22-Feb-2022

ଭୁବନେଶ୍ୱର(ସୁଭାସିସ ନାୟକ): ୧୬ ନମ୍ବର ଜାତୀୟ ରାଜପଥ ଭୁବନେଶ୍ୱର ପାହାଳ ନିକଟରୁ ୧ କୋଟିରୁ ଅଧିକ  ଟଙ୍କାର ବ୍ରାଉନ ସୁଗର ଜବତ କରିଛି କ୍ରାଇମ ବ୍ରାଂଚର ସ୍ପେଶାଲ୍ ଟାକ୍ସ ଫୋର୍ସ (ଏସ୍ଟିଏଫ୍) ।  ବ୍ରାଉନ୍ ସୁଗର ଜବତ କରିବା ସହିତ ମୋଷ୍ଟ ୱାଣ୍ଟେଡ ଶିବ ପ୍ରସାଦ ଦାସଙ୍କୁ ଗିରଫ କରିଛି ପୋଲିସ ।

     ଶିବ ପ୍ରସାଦର ଘର ଜଟିଣୀ ଅଞ୍ଚଳରେ ବୋଲି ଏସ୍ଟିଏଫ୍ ସୂଚନା ଦେଇଛି । ଯାଞ୍ଚ ବେଳେ ତା’ ନିକଟରୁ ୧,୨୨୭ ଗ୍ରାମ ବ୍ରାଉନ୍ ସୁଗର ମିଳିଥିଲା । ଏହା ସହିତ ତା’ ବାଇକ୍ ଓ ମୋବାଇଲ ଫୋନ୍ ଜବତ କରାଯାଇଛି । ଶିବ ଗତ ଜାନୁଆରୀ ୨୪ ତାରିଖରୁ ଫେରାର ଥିଲା । ଏହା ପୂର୍ବରୁ ତା’ ନିକଟରୁ ୩,୧୦୦ ଗ୍ରାମ୍ ବ୍ରାଉନ ସୁଗର, ୬୫ ଲକ୍ଷରୁ ଅଧିକ ଟଙ୍କା, ୩ଟି ବନ୍ଧୁକ, ୭ଟି ମାଗାଜିନ୍ ଜବତ ହୋଇଥିଲା । ତା’ ନାଁରେ ରାଜ୍ୟର ବିଭିନ୍ନ ଜିଲ୍ଲାରେ ୬ଟି ଅପରାଧିକ ମାମଲା ରହିଥିବା ଏସ୍ଟିଏଫ୍ ପକ୍ଷରୁ କୁହାଯାଇଛି ।

୨୦୨୦ ଠାରୁ ସ୍ପେଶାଲ୍ ଡ୍ରାଇଭ କରି ଏସ୍ଟିଏଫ୍ ବର୍ତ୍ତମାନ ସୁଦ୍ଧା ୪୯ କେଜିରୁ ଅଧିକ ବ୍ରାଉନ୍ ସୁଗର ଓ ୮୯ କ୍ୱିଣ୍ଟାଲରୁ ଅଧିକ ଗଞ୍ଜେଇ ଜବତ କରିବା ସହିତ ୧୨୩ ଜଣ ଅଭିଯୁକ୍ତଙ୍କୁ ଗିରଫ କରିସାରିଲାଣି ।