-+91-9937148622 |
prerana_bgr@rediffmail.com |
Friday 19th April 2024 |
R.N.I. Regd No. ODIODI/2010/46693
Breaking News
25-Dec-2021
ଦୃଢ଼ ଆତ୍ମବିଶ୍ୱାସ ଓ ଅଧ୍ୟାବସାୟ ବଳରେ ଅସମ୍ଭବକୁ ବି ସମ୍ଭବ କରି ହୁଏ । ଲକ୍ଷ୍ୟ ଯଦି ମହତ୍ ଥାଏ ତେବେ ରାସ୍ତା ଆପେ ଆପେ ଆସିଥାଏ । ଏହାକୁ ପ୍ରମାଣିତ କରି ଦେଇଛନ୍ତି ବଲାଙ୍ଗୀର ସହର ରୁଗୁଡି ପଡାର ଜଣେ ଉଦ୍ଯୋଗୀ ଯୁବକ ଅନୀଲ କୁମାର ନନ୍ଦ । ବଲାଙ୍ଗୀର ସଦର ବ୍ଳକ ଖର୍ଲିକାନୀ ଗ୍ରାମ ନିକଟରେ ଅଢ଼େଇ ଏକର ପରିମିତ ବିସ୍ତୀର୍ଣ୍ଣ ଜମିରେ ଅତ୍ୟାଧୁନିକ ଜ୍ଞାନକୌଶଳ ପ୍ରୟୋଗ କରି ବିଭିନ୍ନ ପ୍ରକାରର ପନିପରିବା ଚାଷ କରିବାରେ ସଫଳ ହୋଇଛନ୍ତି ଅନୀଲ । ଅନୀଲ ବଲାଙ୍ଗୀର କେନ୍ଦ୍ର ସମବାୟ ବ୍ୟାଙ୍କର ଜଣେ କର୍ମଚାରୀ ହୋଇଥିଲେ ମଧ୍ୟ ପ୍ରଥମରୁ ସେ ନିଜ ମାଟିରେ କିଛି ଅଭିନବ କାମ କରିବାର ସ୍ୱପ୍ନ ଦେଖିଥିଲେ । ତେବେ ତାଙ୍କ ଯୋଜନାର ସଫଳ ରୂପାୟନ ହେବା ପଛରେ ନିଜର ବାପା ମାଁ ଙ୍କ ଆଶିର୍ବାଦ, ବଡ ଭାଇ ସୁଶୀଳ, ସୁଧୀର, ପତ୍ନୀ ମୀରାଓ ଏକମାତ୍ର ପୁଅ ବିଶ୍ୱାସଙ୍କ ସହଯୋଗ ତଥା ଭାଗବାନଙ୍କ କୃପା ରହିଛି ବୋଲି କହିଛନ୍ତି ଅନୀଲ । ଏହି ପନିପରିବା ଚାଷ ଜରିଆରେ ସେ ପ୍ରଚୁର ଆତ୍ମସନ୍ତୋଷ ଲାଭ କରିବା ସହ ପାଖ ଗାଁ ର କିଛି ଲୋକଙ୍କ ପାଇଁ ସେ ରୋଜଗାର ର ମାଧ୍ୟମ ପାଲଟିଛନ୍ତି ବୋଲି କହନ୍ତି ଅନୀଲ । ବଲାଙ୍ଗୀର ସହରରୁ ମାତ୍ର ୭ କିଲୋମିଟର ଦୂର ଏକ ବଣ ପାହାଡ ଘେରା ଶାନ୍ତ, ଶୀତଳ ଓ ପ୍ରାକୃତିକ ପରିବେଶ ମଧ୍ୟରେ ଗଢ଼ି ଉଠିଥିବା ଅନୀଲଙ୍କ ଏହି ଫାର୍ମ ହାଉସ ରେ ସିମଲା ମିର୍ଚ(କେପ୍ସିକମ୍), କଦଳୀ. ବାଇଗଣ, ସଜନା, ପିଜୁଳି, ଆମ୍ବ, ମୂଳା, ଧନିଆପତ୍ର, ରସୁଣ ଆଦି ବିଭିନ୍ନ କିସମର ପନିପରିବା ଓ ଫଳ ଗଛ ଶୋଭା ପାଉଛି । ଏକ ମନୋରମ ପରିବେଶ ମଧ୍ୟରେ ଗଢ଼ି ଉଠିଥିବା ଏହି ବଗିଚାର ରକ୍ଷଣାବେକ୍ଷଣ ପାଇଁ ୪ଜଣ କର୍ମଚାରୀ ନିୟୋଜିତ ହୋଇଥିବା ବେଳେ ଓ.ୟୁ.ଟି ର ଜଣେ ଅଭିଜ୍ଞ ଟେକ୍ନିସିଆନଙ୍କ ଦିଗ୍ଦର୍ଶନ ତଥା ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ପନିପରିବା ଓ ଫଳ ବଗିଚା
ପରିଚାଳିତ ହେଉଛି । କିଛି ଦିନ ତଳେ ବଲାଙ୍ଗୀର ଉଦ୍ୟାନ ବିଭାଗର ଅଧିକାରୀ ଓ କର୍ମଚାରୀ ମାନେ ଏହି ଫାର୍ମ ହାଉସକୁ ପରିଦର୍ଶନରେ ଆସି ଏଠାକାର ଚାଷ ପ୍ରଣାଳୀ, ଉତ୍ତମ ପରିବେଶ ଓ ଆଧୁନିକ ଜ୍ଞାନକୌଶଳର ପ୍ରୟୋଗର ଭୂୟସୀ ପ୍ରଶଂସା କରି ଯାଇଛନ୍ତି । ସଂପ୍ରତି ବଲାଙ୍ଗୀର ଜିଲ୍ଲାରେ ପନିପରିବାର ଚାହିଦା ଅହେତୁକ ଭାବରେ ବୃଦ୍ଧି ପାଉଥିବା ବେଳେ ବଲାଙ୍ଗୀର ଜିଲ୍ଲାରେ ଚାହିଦା ମୁତାବକ ପନିପରିବା ଚାଷ ହେଉ ନଥିବାରୁ ବହାର ଜିଲ୍ଲା ତଥା ରାଜ୍ୟରୁ ପନିପରିବା ରପ୍ତାନୀ ହେଉଛି । ଏପରି ପରିସ୍ଥିତିରେ ଜିଲ୍ଲାର ଅସଂଖ୍ୟ ଚାଷୀ ମାନଙ୍କୁ ଆତ୍ମନିର୍ଭରଶୀଳ କରିବାର ଏକ ରାସ୍ତା ଦେଖାଇଛନ୍ତି ଅନୀଲ । ଅନୀଲଙ୍କ ନିଜସ୍ୱ ଉଦ୍ୟମରେ ତଥା ବିନା ସରକାରୀ ସାହାଯ୍ୟ ସହଯୋଗରେ ଗଢ଼ି ଉଠିଥିବା ଏହି ପନିପରିବା ବଗିଚା ଆଗାମୀ ଦିନରେ ବଲାଙ୍ଗୀରରେ ଦେଖାଦେଇଥିବା ପନିପରିବାର ଅଭାବକୁ ଅନେକାଂଶରେ ଦୂର କରିବା ଏଥିରେ ସନ୍ଦେହ ନାହିଁ ।