟାବାଞ୍ଜି ପୁଲିସ୍ କଣ୍ଟାବାଞ୍ଜି-ବଙ୍ଗମୁଣ୍ଡା ମୁଖ୍ୟରାସ୍ତାର ଧାମନଡଙ୍ଗାଗ୍ରାମର ରବି ସୁନା (୫୦)ଙ୍କର ଗଳିତ ମୃତଦେହକୁ ତାଙ୍କ କ୍ଷେତର ତାଙ୍କ ମାଆ ଓ ପତ୍ନୀଙ୍କର ସମାଧୀ ନିକଟରୁ ଏକ ପରିତ୍ୟକ୍ତ ଝୋପଡି ଭିତରେ ବଢିଥିବା ଛୋଟ ଚାକୁଣ୍ଡାଗଛର କଅଁଳିଆ ଡାଳରେ ବେକରେ ଗାମୁଛା ବନ୍ଧାଯାଇ ପାଦତଳେ ଲାଗିଥିବା ଓ ଠିଆହେଇ ଝୁଲାଯାଇଥିବା ଅବସ୍ଥାରେ ଉଦ୍ଧାର କରି ବ୍ୟବଚ୍ଛେଦ କରାଇଛି । ପାରିପାର୍ଶ୍ବିକ ଅବସ୍ଥା ଓ ପୂର୍ବରୁ ସ୍ଥାନୀୟ କୋର୍ଟରେ ଚାଲିଥିବା ତାଙ୍କର ଏକ ଜମିଜମା ହଡପ ସମ୍ବନ୍ଧୀୟ ସିଭିଲ୍ ମାମଲା ରହିଥିବା ଯୋଗୁଁ ଏହା ଆତ୍ମହତ୍ୟା କମ୍ ଓ ବେଶିଭାଗ ହତ୍ୟାକାଣ୍ଡ ହେଇପାରେ ବୋଲି ତାଙ୍କ ବଡଭାଇ ଅକ୍ଷୟ ସୁନା ତଥା ପରିବାର ପକ୍ଷରୁ ସନ୍ଦେହମୂଳକ ଅଭିଯୋଗ ପ୍ରକାଶ ପାଇଛି ।
ଉଲ୍ଲେଖନୀୟ ଯେ ଅଭିଯୋଗ ଅନୁଯାୟୀ ,କିଛିବର୍ଷ ଆଗରୁ କଣ୍ଟାବାଞ୍ଜିର କେତେକ ଅଣଓଡିଆ ଲୋକେ ରବିକୁ ଫୁସୁଲାଇ ମଦଫଦ ପିଆଇ ଜଣେ ଓକିଲ ଜରିଆରେ କିଛି ଜମି କିଣି ରେଜିଷ୍ଟ୍ରି କରି ନେଇଥିଲେ । ପରେ ସେମାନେ ଚଞ୍ଚକତା କରି ୫ ଏକରରୁ ଅଧିକ ଅଧିକ ଜମି ଠକି ନେଇଥିବା ଓ ସେମାନେ ଏହାକୁ ସମତୁଲ କରି ପ୍ଲଟିଂ କରିବାକୁ ଆସିଥିବାବେଳେ ପରିବାରଲୋକଙ୍କ ଅଜାଣତରେ ଏହା କରାଯାଇଥିବାରୁ ସ୍ଥାନୀୟ କୋର୍ଟରେ ଏକ ଅଭିଯୋଗ ମାମଲା ଦାଏର କରାଯାଇଥିଲା । ଗତ ୮ ତାରିଖରେ ମଧ୍ୟ ଏହାର ତାରିଖ ରହିଥିଲା । କୋର୍ଟକୁ ଆସି ଭାଇର ଶବ ଝୁଲୁଥିବା ଖବର ପାଇ ମୃତକର ଭାଇ ଅକ୍ଷୟ ସୁନା ଏହା ଗଣମାଧ୍ୟମରେ ପ୍ରକାଶ
କରିଛନ୍ତି । ତେବେ ରବିର ଏକ ଛୋଟ ଝିଅ ଅଛି ଓ ତାଙ୍କ ପତ୍ନୀଙ୍କର ଦେହାନ୍ତ ହୋଇଯାଇ ଥିବାରୁ ସେ ପ୍ରାୟ ଗାଁ' ବା ଘରେ ନରହି ଏଣେ ତେଣେ ବୁଲୁଥିବା ମଧ୍ୟ ସେ କହି , ଏହାପଛରେ ସେଇ ଜମିହଡପ କାରଣ ରହିଥିବା ଓ ଝୁଲାଇଦେଇ ହତ୍ୟାପରି ଜଣାପଡୁଥିବା ସନ୍ଦେହ ପ୍ରକାଶ କରିଛନ୍ତି । ପ୍ରକାଶଯୋଗ୍ୟ ଯେ ଏବେ ଏହି ଅଞ୍ଚଳରେ ଜମିର ମୂଲ୍ୟ ଆକାଶଛୁଆଁ ଓ ଏହି ରାସ୍ତାକଡର ଅଧିକାଂଶ ଜମି ସହରର ଜମିମାଫିଆ, ଦାଦନସର୍ଦ୍ଦାର, ଅଣଓଡିଆ ବ୍ୟବସାୟୀଙ୍କର କବ୍ଜାରେ ଓ ସେମାନଙ୍କ ଲୋଲୁପଦୃଷ୍ଟିରେ ରହିଛି । ତେଣୁ କିଛିବର୍ଷ ତଳେ ରବି ସୁନାଙ୍କ ପରି ଜଣେ ଦଳିତ ଜାତିର ଗରିବ ଲୋକଠାରୁ ଚଞ୍ଚକତା ପୂର୍ବକ ଏହି ମୂଲ୍ୟବାନ୍ ଜମି ହାତେଇଥିବା ସେହି ଅଣଓଡିଆ ବ୍ୟବସାୟୀମାନେ କିଏ ଓ ସଂପ୍ରତି ସେହି ମାମଲାର ସ୍ଥିତି କ'ଣ ରହିଛି ଏବଂ ଏହାପଛରେ ଅଭିଯୋଗ ଅନୁଯାୟୀ , ପ୍ରକୃତରେ ସେପରି କିଛି ରହିଛି କି ନାହିଁ, ଶବବ୍ୟବଚ୍ଛେଦ ରିପୋର୍ଟ ସହ ପୁଲିସ୍ ତଦନ୍ତ ପରେ ଜଣାପଡିବ । ଏହି ଘଟଣାଟି ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି । ସର୍ବୋପରି ରବିଙ୍କ ମୃତ୍ୟୁପରେ ଏହି କୁହାଯାଉଥିବା ସାଢେ ୫ ଏକର ପରିମିତ ମୂଲ୍ୟବାନ୍ ରାସ୍ତାକଡ ଜମିର ମାଲିକାନା କାହାର, ଏ ନେଇ ଲୋକେ ଜିଜ୍ଞାସା ବ୍ୟକ୍ତ କରିଛନ୍ତି ।