-+91-9937148622 |
prerana_bgr@rediffmail.com |
Friday 29th March 2024 |
R.N.I. Regd No. ODIODI/2010/46693
Breaking News
16-May-2022
ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ): ଦୀର୍ଘ ଦଶନ୍ଧିଧରି ଦାଦନପ୍ରବଣ ଆଦିବାସୀବହୁଳ ଅନାହାରମୃତ୍ୟୁ , ପିଲାବିକ୍ରି ଆଦି ଚରମ ଦାରିଦ୍ର୍ଯ ନିମନ୍ତେ ଅପଖ୍ୟାତ ଅବହେଳିତ ପଶ୍ଚିମଓଡିଶାର ସୀମାନ୍ତଜିଲ୍ଲା ବଲାଙ୍ଗୀରରେ ସାମାନ୍ୟ ସାମୟିକ ବ୍ୟବଧାନରେ ପୁଣି ମାଓବାଦୀମାନେ ସେମାନଙ୍କର ଉପସ୍ଥିତି ଜାହିର୍ କରିଛନ୍ତି ।
ସପ୍ତାହେତଳେ ତୁରେକେଲା ଅଞ୍ଚଳରେ କଦଳୀପାଲି ଗ୍ରାମ ନିକଟରେ ମାଓବାଦୀଙ୍କ ସୂଚନା ପାଇ ପୁଲିସ୍ ଓ ମାଓ ନିରାକରଣରେ ନିୟୋଜିତ ସ୍ବତନ୍ତ୍ରବଳ କମ୍ବିଂ ଅପରେସନ୍ କରି କେତେକ ମାଓସାମଗ୍ରୀ ଜବତ କରିଥିବାବେଳେ , ଦୁଇଦିନତଳେ ଠିକ୍ ହରିଶଙ୍କର ବୈଶାଖମେଳା ବେଳକୁ ଖପ୍ରାଖୋଲ ବ୍ଲକ୍ ଲାଠୋର ଥାନା ଅନ୍ତର୍ଗତ ଘୁମସର - ପୁଟକେଲଚୁଆଁ ହାଟରେ ମାଓବ୍ୟାନର ପୁଲିସ୍ ଜବତ କରିଛି ।
ପ୍ରକାଶଯୋଗ୍ୟ ଯେ , ଏହିସବୁ ଅଞ୍ଚଳରେ ବିଗତଦିନରେ ଅଳ୍ପବର୍ଷତଳେ ମାଓବାଦୀମାନେ ଏକାଧିକ ନରସଂହାର ଘଟାଇଥିବା ସହ ପୁଲିସ୍ ଓ ଏସଓଜି ଦ୍ବାରା ମଧ୍ୟ ଏକାଧିକ ମାଓବାଦୀଙ୍କୁ ଏନକାଉଣ୍ଟର କରାଯିବା ସହ ଅନେକ ମାଓ କ୍ୟାମ୍ପ୍ କିଛି କିଛିଦିନ ଅନ୍ତରରେ ଜବତ କରାଯାଆସୁଛି । ସେହିପରି କେତେକ ମାଓବାଦୀ ଓ ମାଲାସିଆଙ୍କୁ ମଧ୍ୟ ଗିରଫ କରାଯାଇଛି । ତଥାପି ବଲାଙ୍ଗୀର ଜିଲ୍ଲାର ଏହି ତୁରେକେଲା , ଖପ୍ରାଖୋଲ ଓ ସପଟର ନୂଆପଡା ବା ବରଗଡ ଜିଲ୍ଲାର ପାହାଡପର୍ବତ ଗନ୍ଧମାର୍ଦ୍ଦନ ଅଞ୍ଚଳରେ ମାଓ ଗତିବିଧି ଅବ୍ୟାହତ ରହିଆସିଛି ।
ଏହାର କାରଣ ସମ୍ପର୍କରେ ଯଥାଯଥ ଅନୁଧ୍ୟାନ କରାଯାଇନାହିଁ । ଯଦିଓ ମାଓ ଅଧ୍ୟୁଷିତ ଅଞ୍ଚଳରେ ସରକାରଙ୍କ ଦ୍ବାରା କେତେକ ବିକାଶମୂଳକ ଯୋଜନା , ଆମ୍ବୁସ୍ ବା ସଶସ୍ତ୍ରବଳ ସ୍ଥାପନ ସହ ଜନସମ୍ପର୍କ ଶିବିର ଇତ୍ୟାଦିର ଆୟୋଜନ କରାଯାଇ ଆସୁଛି । ତଥାପି ଏହି ଅଞ୍ଚଳରେ ସରକାରୀ ଯୋଜନାରେ ପ୍ରବଳ ଦୁର୍ନୀତି , ଏଠାରୁ ହିଁ ସର୍ବାଧିକ ଦାଦନଶ୍ରମିକ ଚାଲାଣ ଓ ବହୁଚର୍ଚ୍ଚିତ ଅପରାଧମାମଲାଗୁଡିକର ହ୍ରାସ ହେଉନାହିଁ । ଏହି ଅଞ୍ଚଳର ସର୍ଗିପାଲି ଦଳିତଯୁବତୀ ସ୍ନେହଲତା ଛତ୍ରିଆ ଗଣଦୁଷ୍କର୍ମ ଓ ହତ୍ୟାକାଣ୍ଡର କ୍ରାଇମବ୍ରାଞ୍ଚ ତଦନ୍ତ ଫେଲ୍ ମାରିଛି । ବହୁଚର୍ଚ୍ଚିତ ପାର୍ଶଲବୋମା ଡବଲମର୍ଡର ମାମଲାର କ୍ରାଇମବ୍ରାଞ୍ଚ ତଦନ୍ତରେ ଭିନ୍ନମୋଡ ଦିଆଯାଇଥିବା ଅଭିଯୋଗ ପ୍ରକାଶ ପାଇଆସୁଛି । ରାଜ୍ୟର ବହୁଚର୍ଚ୍ଚିତ ମମିତା ମେହେର ହତ୍ୟା ମାମଲାର ଶିକାର ମମିତା ଏହି ତୁରେକେଲା ଅଞ୍ଚଳର ଝିଅ । ସଦ୍ୟ ଗତ ୫ ତାରିଖରେ ପାଟଣାଗଡ ବ୍ଲକ୍ ର ଜଣେ ନିରୀହ ଆପାତତଃ ସଚ୍ଚୋଟ ଜେଇଙ୍କୁ ସ୍ପଷ୍ଟଦିବାଲୋକରେ ଠିକାଦାରମାନେ ହତ୍ୟା କରିଥିବା ଅଭିଯୋଗର ତଦନ୍ତରେ ଏଯାଏଁ ଦୁଇ ସପ୍ତାହ ହେଲା ପୁଲିସ୍ କୌଣସି ତତ୍ପରତା ପ୍ରକାଶ କରୁ ନଥିବାରୁ ଜନ ଅସନ୍ତୋଷ ପୁଞ୍ଜିଭୂତ ହେଉଛି । ଏପରିକି ଏହି ଅଞ୍ଚଳ ତଥା ଜିଲ୍ଲାରେ ଶାସକଦଳର ସଂଖ୍ୟାଗରିଷ୍ଠତା ସତ୍ତ୍ୱେ ସରକାରୀ ଯୋଜନାରେ ପ୍ରଚୁର ପିସି କାରବାର ଓ ରାଜନେତା - ଅଫିସର - ଠିକାଦାରୀରାଜ୍ ଫଳରେ ଏଭଳି ନରହତ୍ୟା ପରି ଅପରାଧ ଘଟାଇ ଦୋଷୀମାନେ ନିରଙ୍କୁଶ ହୋଇ ବୁଲୁଥିବା ଚର୍ଚ୍ଚା ହେଉଛି ।
ଆହୁରିମଧ୍ୟ , ଏହି ଉପଖଣ୍ଡରେ ଓ ଗୋଟିଏ ବେଲପଡାବ୍ଲକ୍ ରେ ବାହାରକୁ ଇଟାଭାଟିରେ କାମ କରିବାକୁ ଯାଇଥିବା ଗୋଟିଏ ସପ୍ତାହ ମଧ୍ୟରେ ୩ +୧ ଜଣ ଦାଦନଶ୍ରମିକଙ୍କର ମୃତଦେହ ଘରେ ପହଞ୍ଚିବାପରେ ଏକ ସଂଗଠନ କୋଶଳ ମୁକ୍ତି ମୋର୍ଚ୍ଚା ପକ୍ଷରୁ ଉପଜିଲ୍ଲାପାଳଙ୍କ ଜରିଆରେ ସରକାରଙ୍କୁ ଅଞ୍ଚଳର ସମସ୍ତଦାଦନଶ୍ରମିକଙ୍କୁ ରାଜ୍ୟବାହାରେ ପ୍ରଚଣ୍ଡଖରାରେ ଖଟାଇ ନିର୍ଯାତନା ଦିଆଯାଉଥିବା ଅଭିଯୋଗ କରାଯାଇ ଫେରାଇ ଅଣାଯିବାକୁ ଦାବି କରାଯାଇଛି । ଏଣୁ ଏଭଳି ଦୁର୍ନୀତି , ସରକାରୀ ଅବହେଳା ଓ ଅପରାଧର ଉଚିତ୍ ତଦନ୍ତ ବା ସାମାଜିକନ୍ୟାୟ ବିପନ୍ନ ହେଉଥିବାର ଅଭିଯୋଗ ଓ ଜନଅସନ୍ତୋଷ ମାଓବାଦୀଙ୍କ ପରି ସନ୍ତ୍ରାସବାଦୀଙ୍କୁ ସୁହାଉ ନାହିଁ ତ ବୋଲି ଆଶଙ୍କା ସୃଷ୍ଟିକୁ ଏଡାଯାଇ ପାରୁନାହିଁ ।